1 Tzaj yolin Kman tuc'il Moisés ex tuc'il Aarón, chi cyja': 2 K'i'n jawa cyajlal tiyjil Coat cyxol aj Leví, tuj c'lojin ic tza'nx junjun c'loj cyiyjil, 3 akeju ma che japun twi' 30 abk'i ex cpol baj cyi'j keju ma che japun twi' 50 abk'i ex at cynabl tu'n cyajben tuj ja xbalun te mojbabl tibil. 4 Aju cyak'un ke tiyjil Coat tuj ja xbalun te mojbabl tibil atzun, tu'n toc cycwentin ke ti'xti xjan. 5 Oc cyic' lak'e' tnam xjal, c'elel ti'n Aarón cyuc'ix ke tcy'ajal aju xbalun tcub te makbil tuj tja Dios, ex c'ic'ex cylic'un tibaj cax c'ubl tley Dios, te maksibl te. 6 Ex tibaj xbalun lu, cbel cylic'un ke tz'u'm tbanilxix, te maksibl te, ex tibaj tz'u'm cbel cylic'un juntl xbalun ẍk'ilun que'yin, ex c'oquex cyk'o'n ke tze' tjak' tu'ntzun t-xi cyikan. 7 Ax icx cbel cylic'un jun xbalun ẍk'ilun que'yin tibaj mes in che cub ten pan tibaj, ex tibajtzun ju xbalun lu, cbel cyk'o'n ke lak, ke cuchar nmak, ke copa te c'abl ex ke xar tcubil oyaj vin, ax icx aju pan in xi k'ot tcyakil maj. 8 Tibajtzun tcyakil jlu cbel cylic'un jun xbalun cyak que'yin, ex te mancbilxi, c'ic'ex cylic'un ke tz'u'm tbanilxix tibaj, ex c'oquex cyk'o'n ke tze' tjak' tu'ntzun t-xi cyikan. 9 Ax icx ctzajel cyi'n jun xbalun ẍk'ilun que'yin, ex c'ic'ex cylic'un tibaj tcubl candil, cyibaj ke candil, cyibaj ke matzbil twi mech, ke tal plat, ex cycyakil ke tcubl aseyt. 10 Cycyakiltzun ke jlu cbajel cypotzin cyi'j cyu'n ke tz'u'm tbanilxix, ex cbel cyk'o'n twitz parwel tu'ntzun t-xi cyikan. 11 Ax icx c'ic'ex cylic'un jun xbalun ẍk'ilun que'yin tibaj altar k'an pwak ttx'otx'il, cbel cyk'o'n ke tz'u'm tbanilxix tibaj, ex c'oquex cyk'o'n ke tze' tjak' tu'ntzun t-xi cyikan. 12 C'oquex cyk'o'n cycyakil ke macbil in che ajben tuj tja Dios tuj jun xbalun ẍk'ilun que'yin, ex c'oquex cypotzin cyuj ke tz'u'm tbanilxix, ax icx cbel cyk'o'n twitz parwel tu'ntzun t-xi cyikan. 13 C'elel cyi'n tza'j tibaj altar ex cbel cymaksi'n tu'n jun xbalun ẍjulin que'yin. 14 Tibajtzun cbel cyk'o'n cycyakil ke macbil in che ajben tuj c'ulbil: Ke tcubl xk'a'l, ke cuchar, ke pala ex ke lak nmak, akeju in che ajben ti'j altar. Cbel cymaksi'n cyibaj cycyakil jlu cyu'n ke tz'u'm tbanilxix, ex c'oquex cyk'o'n ke tze' tjak' tu'ntzun t-xi cyikan. 15 Tbajlenxitzun cypotzin Aarón cyuc'ix ke tcy'ajal cyi'j cycyakil ti'xti in che ajben ti'j tja Dios, ex cyi'j cycyakil ke macbil in che ajben tuj, ex otok bant cyten aj Israel tu'n tcub be cyu'n, ba'ntzun tu'n cytzaj ke tiyjil Coat tu'n t-xi cyikan tcyakil jlu, pero mi'n tz'oc cymaco'n ke macbil xjan tu'ntzun mi'n cycyim. Cycyakil ke ti'xti at tuj ja xbalun te mojbabl tibil, ake tiyjil Coat che xel ikante cye. 16 Atzunte Eleazar aju tcy'ajal pal Aarón c'oquel cwentinte aseyt cye candil, tuc'ix storac at tc'oc'jal, tuc'ix oyaj ti'j twitz awal ctzajel cyk'o'n aj Israel tcyakil k'ij weye, ex aju aseyt te xjansabl. Ax icx c'oquel tcwentin tja Dios, tuc'ix tcyakilju at tuj, akeju macbil xjan. 17 Tzaj yolin Kman tuc'il Moisés ex tuc'il Aarón, chi cyja': 18 Mi'n cyak'e ambil tu'n cycub naj ke tiyjil Coat cyxol aj Leví. 19 Atzun jlu tu'n tbant cyu'n tu'n mi'n cycyim oc cypon lak'e' cyi'j ke ti'xti xjan. Nej c'oquex Aarón cyuc'ix ke tcy'ajal tuj ja xbalun te mojbabl tibil, ex atzun ke che xel k'mante cye aj Coat alcye tu'n tbant tu'n junjun ex alcye tu'n t-xi cyi'n. 20 Cyja'tzun mi'n che ocx ke aj Coat que'yil cye macbil xjan ka na'nxtok tbaj potzit cyi'j, tu'ntzun mi'n cycyim. 21 Tzaj yolin Kman tuc'il Moisés ex tma: 22 Ax icx k'i'n jawa cyajlal tiyjil Gersón tuj c'lojin tza'nx junjun c'loj cyiyjil, 23 akeju ma che japun twi' 30 abk'i, ex pon baj cyi'j keju ma che japun twi' 50 abk'i ex at cynabl tu'n cyajben tuj ja xbalun te mojbabl tibil. 24 Aju cyak'un ke tiyjil Gersón atzun jlu: 25 C'ic'el cyi'n ke xbalun te tja Dios, aju ja xbalun te mojbabl tibil, cyuc'ix ke tz'u'm tbanilxix aju in cub ten tibaj, tuc'ix ju xbalun tcub ttzi ja xbalun te mojbabl tibil, 26 cyuc'ix ke xbalun cyoc ti'jele ttxa'n pe'n, tuc'ix ju xbalun tcub jatum in che ocx xjal tu'n cyocpun tuj ttxa'n pe'n toc ti'jele tja Dios ex ti'jele altar, cyuc'ix ke tak'al, cyuc'ix cycyakil macbil in che ajben ti'j; ex tuj cycwent cyjel ten tcyakil jlu. 27 Ate Aarón cyuc'ix ke tcy'ajal che xel k'mante cye tiyjil Gersón alcye ak'untl tu'n tbant cyu'n, ex alcye ke ti'xti cxel cyikan. Akeye che xel k'onte cyoclen ti'j ju cbantel cyu'n. 28 Atzun ak'untl lu cbantel cyu'n ke cabe c'loj tiyjil Gersón ti'j ja xbalun te mojbabl tibil, ex a Itamar aju tcy'ajal pal Aarón tu'n t-xi k'mante cyak'un. 29 Ax icx k'i'n jawa cyajlal tiyjil Merari tuj c'lojin, tza'nx cyiyjil, 30 akeju ma che japun twi' 30 abk'i, ex cpol baj cyi'j keju ma che japun twi' 50 abk'i ex at cynabl tu'n cyajben tuj ja xbalun te mojbabl tibil. 31 Aju cyak'un tu'n tbant ti'j ja xbalun te mojbabl tibil, atzun jlu: Cxel cyikan ke tz'lom te tja Dios, cyuc'ix ke tk'e'lil, cyuc'ix ke tkan, cyuc'ix ke tk'ukbil, 32 cyuc'ix ke tkan toc ti'jele ttxa'n tpe'n tja Dios, cyuc'ix ke tk'ukbil, ke stac, ke tak'al ex tcyakilju in ajben cyi'j. Aya cxel k'mante cye alcye ke macbil tu'n t-xi cyi'n teyle junjun. 33 Atzun ak'untl lu cbantel cyu'n ke cabe c'loj tiyjil Merari ti'j ja xbalun te mojbabl tibil, ex a Itamar aju tcy'ajal pal Aarón tu'n t-xi k'mante cyak'un, chi Dios, xi tma'n te Moisés. 34 Tu'n Moisés ex Aarón cyuc'ix ke nejenel te tnam jaw cyajlal tiyjil Coat tuj c'lojin, ic tza'nx cyiyjil. 35 tzajx ke' cyi'j keju otok che japun twi' 30 abk'i, ex pon baj cyi'j keju otok che japun twi' 50 abk'i ex at cynabl tu'n cyajben tuj ja xbalun te mojbabl tibil. 36 Akeju xinak jaw cyajlal tza'nx cyiyjil, japun 2,750 cybaj tu'n tcyakilx. 37 Atzun tajlal jlu o japun cyi'j ke tiyjil Coat, akeju otok bant tu'n cyajben tuj ja xbalun te mojbabl tibil, tza'nx tajlal o jaw tu'n Moisés ex Aarón, ic tza'nx otok tzaj tma'n Kman te Moisés. 38 Jaw jun cyajlal ke tiyjil Gersón tuj c'lojin cyten, ic tza'nx junjun c'loj cyiyjil, 39 tzajx ke' cyi'j keju otok che japun twi' 30 abk'i, ex pon baj cyi'j keju otok che japun twi' 50 abk'i ex at cynabl tu'n cyajben tuj ja xbalun te mojbabl tibil, 40 ex japun 2,630 cybaj tu'n tcyakilx. 41 Atzun tajlal jlu o japun cyi'j ke tiyjil Gersón, akeju otok bant tu'n cyajben tuj ja xbalun te mojbabl tibil, tza'nx tajlal o jaw tu'n Moisés ex Aarón, ic tza'nx otok tzaj tma'n Kman. 42 Jaw cyajlal ke tiyjil Merari tuj c'lojin cyten, ic tza'nx junjun c'loj cyiyjil, 43 tzajx ke' cyi'j keju otok che japun twi' 30 abk'i, ex pon baj cyi'j keju otok che japun twi' 50 abk'i ex at cynabl tu'n cyajben tuj ja xbalun te mojbabl tibil, 44 ex japun 3,200 cybet tu'n tcyakilx. 45 Atzun tajlal jlu o japun cyi'j ke tiyjil Merari, ic tza'nx tajlal o jaw tu'n Moisés ex Aarón, ic tza'nx otok tzaj tma'n Kman te Moisés. 46 Aju cyajlal aj Leví jaw tuj c'lojin ic tza'nx junjun c'loj cyiyjil, tu'n Moisés ex Aarón cyuc'ix ke nejenel cye aj Israel, 47 tzajx ke' cyi'j keju otok che japun twi' 30 abk'i, ex pon baj cyi'j keju otok che japun twi' 50 abk'i ex at cynabl tu'n cyajben tuj ja xbalun te mojbabl tibil, ex tu'n t-xi cyikan cycyakil ke ti'xti in che ajben ti'j tja Dios, 48 japun 8,580 cybaj tu'n tcyakilx. 49 Aju tajlal o jaw lu o bant ic tza'nx otok tzaj tma'n Kman te Moisés, ex teyle junjun xi k'ma'n te alcye tu'n tbant tu'n ex alcye tu'n t-xi tikan, ic tza'nx otok tzaj tma'n Kman te Moisés.
