NÚMEROS 36

1E pon ke nejenel cye tiyjil Galaad tuc'il Moisés ex cyuc'il ke nejenel cye cycyakil c'loj cyiyjil aj Israel. Ate Galaad tcy'ajal Maquir, atzunte Maquir tcy'ajal Manasés, ex atzunte Manasés tcy'ajal José, ex xi cyma'n cye cyja': 2—O tzaj tma'n Kman teya, aya Tat Moisés, tu'n tcub t-sipana tx'otx' tuj swertin cyxol aj Israel. Ax icx o tzaj tma'n Kman teya ka aju tx'otx' attok toquel te Zelofehad, aju junx kiyjile tuc'il, ba'n tu'n t-xi k'ot cye ke tme'jel. 3Pero ka ma che moje' ke xu'j lu cyuc'il ke xinak cyxol juntl c'loj cyiyjil aj Israel, entons aju tx'otx' o cyc'am mlay tz'octl te tajlal tuc'il cytx'otx' ke kiyjile, nok o'cx c'oquel te tajlal tuc'il cytx'otx' cyiyjil keju che mojebl cyuc'il, ex tu'ntzun jlu c'elel cyi'n jun piẍ ktx'otx'e aju ma tzaj k'o'n te ketzbile. 4Ex oc tul canun aju abk'i te tzokpibl cye aj Israel, aju cytx'otx' ke xu'j lu bi'xlo c'ajel tuj cycwent juntl c'loj cyiyjil aj Israel, ex ya mlay tz'octl te tajlal tuc'il cytx'otx' kiyjile, che chi. 5Atzunte Moisés xi tma'n cye aj Israel aju tzaj tma'n Kman te cyja': —Ax toc aju in cyma'n ke tiyjil José. 6Ctzajel tk'o'n Kman ambil tu'n cymoje' ke tme'jel Zelofehad nok al uc'ilx cyajbil, pero ax cyuc'il ke tiyjil cyman, 7tu'ntzun mi'n t-xi k'ot jun piẍ cytx'otx' jun c'loj cyiyjil aj Israel cye juntl c'loj; cyja'tzun cycyakil aj Israel che tel tuj cyex cyetzbil cyxolx cyiyjil. 8Ka at jun xu'j nok alcyex tiyjil, ma tc'am jun piẍ tx'otx' te tetzbil, il ti'j tu'n tmoje' tuc'ilx jun xinak junx tiyjil tuc'il, tu'ntzun cyten teyle junjun aj Israel tuj cyetzbil oc cyc'ma' te cyman. 9Mi jun piẍ tx'otx' cye jun c'loj aj Israel c'ajel cyuc'il juntl c'loj. Teyle junjun c'loj aj Israel c'oquel cycwentin aju tx'otx' oc cyc'ma'. 10Cybinchatzun ke tme'jel Zelofehad ic tza'nx otok tma Kman te Moisés. 11Cyja'tzun o che moje' Maala, Tirsa, Hogla, Milca ex Noa cyuc'il ke cycy'ajal terman ktzan cyman. 12E moje' cyuc'il tiyjil Manasés aju tcy'ajal José. Cyja'tzun aju cyetzbil ax o ten cyxol ke tiyjil ktzan cyman. 13Atzun ke ley lu tzaj tma'n Kman te Moisés tu'n t-xi tma'n cye aj Israel cyuj tchk'ajlajil tx'otx' Moab, aju tcubsa'n ttzi nima Jordán tumlal twitz tnam Jericó.

will be added

X\