NÚMEROS 34

1Tzaj yolin Kman tuc'il Moisés ex tma: 2K'manxa cye aj Israel cyja': Oc cypone tuj tx'otx' Canaán aju tx'otx' c'oquel te cyetzbile, atzun ke tmojonil jlu: 3Aju tmojonil tuj tumlal tnayaj k'ij, atzun cmojonil tib tuc'il tzkij tx'otx' Zin ex tuc'il tx'otx' Edom. Atzun ctzajel ke' tmojonil tuj tnayaj k'ij ttxa'npun mar at Nim Atz'an Tuj, tumlal tjawitz k'ij, 4c'elex tuj tnayaj k'ij tu'n tex tc'u'j witz Acrabim, tu'n tex tuj lugar tzkij tx'otx' Zin ex tu'n tpon max Cades-barnea, tu'n tic'tl tu'n tpon Hasar-adar, tu'n tpon tuj Asmón, 5tu'n tic'tl tuj Asmón, tu'n tpon max ttzi tk'ab xak tmojonil Ejipt ex atzun cpol baj ttzi Nintz mar. 6Aju tmojonil tuj tumlal telex k'ij, atzun Nintz mar. 7Aju tmojonil tuj tumlal tbank'ab k'ij, atzun jlu: Ctzajel ke' max ttzi Nintz mar tu'n tjapun twi witz Hor, 8ex c'oquetz twi witz Hor tu'n tpon ttzi tnam Hamat, ex tu'n tic'tl tu'n tpon tuj Zedad. 9Ctzajelx tuj lugar Zedad tu'n tpontl max tuj Zifrón ex atzun cpol baj tuj lugar Hazar-enán. Ex atzun tmojonil tx'otx' lu tuj tumlal tbank'ab k'ij. 10Aju tmojonil tuj tumlal tjawitz k'ij ctzajel ke' tuj lugar Hazar-enán, tu'n tpon max tuj lugar Sefam, 11tu'n tic'tl tuj lugar Sefam, tu'n tpontl tuj tnam Ribla, tuj tumlal tjawitz k'ij te lugar Aín; ex atzun cbeletz tu'n tcu'pun tuj tumlal tjawitz k'ij te lagun Cineret, 12cbeletz ttzi'yile nima Jordán ex atzun cpol baj ttzi mar at Nim Atz'an Tuj. Atzun ke lugar lu tmojonil cytx'otx'e, chi Kman te Moisés. 13Xitzun tma'n Moisés cye aj Israel cyja': —Atzun tx'otx' lu cbajel cysipane tu'n swert; aju o tma Kman tu'n t-xi k'ot cye belaj c'loj tuc' mijtl cyiyjil aj Israel, 14porque akeju tiyjil Rubén, cyuc'ix tiyjil Gad ex mij tiyjil Manasés ma cyc'am cyetzbil ic tza'nx junjun c'loj cyiyjil. 15Akeju cabe c'loj tuc' mij cyiyjil aj Israel lu ma cyc'am cyetzbil tuj tumlal tjawitz k'ij te nima Jordán, aju tx'otx' tcubsa'n tumlal twitz Jericó. 16Tzaj yolin Kman tuc'il Moisés ex tma: 17Akeju che bel sipante tx'otx' cyxole, atzun ke jlu: Pal Eleazar ex Josué aju tcy'ajal Nun. 18Ax icx c'oquel cyk'o'ne jun nejenel cye teyle junjun c'loj cyiyjil aj Israel, tu'n tcub sipet tx'otx', 19ex atzun cybi ke xinak lu: Ti'j tiyjil Judá: Atzun Caleb aju tcy'ajal Jefone. 20Ti'j tiyjil Simeón: Atzun Semuel aju tcy'ajal Amiud. 21Ti'j tiyjil Benjamín: Atzun Elidad aju tcy'ajal Quislón. 22Ti'j tiyjil Dan: Atzun Buqui, aju toc te nejenel, aju tcy'ajal Jogli. 23Cyi'j ke cyiyjil cabe tcy'ajal José: Atzun Haniel aju tcy'ajal Efod toc te nejenel cye tiyjil Manasés; 24atzunte Kemuel aju tcy'ajal Siftán toc te nejenel cye tiyjil Efraín. 25Ti'j tiyjil Zabulón: Atzun Elizafán toc te nejenel aju tcy'ajal Parnac. 26Ti'j tiyjil Isacar: Atzun Paltiel toc te nejenel aju tcy'ajal Azán. 27Ti'j tiyjil Aser: Atzun Ahiud toc te nejenel aju tcy'ajal Selomi. 28Ti'j tiyjil Neftalí: Atzun Pedael toc te nejenel aju tcy'ajal Amiud. 29Cyetzun ke jlu xi tma'n Kman tu'n tcub sipet tx'otx' Canaán cyxol aj Israel.

will be added

X\