NÚMEROS 32

1Ke tiyjil Rubén ex ke tiyjil Gad attok nimxix cyalun. Tej cyque'yinte aju tx'otx' Jazer tuc'ix tx'otx' Galaad puro tbanilxix ke lugar lu te almibil alumaj, 2e je'xtzun tuc'il Moisés, tuc'il pal Eleazar ex cyuc'il ke nejenel cye tnam xjal ex xi cyma'n cye cyja': 3—Akeju tx'otx' Atarot, Dibón, Jazer, Nimra, Hesbón, Eleale, Sebam, Nebo ex Beón, 4akeju ma cub cyi'j tu'n Kman tu'n cyoc te cye aj Israel, ba'n ke tx'otx' lu te cywabl alumaj. Ic tza'n keye, ako'ye ajbel teya, at kalune. 5Ka ba'n tuj twitza, k'ontza tx'otx' lu te keye, ex mi'n ko ic'x ti'na jlajxi nima Jordán. 6Atzunte Moisés xi ttzak'we'n: —¿Maj cyajtzun cyeye tu'n cycyaj tene tzalu ex atzun cye mastl cyermaniye che xe'l tuj k'oj? 7¿Tiku'n cyajbile tu'n ttzaj baj cyc'u'j aj Israel tu'n mi'n cyic'x tuj tx'otx' o tzaj tk'o'n Kman cye? 8Axtzun jlu cybincha cymane tej cytzaj nsama'ne que'yilte tx'otx' max tuj Cades-barnea. 9E pon max ttzi tk'ab xak Escol ex baj cyque'yin tx'otx', ex te tibajxi e oc ten xobtzal cyc'u'j aj Israel tu'ntzun mi'n cyocx tuj tx'otx' otok tzaj tk'o'n Kman cye. 10Cyja'tzun tzaj tk'oj Kman cyi'j tu'n jlu ex tzaj tma'n jun yol axix toc cyja': 11Cycyakil xinak otok japun winkin abk'i cyu'n tej cyetz tuj Ejipt, mlay cyil aju tx'otx' xi ntziyane te Abraham, te Isaac ex te Jacob, porque minti' e oc lpe' wi'je tu'n tcyakil cyanmi. 12O'cx te Caleb aju tcy'ajal Jefone aju aj Cenesey, tuc'ix Josué aju tcy'ajal Nun, e oc lpe' ti'j Kman tu'n tcyakil cyanmi. 13Cyja'tzun tzaj tk'oj Kman cyi'j aj Israel ex tbincha nok tu'n cybetje' 40 abk'i tuj lugar tzkij tx'otx', tejxi cybaj cyim cycyakil keju otok cybincha mya ba'n twitz. 14Atzun ja'lo akeye cycy'ajal ke mambaj aj il ke, akeye ma che cyaj tene te t-xel cymane cyajbile tu'n ttzaj juntl maj tk'oj Kman cyi'j aj Israel. 15Katzun mi'n cyajbile tu'n cyoc lpe'ye ti'j Kman, che cyjel coline juntl maj tu'n tuj tzkij tx'otx', ex akeye at cyile cyi'j oc cynaj, chi Moisés xi tma'n. 16E pon lak'e'tl twitz Moisés ex xi cyma'n te: —Aju keye kajbil, tu'n tjaw kbincha'ne cype'n kẍne'le ex cype'n kwacẍe ex ke tnam te cye kxu'jile ex kc'wa'le. 17Te tibajxi jlu ko xe'le tuc'il kmacbile in che ajben tuj k'oj, tu'n kcub neje cywitz mastl aj Israel, max ocxi cyocx kk'o'ne tuj cytx'otx'. Atzun ke kxu'jile ex kc'wa'le che cyjel ten cyuj ke tnam tocsa'n muro cyi'j, ex jacu che clet cywitz keju najl tuj tx'otx' lu. 18Mlay ko ajtz meltz'aje kjaye ka na'nxtok cyc'monte cycyakil aj Israel cytx'otx'. 19Porque aju tx'otx' c'oquel te keye, atzun aju ta' jlajtzi tumlal tjawitz k'ij te nima Jordán, ex mlay txi kkanintle mastl tx'otx' taj jlajxi nima, che chi. 20Xitzun ttzak'we'n Moisés: —Ka ax toc ma japun cyyole, ex ka ma txi cyi'ne cymacbile tu'n cyxi'ye tuj k'oj ic tza'nx tajbil Kman, 21ex ka cycyakile che ic'xe tuj nima Jordán banin cytene tu'n cyk'ojine ic tza'nx tajbil Kman, ex ax tu'n cycyaj tene ma chixin ocxi cyex tlajo'n Kman ke aj k'oje cyi'je, 22ocxi tcambet tx'otx' tu'n Kman, ba'n tu'n cyajtz meltz'aje, ex tzokpi'ntltzun keye ti'j ju ma cymaye twitz Kman ex cywitz aj Israel; ex aju tx'otx' lu c'oquel te cyeye nok tu'n Kman. 23Katzun mi'n ma cybinchaye icju, tu'n jlu che binchale il twitz Kman, ex axix toc cpol jun k'ij ctzajel cycastiwoye ti'j il lu. 24Cybinchan jawe tnam tu'n cycyaj ten cyxu'jile ex cyc'wa'le cyuj, ex cybinchan jawe cype'n cyẍne'le, pero japunx cyu'ne aju ma txi cytziyane, chi Moisés. 25Atzun cye tiyjil Gad ex tiyjil Rubén xi cytzak'we'n: —Cbantel ku'ne aju ma tmaya keye, ako'ye ajbel teya. 26Ke kxu'jile ex ke kc'wa'le, cyuc'ix kwacẍe ex cycyakil kalune, ax che cyjel ten tzalu cyuj ke tnam te Galaad, 27atzun keye, ako'ye ajbel teya, cbantel ktene tu'n kxi'ye tuj k'oj ic tza'nx tajbil Kman, ex ic tza'nx ma tzaj tma'na keye, che chi te Moisés. 28Atzunte Moisés cyaj tma'n te pal Eleazar, te Josué aju tcy'ajal Nun, ex cye ke nejenel cye cycyakil c'loj cyiyjil aj Israel, alcye tu'n cybinchante cyi'j tiyjil Gad ex cyi'j tiyjil Rubén, 29ex tma cyja': —Ka cycyakil xinak tiyjil Gad ex tiyjil Rubén che ic'x cyuc'ile tuj nima Jordán, banin cyten tu'n cyk'ojin ic tza'nx tajbil Kman, ocxi ttzyet tx'otx' cyu'ne, ba'ntzun tu'n t-xi cyk'o'ne tx'otx' Galaad tu'n toc te cyetzbil. 30Katzun mi'n ma che ic'x banin cyten tu'n cyk'ojin, axtzun c'elel cytx'otx' ti'j cyeye tuj tx'otx' Canaán, chi Moisés. 31Atzun cye tiyjil Gad ex tiyjil Rubén xi cytzak'we'n: —Cbantel ku'ne aju ma tma Kman keye, ako'ye ajbel teya. 32Ko ic'xe banin ktene tu'n kk'ojine tuj tx'otx' Canaán ic tza'nx tajbil Kman, pero aju tx'otx' tcubsa'n tuj tjawitz k'ij te nima Jordán c'oquel te ketzbile, che chi. 33Cyja'tzun tten xi tk'o'n Moisés aju ttx'otx' Sehón, aju otok ten te rey cye aj Amorrey, te cye tiyjil Gad ex cye tiyjil Rubén, tuc'ix cye mij tiyjil Manasés aju tcy'ajal José. Ax icx xi tk'o'n ttx'otx' Og cye, aju otok ten te rey cye aj Basán, cyuc'ix ke tnam ate'tok cyuj ex ke cojbil ate'tok cyi'jele. 34Jawtzun cybincha'n juntl maj tiyjil Gad ke tnam lu: Dibón, Atarot, Aroer, 35Atarot-sofán, Jazer, Jogbeha, 36Bet-nimra ex Bet-arán, ex oc cyk'o'n muro cyi'jele; ax icx baj cybincha'n cype'n cyẍne'l. 37Atzun ke tiyjil Rubén jaw cybincha'n juntl maj ke tnam Hesbón, Eleale, Quiriataim, 38Nebo ex Baal-meón; baj cych'expu'n cybi tnam lu ex oc cyk'o'n cybi ac'aj; ax icx jaw cybincha'n juntl maj tnam Sibma. 39Ke tiyjil Maquir aju tcy'ajal Manasés, e je'x tuj tx'otx' Galaad, tzyet cyu'n ex e je'x cylajo'n ke aj Amorrey ate'tok tuj. 40Xitzun tk'o'n Moisés tx'otx' Galaad cye ke tiyjil Maquir aju tcy'ajal Manasés, ex axtzun e cub ten najal tuj. 41Ax icx te Jair aju tiyjil Manasés, tzyet ela' aldey cye aj Amorrey tu'n, ex oc tk'o'n cybi Havot-jair. 42Atzunte Noba, tzyet tnam Kenat tu'n cyuc'ix ke aldey ate' ti'jele, ex oc tk'o'n tbi tnam lu Noba ic tza'nx te tbi.

will be added

X\