NÚMEROS 31

1Tzaj yolin Kman tuc'il Moisés ex tma: 2K'on aja t-xel cyi'j aj Madián ti'j ju ma cybincha cyi'j aj Israel, ex te tibajxi jlu cymela. 3Xitzun tma'n Moisés cye tnam xjal cyja': Cyi'ntz cymacbile junjun cyeye, akeju in che ajben tuj k'oj, cyxi'ye ex e cyoc tzokpaje cyi'j aj Madián, tu'ntzun t-xelin cyi'j tu'n Kman. 4Teyle junjun c'loj cyiyjil aj Israel ba'n tu'n t-xi t-sama'n jun mil xinak tuj k'oj, chi Moisés. 5Cyja'tzun e jaw sc'et jun mil soldad cyxol teyle junjun c'loj cyiyjil aj Israel; japun cablaj mil cybet, ex k'i'mlex cymacbil tu'n cyxi' tuj k'oj. 6E je'xtzun sama'n tu'n Moisés tu'n cyxi' tuj k'oj junx tuc'il Finees aju tcy'ajal pal Eleazar, ex atzun te xi k'inte ke macbil xjan, cyuc'ix ke chun, tu'ntzun cyoc k'ajtzet oc ttzyet k'oj. 7E octzun ten k'ojlel cyi'j aj Madián ic tza'n otok tma Kman te Moisés, ex e cub cybyo'n cycyakil xinak aj Madián. 8Ax icx cub cybyo'n aj Israel jwe' rey cye aj Madián, ex atzun ke jlu: Evi, Requem, Zur, Hur ex Reba. Ax icx cub byo'n Balaam cyu'n, aju tcy'ajal Beor. 9E tzajtzun k'i'n ke xu'j aj Madián cyu'n aj Israel, cyuc'ix ke tal c'wa'l, ex ke cyẍne'l, ke cywacẍ ex tcyakil cyk'inumabl. 10Ax icx cub cypatun cycyakil cytanmi aj Madián ex cycyakil aldey. 11Ex tcyakilju otok tz'el cyi'n, tza'nx ke xjal ex ke alumaj, 12xi cyi'n tuc'il Moisés, tuc'il pal Eleazar ex cyuc'il tnam xjal aj Israel, tuj campament tuj tchk'ajlajil tx'otx' Moab ttzi nima Jordán, tumlal twitz tnam Jericó. 13Atzunte Moisés tuc'ix pal Eleazar ex cycyakil nejenel cye tnam xjal, e je'tz canul cyi'j ti'jxi campament. 14Pero tzaj tk'oj Moisés cyi'j ke nejenel cye jun milchak ex jun syentchak soldad otok che'x aj tuj k'oj, 15ex xi tma'n cye cyja': —¿Tiku'n minti' ma che cub cybyo'ne ke xu'j? 16Cyu'nlpe ke xu'j lu jaw cyi'n cyib aj Israel ti'j Kman ex e c'ulun twitz tilbilal Baal-peor, nok tu'n tconsej Balaam. Cyja'tzun tzaj t-sama'n Kman tx'u'j yabil tibaj tnam etzan tu'n. 17Ja'lo cybyon cube cycyakil tal k'a ex cycyakil xu'j o cyilxi xinak. 18Atzun ke txin na'nx cylonte xinak, ba'n tu'n cycyaj ank'in ex tu'n cycyaj ten cyuc'ile. 19Ex cycyakil keju ma che cub byonte jun xjal ex ka ma tz'oc tmaco'n t-ximlal jun cyimni, il ti'j tu'n cycyaj ten wuk k'ij ti'jxi campament. Tuj toxin k'ij ex tuj twukin, cysaksan baj cyibe, tza'nxix akeye ax icx keju ma che tzaj cyi'ne pres. 20Ax icx cysaksan baje cycyakil xbalun, cycyakil macbil tz'u'm, cycyakil xbalun ttzmal chip ex ke macbil tze', chi Moisés cye. 21Atzunte pal Eleazar xi tma'n cye cycyakil soldad otok che'x aj tuj k'oj: —Atzun ley lu tzaj tma'n Kman te Moisés: 22Ke macbil k'an pwak, sak pwak, k'an c'uxbil, c'uxbil, c'uxbil estaño ex plom, 23cycyakil keju mlay che naj tu'n k'ak', il ti'j tu'n cysakset tu'n k'ak', ex te tibajxi tu'n cybaj tx'jet tu'n a' te saksabl; atzun keju in che naj tu'n k'ak', ba'n tu'n cysakset o'cx tu'n a'. 24Tujtzun twukin k'ij il ti'j tu'n tbaj cytx'jo'ne cyxbalune, ex che sakseteltzune. Te tibajxi, ba'ntzun tu'n cyocxe tuj campament. 25Tzaj tma'n Kman te Moisés: 26Aya tuc'ix pal Eleazar ex ke nejenel cye junjun c'loj cyiyjil aj Israel, cyajlan cube jte' xjal ex jte' alumaj ma tz'el cyi'n soldad tuj k'oj; 27te cabe tz'el tu'na, ex sipanxa mij cye soldad ma che'x aj tuj k'oj, ex atzun mijtl sipanxa cyxol tnam xjal minti' ma che'x aj tuj k'oj. 28Ti'j mij cbel t-sipana cyxol soldad, k'i'n ela ch'in weye, tza'nx cyi'j xjal ax icx cyi'j wacẍ, bur ex ẍne'l. Jun c'elel ti'na ti'j jwe' syentchak, 29ex cxel tk'o'na te pal Eleazar ic tza'n jun oyaj te weye. 30Ax icx cyi'j mijtl cbel t-sipana cyxol mastl aj Israel, tza'nx cyi'j xjal ax icx cyi'j wacẍ, bur ex ẍne'l, ex ka cyi'j cycyakil alumaj, k'i'n ela ch'in cyi'j, jun cyi'j sincwentchak, ex cxel tk'o'na cye aj Leví, akeju in che cwentin ti'j njaye, chi Kman. 31Atzunte Moisés ex Eleazar o cybincha ic tza'nx otok tma Kman te Moisés. 32Tcyakilju otok tz'el k'i'n cye aj k'oj ex minti' e oc te tajlal aju cye soldad otok baj cyu'n, japun tajlal te 675,000 ẍne'l, 33ex 72,000 wacẍ, 34ex 61,000 bur, 35ex 32,000 k'apoj na'nxtok tcyil xinak. 36Aju mij xi k'o'n cye soldad, japun jun tajlal te 337,500 ẍne'l, 37ex aju xi k'ot te Kman, japun jun tajlal te 675 ẍne'l, 38ex ti'j 36,000 wacẍ, xi k'ot 72 te Kman, 39ex ti'j 30,500 bur, xi k'ot 61 te Kman, 40ex ti'j 16,000 k'apoj, xi k'ot 32 te Kman. 41Aju xi k'ot te Kman, xi tk'o'n Moisés te pal Eleazar ic tza'nx otok tma Kman te Moisés. 42Atzun mijtl el tpa'n Moisés ti'j ju xi tk'o'n cye soldad otok che'x aj tuj k'oj, xi tk'o'n cye mastl aj Israel, 43ex ax tajlal o japun cyja': 337,500 ẍne'l, 44ex 36,000 wacẍ, 45ex 30,500 bur, 46ex 16,000 k'apoj na'nxtok tcyil xinak. 47Ti'jtzun mij lu el ti'n Moisés jun ti'j sincwentchak, tza'nx cyi'j xjal ax icx ke alumaj, ex xi tk'o'n cye aj Leví, akeju in che ajbentok tuj tja Kman, ic tza'nx otok tma Kman te. 48Atzun cye nejenel cye jun milchak ex jun syentchak soldad e pon tuc'il Moisés, 49ex xi cyma'n te: Ma jaw jun tajlal ku'ne, ako'ye ajbel teya, cyi'j ke soldad e ten tuj kcwente, ex minti' jun atx taj. 50Cyja'tzun ma tzaj ki'ne ke ti'xti k'an pwak ma che cnet ku'ne: Lu ke tkul k'abaj, ke caden in che cub ten tkul k'abaj, ke xmulk'abaj, ke tuj ẍcyinbaj, ex txkantl adorn, ma tzaj ki'ne te oyaj te Kman, tu'ntzun tcub tnajsa'n kpaltile, che chi ke nejenel cye soldad. 51Atzunte Moisés tuc'ix pal Eleazar xi cyc'mo'n tcyakil ti'xti k'an pwak lu toc tilbilal cyi'j. 52Aju k'an pwak xi k'o'n te oyaj te Kman cyu'n ke nejenel cye jun milchak ex jun syentchak soldad, mas te cyaje quintal el talil. 53Teyle junjun soldad otok tzaj ti'n ch'in ti'xti cyi'j aj k'oj tu'n tajben te cye. 54Xitzun cyc'mo'n Moisés ex pal Eleazar aju k'an pwak pon cyi'n ke nejenel cye soldad, ex xi cyi'n tuj ja xbalun te mojbabl tibil tu'ntzun cytzaj na'n aj Israel tu'n Kman.

will be added

X\