NÚMEROS 29

1Tuj tnejel k'ij te twukin xjaw c'oquel jun buyj tibil xjan cyu'ne. Mi jun ba'n tu'n tak'nan tuj k'ij lu. Atzun k'ij tu'n cyoc k'ajtzet ke chun. 2Tujx k'ij lu cbel cypatune jun tal tor, jun tman ẍne'l ex wuk tal tman ẍne'l ma te jun abk'i ke, te jun oyaj at tc'oc'jal in chin tzalaje ti'j, ex cycyakil ke jlu minti' cypaltil. 3Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j tal tor kak libr, ti'j tman ẍne'l cyaje libr, 4ex ti'j junjun tal tman ẍne'l cabe libr. 5Ax icx ctzajel cyk'o'ne jun tman chip te chojbil cyile, 6ex part ke oyaj in che cub patit teyle junjun xjaw, ex part ke chojbil in che cub patit tcyakil k'ij, tuc'ix oyaj ti'j twitz awal ex ta'l twitz uva in xi k'ot cyi'j ic tza'nx in tma'n ley. Tcyakil jlu jun oyaj te weye patun in cub at tc'oc'jal in chin tzalaje ti'j. 7Tuj laj tajlal tex twukin xjaw ax icx c'oquel jun buyj tibil xjan cyu'ne. Tuj k'ij lu cbel cyyo'ne we'yaj, ex mi jun ba'n tu'n tak'nan. 8Cbel cypatune jun tal tor, jun tman ẍne'l, ex wuk tal tman ẍne'l ma te jun abk'i ke, te jun oyaj at tc'oc'jal in chin tzalaje ti'j, ex cycyakil ke jlu minti' cypaltil. 9Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j tal tor kak libr, ti'j tman ẍne'l cyaje libr, 10ex ti'j junjun tal tman ẍne'l cabe libr. 11Ax icx ctzajel cyk'o'ne jun tman chip te chojbil cyile, ex part ke chojbil ctzajel cyk'o'ne tu'n tnajset cyile tuj k'ij te najsbil il, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 12Tuj olaj tajlal twukin xjaw c'oquel jun buyj tibil xjan cyu'ne. Mi jun ba'n tu'n tak'nan tuj k'ij lu. Wuk k'ij cbel cyic'sa'ne nink'ij te nimbil weye. 13Tuj tnejel k'ij ctzajel cyk'o'ne weye oxlaj tal tor, cabe tman ẍne'l, ex cyajlaj tal tman ẍne'l ma te jun abk'i ke, te chojbil patun in cub at tc'oc'jal in chin tzalaje ti'j. Cycyakil ke jlu minti' cypaltil. 14Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j junjun tal tor kak libr, ti'j junjun tman ẍne'l cyaje libr, 15ex ti'j junjun tal tman ẍne'l cabe libr. 16Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 17Tuj tcabin k'ij ctzajel cyk'o'ne cablaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 18Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 19Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 20Tuj toxin k'ij ctzajel cyk'one junlaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 21Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 22Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 23Tuj tcyajin k'ij ctzajel cyk'o'ne laj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 24Ax icx ctzajel cyk'o'ne ke oyaj twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'n in tma'n ley. 25Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 26Tuj tjwe'yin k'ij ctzajel cyk'o'ne belaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 27Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 28Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 29Tuj tkakin k'ij ctzajel cyk'o'ne wajxak tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 30Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 31Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 32Tuj twukin k'ij ctzajel cyk'o'ne wuk tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil. 33Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 34Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 35Tuj twajxakin k'ij c'oquel jun buyj tibil xjan cyu'ne. Mi jun ba'n tak'nan tuj k'ij lu. 36Ctzajel cyk'o'ne weye jun tal tor, jun tman ẍne'l, ex wuk tal tman ẍne'l ma te jun abk'i ke, te jun chojbil patun in cub at tc'oc'jal in chin tzalaje ti'j, ex cycyakil ke jlu minti' cypaltil. 37Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley. 38Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j. 39Atzun ke chojbil lu ctzajel cyk'o'ne weye cyuj ke nink'ij banimaj cyi'j, ex part cyoyaje ctzajel cyk'o'ne oc tjapun jun cyyole otok tzaj cytziyane weye, ex ke cyoyaje tu'n cyexe cygan ctzajel cyk'o'ne; ka jun chojbil patun in cub, ka jun oyaj ti'j twitz awal, ka jun oyaj ti'j ta'l twitz uva, ex ka jun oyaj te mojbabl tibil, chi Kman te Moisés. 40Atzunte Moisés xi tma'n cye aj Israel tcyakil aju otok tma Kman te.

will be added

X\