NÚMEROS 27

1Cyxol ke tiyjil Manasés attok jwe' xu'j cyerman cyib, ex atzun cybi jlu: Maala, Noa, Hogla, Milca ex Tirsa. Ake jlu tme'jel Zelofehad aju tcy'ajal Hefer, atzunte Hefer tcy'ajal Galaad, atzunte Galaad tcy'ajal Maquir, atzunte Maquir tcy'ajal Manasés ex atzunte Manasés tcy'ajal José. 2E je'x ke xu'j lu ttzi ja xbalun te mojbabl tibil tu'n cyyolin tuc'il Moisés, tuc'il pal Eleazar ex cyuc'il ke nejenel cye tnam xjal, ex xi cyma'n cye cyja': 3Aju kmane cyim tuj tzkij tx'otx', pero mya ajun oc tk'on tib cyuc'il jun c'loj xjal e je'x lpe' ti'j Coré, akeju jaw cyi'n cyib ti'j Kman. O cyim te, pero tu'n tex til, ex minti' jun tcy'ajal tzaj. 4Pero mya tuj tumel tu'n tnaj tbi ktzan kmane cyxol txkantl c'loj tiyjil nok tu'nju minti' jun tcy'ajal o tzaj. Cyk'ontze jun piẍ tx'otx' keye cyxol terman ktzan kmane, che chi xu'j lu. 5Atzunte Moisés xi tkanin te Kman alcye tu'n tbant tu'n ti'j jlu. 6Tzajtzun ttzak'we'n Kman te Moisés cyja': 7Tuj tumelxix ta' aju in cyma'n ke tme'jel Zelofehad. K'onxa jun piẍ cytx'otx' cyxol ke terman ktzan cyman, ex k'onxtzuna tetzbil ktzan cyman cye. 8K'manxa cye aj Israel cyja': Oc tcyim jun cye ex ka minti' jun tcy'ajal otok tzaj, tetzun tme'jel cxel k'ot tetzbil; 9katzun minti' jun tme'jel, cyetzun terman cxel k'ot tetzbil; 10katzun minti' jun terman, cyetzun terman tman cxel k'ot tetzbil, 11ex katzun minti' jun terman tman, tetzun jun xjal mas at t-xilen tuc'il cxel k'ot tetzbil. A jlu jun ley cyjel ten cye aj Israel, ic tza'nx ma txi nma'ne teya, chi Kman te Moisés. 12Tzaj tma'n Kman te Moisés cyja': —Tjaxa twi witz Abarim, ex que'yinxa aju tx'otx' cxel nk'o'ne cye aj Israel. 13Tbajlenxitzun tque'yina tx'otx', cymeltzuna ex cpola cyuc'il ktzan tchmana ic tza'n ktzan ttzica Aarón, 14tu'nju cycabile e ic'e tibaj nyole xi nma'ne cyeye tuj tzkij tx'otx' Zin, tej cyoc ten tnam xjal yolil mya ba'n wi'je, ex minti' inx cynimane cywitz xjal tej cyoc ten kanil cyc'a a', chi Dios. Atzun o baj jlu ttxlaj twi a' Meriba tuj Cades tuj tzkij tx'otx' Zin. 15Xitzun tma'n Moisés te Kman: 16—Nman Dios, aya in tzaj k'onte cychwinklal cycyakil xjal; ja'lo sc'o'n jawa juntl nejenel cye tnam xjal etzan tu'na, tu'n tcub nej cywitz 17oc cyex tuj k'oj ex oc cyajtz meltz'aj, ex tu'n toc te ẍaklul cye nok jatum tu'n cyxi', tu'ntzun mi'n cyoc ic tza'n ẍne'l minti' pastor cyi'j, chi Moisés. 18Atzunte Kman tzaj ttzak'we'n te Moisés: —K'intza Josué aju tcy'ajal Nun, aju xinak lu at nim tnabl wu'ne; k'o'n cuba tk'aba tibaj, 19k'oncuya twitz pal Eleazar ex cywitz cycyakil tnam xjal, k'onxa toclen cywitz cycyakil xjal 20ex k'onx mij toclena te, tu'ntzun t-xi cyniman cycyakil tnam xjal aj Israel. 21Pero il ti'j tu'n t-xi' Josué tuc'il pal Eleazar, tu'ntzun ttzaj tkanin Eleazar weye tu'n Urim alcye tu'n tbant. Te tibajxi, atzunte Josué cxel k'mante cye cycyakil xjal alcye cbantel cyu'n, chi Kman. 22Tbinchatzun Moisés ic tza'nx otok tzaj tma'n Kman te. Tzaj k'i'n Josué tu'n Moisés ex cub tk'o'n twitz pal Eleazar ex cywitz cycyakil tnam xjal, 23cubtzun tk'o'n tk'ab Moisés tibaj, ex xi tk'o'n toclen ic tza'nx otok tma Kman te.

will be added

X\