NÚMEROS 25

1Tej cyten aj Israel tuj lugar Sitim, e oc ten ke xinak yaẍil cyuc'il ke xu'j aj Moab, 2atzun ke xu'j lu e je'x txconte cye tu'n cyxi' cyuc'il oc t-xi cyk'o'n chojbil cye cydios. Atzun cye aj Israel ajun ke e wa'n ti'j ju wabj lu, ex e oc ten c'ulul cywitz cydios aj Moab; 3cyja'tzun tten e oc ten aj Israel c'ulul twitz tilbilal Baal-peor. Tzaj nimxix ttx'u'jil Kman cyi'j aj Israel, 4ex xi tma'n te Moisés cyja': —Chmon oca cycyakil nejenel cye tnam xjal, ex che tyoban jawa ke cywitz cycyakil xjal, tu'ntzun tchewix nk'oje cyi'j aj Israel, chi Kman. 5Xitzun tma'n Moisés cye keju cyoc te jwes cyxol aj Israel: —Teyle junjun cyeye ba'n tu'n tcub cybyo'ne ke xinak ax cyiyjile, akeju ma che oc lpe' tu'n cyc'ulun twitz tilbilal Baal-peor. 6At jun aj Israel pon ti'n jun xu'j aj Madián max tja, ex twitz Moisés ex cywitz cycyakil aj Israel tbincha jlu, tej matok in che ok' aj Israel ttzi ja xbalun te mojbabl tibil. 7Atzunte Finees aju tcy'ajal Eleazar ex tal tchman pal Aarón, tej ttil jlu jaw we' cyxol aj Israel, xi ti'n jun lans, 8ex xi lpe' ti'j xinak aj Israel tejxi tpon max tuj tja. Atzun xi t-xayu'n lans tuj cyc'u'j, tza'nx te xinak aj Israel, ax icx te xu'j aj Madián. Cyja'tzun tten o we' tx'u'j yabil, aju in che naj aj Israel tu'n, 9pero otok che cyimxe 24,000 aj Israel. 10Tzajtzun yolin Kman tuc'il Moisés ex tma: 11—Tu'n Finees ma chewix nk'oje cyi'j aj Israel, porque icx te tmod ic tza'n weye, minti' in cub tuj twitz tu'n cyc'ulun aj Israel twitz junxitl dios. Tu'ntzun jlu ma we' nk'oje cyi'j aj Israel. 12Cyja'tzun k'manxa te Finees: Cyjel bant ti'j jun nyole te tzalajbil tuc'il. 13Te jumajx cxel nk'o'ne te ex cye tiyjil aju oclenj te pal, porque ma tzaj ta'w tuj tanmi tu'n tlaj mya ba'n in cybincha'n xjal nwitze; ex tu'nju ba'n ma tbincha, ma cub nnajsa'ne cyil aj Israel, chi Kman. 14Zimri tbi aju xinak aj Israel xi xayu'n lans tuj tc'u'j junx tuc'il xu'j aj Madián; tcy'ajal Salu jlu ex atok toc te nejenel cye jun c'loj tiyjil Simeón. 15Atzunju xu'j aj Madián Cozbi tbi ex tme'jel Zur, aju nejenel cye jun c'loj cyiyjil aj Madián. 16Tzaj yolin Kman tuc'il Moisés ex tma: 17—Cyoc tzokpaje cyi'j aj Madián ex cybyon cube ke, 18tu'nju o cyajbe tu'n tcub cyi'je cyu'n tu'n sbubl, ex o cybincha tu'n cyc'ulune twitz tilbilal Baal-peor, ic tza'n o tbincha Cozbi aju tme'jel jun nejenel cye aj Madián, aju cyim tu'n lans tej ttzaj nsama'ne tx'u'j yabil cyibaj aj Israel tu'n tlaj e c'ulun twitz tilbilal Baal-peor, chi Kman.

will be added

X\