NÚMEROS 24

1Tej otok tz'el tnic' Balaam ti'j ka ba'n otok tz'ela tuj twitz Kman tu'n cycub cy'iwlet aj Israel, ya minti' oc ten k'ijal ic tza'n otok tbincha junjun maj, nok o'cx cyja' xi tque'yin tumlal tzkij tx'otx'. 2Tej ttil Balaam ke aj Israel tuj c'lojintok cyten ic tza'nx cyiyjil, ul T-xew Dios tuc'il, 3ex xi tma'n Balaam ke yol lu: Atzun tkanil jlu tu'n Balaam aju tcy'ajal Beor, aju xinak nne'l tnic' ti'j tcyakil, 4aju in tbi'n tkanil in tzaj tma'n Dios te, in cub tz'ak twitz tx'otx' ex in til aju in tzaj tyec'un Dios te, aju at tipumal tu'n tbant tcyakil tu'n, ex nne'l tnic' ti'j. 5Akeye tiyjil Jacob, tbanilxix che que'yin ke cyjaye, xbalun ja; tbanilxix che que'yin cynajbile, akeye aj Israel. 6Ic che que'yin ic tza'n ke chk'ajlaj matij, ic tza'n cykan awal ttzi nima, ic tza'n cykan áloes awa'n tu'n Kman, ex ka ic tza'n cykan wi'ten ttzi a'. 7Ctel nim a' te cyc'a aj Israel ex te a'lbil cyawal, mas nim tipumal cyrey ctel ic tza'n te Agag, ex c'oquel tcawbil te ma'xix. 8Ate Dios etz k'inte cye tuj Ejipt; at nim cyipun ic tza'n wacẍ te tjak' c'ul. Che najel ke nasyon cyu'n akeju in che k'ojin cyi'j. Che najel aj k'oj cyu'n aj Israel, cbajel cytokin cybakil ex che bajel cyc'ixbisa'n tu'n plech. 9Ic cyten aj Israel ic tza'n jun balun ex ic tza'n jun ttxu balun oc tcub tan, mi a'l jun ba'n tjaw c'asunte te. Akeye aj Israel, cy'iwla'nxwit aju cbel cy'iwlante cyeye, ex tzajxwit mya ba'n cyibaj keju in che kanin mya ba'n cyibaje, chi Balaam. 10Tejtzun tbinte Balac jlu, tzaj nim tk'oj ti'j Balaam, oc ten tz'ajil tk'ab tu'n tk'oj ex tma: —Ma tzaj ntxco'na tu'n t-xi tkanina mya ba'n cyibaj wajk'oje, atzun ja'lo ma bant-xi ox maj ma che cub tcy'iwla'na. 11Taja tjaya; nej otok txi ntziyane teya tu'n t-xi nk'o'ne nimbil teya, pero minti' ma tak' Dios ambil tu'n t-xi nk'o'ne nimbil teya, chi Balac. 12Atzunte Balaam xi ttzak'we'n: —Bi'x xi nma'ne cye t-sanjela akeju e pon t-sama'na wuc'ile, nchiye cyja': 13masque tzaj tk'o'n Balac tcyakil k'an pwak ex sak pwak at tuj tja, mlay bant tu'n wic'e tibaj yol ctzajel tma'n Kman weye, misicyer tu'n nbinchanteye jun ba'n ex ka mya ba'n wu'nx wibe; nok o'cx tu'n t-xi nma'ne aju tzul tma'n Kman weye. 14Weye chin ajele tuj ntanmiye, pero na'nxtok waje, cxel nma'ne teya aju cbantel cyu'n tnam xjal lu cyi'j ke ttanmila tuj tk'ijlalil tzul. 15Octzun ten Balaam k'malte ju yol tzaj k'ma'n te tu'n Dios, chi cyja': Atzun tkanil jlu tu'n Balaam aju tcy'ajal Beor, aju xinak nne'l tnic' ti'j tcyakil, 16aju in tbi'n tkanil in tzaj tma'n Dios te, ex ojtzki'n tu'n aju ba'n tu'n Dios ma' t-xilen; in cub tz'ak twitz tx'otx' ex in til aju in tzaj tyec'un Dios te, aju Tajaw Tcyakil, ex nne'l tnic' ti'j. 17Nne'l ch'in nnic'e ti'j aju cbajel tuj tk'ijlalil tzul, at jun in xi nque'yine, pero najchak ta'. At jun che'w cjawil jlet cyxol tiyjil Jacob, jun rey cjawil jlet cyxol aj Israel. Cbel tpach'u'n cywi' aj Moab ex che najel cycyakil tiyjil Set tu'n. 18Cbel ti'j Edom tu'n, ex c'elel cytx'otx' aj Seir tu'n, aju aj k'oj ti'j. Atzun tnam Israel c'oquel nimxix tipun. 19Cjawil jlet jun nejenel cyxol tiyjil Jacob ex che najel tu'n akeju otok che cyaj ten tuj tnam, chi Balaam. 20Ex o til Balaam aju tnam Amalec, ex xi tma'n aju yol tzaj k'ma'n te tu'n Dios, chi cyja': Ate Amalec jun tnam mas ma' toclen cywitz cycyakil mastl tnam, pero aju bajsbil te, cbel xitj te jumajx. 21Ax icx o til ke aj Ceney, ex xi tma'n aju yol tzaj k'ma'n te tu'n Dios, chi cyja': Akeye aj Ceney, masque cyuwxix tten cyjaye, masque tocx cyjaye tuj pic, 22pero il ti'j che bajel xitj, ex che xel k'i'ne pres cyu'n aj Asiria. 23Ax icx xi tma'n juntl yol tzaj k'ma'n te tu'n Dios: Ay ¿alcye jun cyjel ank'in oc tbant jlu tu'n Dios? 24Che tzajel ke barc ttzi mar te Chipre, ex cbajel xitj cytanmi aj Asiria ex cytanmi aj Heber cyu'n, pero ax icx cye che najel te jumajx, chi Balaam. 25Tbajlenxi jlu, cubtzun be tu'n Balaam ex aj tja. Ax icx te Balac xi ti'n tbe.

will be added

X\