NÚMEROS 23

1Xitzun tma'n Balaam te Balac: —Binchan baja wuk altar te patbil chojbil, ex byoncuya wuk tal tor ex wuk tman ẍne'l. 2Banttzun tu'n Balac ic tza'nx otok tma Balaam, ex cub cypatun jun tal tor ex jun tman ẍne'l tibaj teyle junjun altar. 3Xi tma'n Balaam te Balac: —Tencja cytxlaj chojbil, atzun weye chin xe'le que'yilte ka ma tzaj Kman canul wi'je, ex jacutzun txi nma'ne teya aju tzul tyec'un weye. Xi'tzun Balaam twi' jun tz'la'j witz. 4Cub tyec'un tib Dios twitz Balaam, ex tma Balaam cyja': —Ma jaw nbincha'ne wuk altar ex ma cub npatune jun tal tor ex jun tman ẍne'l tibaj teyle junjun altar. 5Tzajtzun tma'n Kman te Balaam alcye tu'n t-xi tma'n ex tma: —Txi'ya jatum ta' Balac ex k'manxa te aju cxel nma'ne teya. 6Ul meltz'aj Balaam jatum ta'tok Balac, ex lu Balac wa'ltok cytxlaj ke chojbil, cyuc'ix cycyakil nejenel cye aj Moab. 7Xitzun tma'n Balaam aju yol lu: Max cywi witz tuj tjawitz k'ij ex max tuj Aram ma chin tzaj ti'n Balac aju rey cye aj Moab. Chitzun weye: Tzaja, kaninxa mya ba'n cyibaj aj Israel. Tzaj naja tu'n t-xi tkanina tu'n cynaj ke xjal tiyjil Jacob. 8Pero ¿tza'n tten tu'n t-xi nkanine mya ba'n cyibaj keju minti' in tzaj tk'o'n Dios mya ba'n cyibaj? ¿Tza'n tten tu'n t-xi nkanine tu'n cynaj keju minti' ma tzaj tma'n Dios tu'n cynaj? 9Max twi pic lu ma che wile, max cywi' ke tz'la'j witz lu ma che wile: Jun tnam xjal pa'maj, junxitl tmod ic tza'n txkantl xjal. 10Ic cyajlal ic tza'n tkukil tx'otx'; ¿alcye jun jacu bant tajlante tcyajin part cybet? Nokwit ba'n ncyime ic tza'n ke xjal tz'aklxix, ex icwit bajsbil weye ic tza'n cye aj Israel, chi Balaam baj tma'n. 11Xitzun tma'n Balac te Balaam: —¿Ti ma tbinchaya wi'je? Ma tzaj wi'ne tu'n t-xi tkanina mya ba'n cyibaj wajk'oje, atzun teya ma tz'oc tena cy'iwlalte cye. 12Atzunte Balaam xi ttzak'we'n: —¿Myapetzun bi'x xi nma'ne teya ka o'cx tu'n t-xi nma'ne aju ctzajel tma'n Kman weye? 13Xi tma'n juntl maj Balac: —Ko' wuc'ile tuj juntl lugar jatum o'cx ttxa'n tnam ctila'ya, ex mya tcyakil tnam ctila'ya. Kaninxa mya ba'n cyibaj max ma chixin. 14Xitzun k'i'n Balaam tu'n Balac tuj chk'ajlaj Zofim tuj tiwitz tx'otx' twi witz Pisga; atzun jaw tbincha'n wuktl altar, ex cub tpatun jun tal tor ex jun tman ẍne'l tibaj teyle junjun altar. 15Xi tma'n Balaam te Balac: —Tencja cytxlaj chojbil, atzun weye ma chinxe canul ti'j Dios ma chixin. 16Etztzun Kman canul ti'j Balaam ex tzaj tma'n te alcye yol tu'n t-xi tma'n, ex chi cyja': —Txi'ya jatum ta' Balac ex k'manxa te aju cxel nma'ne teya. 17Ul meltz'aj Balaam jatum ta'tok Balac wa'ltok cytxlaj ke chojbil, cyuc'ix ke nejenel cye aj Moab. Xi tkanin Balac te Balaam: —¿Alcye ma tma Kman teya? 18Xitzun tma'n Balaam cyja': Aya Balac tcy'ajal Zipor, we'cuya ex chin tbintza. 19Ate Dios mya ic tten ic tza'n jun xjal; minti' nnic'an yol ex misicyer in baj tch'expu'n t-ximbetz. Ka ma tma jun ti'xti tu'n tbant tu'n, in bant tu'n. Ka ma tzaj ttziyan jun yol, in japun tu'n. 20K'ma'maj weye tu'n cycub ncy'iwla'ne aj Israel. Ma che cub tcy'iwla'n Dios ex mlay bant tu'n tbaj nch'expu'ne. 21Minti' jun sbubl o ilwaj ti'j tiyjil Jacob ex mi jun mya ba'n o ilwaj cyi'j aj Israel. Ate Cyman aju Cydios at cyuc'il, ex toc cyu'n te cyrey. 22Ate Dios etz k'inte cye tuj Ejipt; at nim cyipun ic tza'n wacẍ te tjak' c'ul. 23Ka ma che oc cy'a'n tiyjil Jacob mlay che c'ixbisanjtz; ka ma che oc cy'a'n aj Israel cyu'n chman mlay che naj cyu'n. Ja'lo cxel k'met cyi'j aj Israel cyja': Cyque'yinxe nic'pun ma tbincha Dios cyi'j. 24Aju tnam lu ic tten ic tza'n jun balun in jaw we', mi jun jacu xcye' ti'j, mlay tz'ojlan ka na'nxtok tbaj tcanb ex ka na'nxtok tbaj tchc'el ju otok tzyet tu'n, chi Balaam. 25Xitzun tma'n Balac te Balaam: —Yaque minti'x in tzaj tkanina mya ba'n tibaj tnam lu, ax icx mi'n cub tcy'iwla'na. 26Xitzun ttzak'we'n Balaam: —¿Baka minti' xi nma'ne teya ka o'cx aju ctzajel tma'n Kman weye atzunju cbantel wu'ne? 27Xitzun tma'n Balac te Balaam: —Binchama xtalbil ko' wuc'ile tuj juntl lugar, kapelo ba'n jacu tz'ela tuj twitz Dios tu'n t-xi tkanina mya ba'n cyibaj aj Israel max ma chixin. 28Cyja'tzun tten xi uc'in Balaam tu'n Balac twi witz Peor, jatum k'ancha'lin tzkij tx'otx'. 29Xi tma'n Balaam te Balac: —Binchan jawa wuk altar tzalu ex byoncuya wuk tal tor ex wuk tman ẍne'l. 30Banttzun tu'n Balac ic tza'nx otok tma Balaam te, ex cub tpatun jun tal tor ex jun tman ẍne'l tibaj teyle junjun altar.

will be added

X\