NÚMEROS 18

1Tzaj tma'n Kman te Aarón: Aya cyuc'ix ke tcy'ajala, junx cyuc'il txkantl tiyjil Leví akeju junx tiyjila cyuc'il, akeye at cyile ti'j ka ma binchanjtz jun mya ba'n ti'j njaye; katzun tuj ak'untl cye pal ma binchanjtz jun mya ba'n, o'cxtzun teya ex ke tcy'ajala at cyile ti'j. 2Che k'intza cycyakil tiyjil Leví akeju junx tiyjila cyuc'il, tu'n cyonin ti'ja ex cyi'j ke tcy'ajala tuj ak'untl in bant cyu'ne twitz ja xbalun te mojbabl tibil. 3Cbantel cyu'n ke termaniya akeju aj Leví aju cxel tma'na cye; c'oquel cycwentin ja xbalun te mojbabl tibil, pero minti' cyoclen tu'n cypon lak'e' cyi'j ke macbil xjan ate' tuj ex mi ti'j altar; porque ka ma che pon lak'e', che najel, ex ajun keye che najel cyuc'il. 4Ba'n tu'n cyten tuc'ila ex c'oquel cycwentin ja xbalun te mojbabl tibil, ex cbantel mastl ak'untl cyu'n ti'jx ja, pero mi jun xjal ba'n tu'n tpon lak'e' cyi'je, ka mya aj Leví. 5Akeye at cyoclene ti'j tu'n tbant ak'untl tuj ja xbalun te mojbabl tibil ex ti'j altar, tu'ntzun mi'n ttzaj juntl maj nk'oje cyi'j aj Israel. 6Wu'ne e jaw nsc'o'ne ke termaniya akeju aj Leví cyxol mastl aj Israel, tu'n cyxi nk'o'ne te cyeye ic tza'n jun oyaj pa'maj te weye, tu'ntzun cyajben tuj ak'untl twitz ja xbalun te mojbabl tibil. 7Pero o'cx teya cyuc'ix ke tcy'ajala che ajbele te pal, tu'n cyajbene ti'j altar ex tu'n cyajbene ti'jxi xbalun tcub ttzi njaye, porque ma txi nk'o'ne oclenj cyeye tu'n cyoque te pal. Katzun at jun ma tz'oc tk'on tib te pal ex mya pal te, ba'n tu'n tcyim. 8Tzaj tma'ntl Kman te Aarón: Ax icx ma txi nk'o'ne tuj tcwenta ke oyaj in che tzaj k'o'n weye. Cycyakil oyaj xjan in tzaj cyk'o'n aj Israel weye, che xel nk'o'ne teya ex cye ke tcy'ajala, tu'nju pal keye; a jlu jun ley ctel te jumajx. 9Cyi'j ke chojbil minti' in che ocx patit, atzun ke che ajbel teya: Ke oyaj ti'j twitz awal, ke oyaj te chojbil il ex ke oyaj te chojbil cypaltil aj Israel. Cycyakil ke oyaj xjansamaj lu, teya che ajbel ex cye ke tcy'ajala. 10Cxel cywa'ne tuj jun lugar xjan; cycyakil xinak che wa'l ti'j, ex xjan c'oquel jlu te cyeye. 11Ax icx cxel nk'o'ne teya ex cye ke tcy'ajala ex ke tme'jela, akeju ax ate' tuj tjaya, ke oyaj in che tzaj yec'un weye ex ke oyaj in che'x yucun nwitze, aju in tzaj cyk'o'n aj Israel weye. A jlu jun ley cucx ctel te jumajx. Nok alcyex jun xjal ax tiyjila ex ka t-saksan tib, ba'n tu'n twa'n cyi'j. 12Ax icx cxel nk'o'ne tnejel twitz awal teya, aju ctzajel cyk'o'n aj Israel weye teyle junjun abk'i: Aju tbanil aseyt, tuc'ix tbanil ta'l twitz uva ex tbanil triw. 13Ax icx cxel nk'o'ne teya tnejel cywitz cycyakil txcaj awal in tzaj cyk'o'n aj Israel weye. Nok alcyex jun xjal ax tiyjila ex ka t-saksan tib, ba'n tu'n twa'n cyi'j. 14Cycyakil oyaj c'elel cypa'n aj Israel te weye, teya c'ajbel. 15Cycyakil nej cycy'ajal aj Israel cyuc'ix nej cyal alumaj aju ctzajel cyk'o'n weye, teya c'ajbel. Pero ke nej cycy'ajal xinak ex nej cyal alumaj, akeju mlay che'x k'ot te chojbil, kaninxa cywi' tu'ntzun cycolpet. 16Oc tjapun jun xjaw cyul-len itz'j, ba'n tu'n ttzaj cyk'o'n jwe' sak pwak te colpibl cye, ic tza'nx cywi' ex ic tza'nx sak pwak in ajben tuj njaye, ch'ixmi mey ons talil junjun. 17Atzun ke nej cyal vac, ke nej cyal ẍne'l ex ke nej cyal chip, mi'n che cyaj colpet, porque weye ke jlu. Che bel tbyo'na ke, c'oquel ttx'ito'na cychc'el ti'jele tc'u'j altar, ex cbel tpatuna cysebyil te jun oyaj at tc'oc'jal in chin tzalaje ti'j. 18Atzunju cychibjal, teya c'ajbel, ic tza'n ttzi cyxu'c mastl alumaj ex cycux tuj cybank'ab. 19Cycyakil ke oyaj xjan nne'l cypa'n aj Israel te weye, teya cxel nk'o'ne ex cye tcy'ajala ex cye tme'jela, akeju ax ate' tuj tjaya. A jlu jun ley cucx ctel te jumajx. Aju yol ma cyaj bant ti'j wu'ne tuc'ila, axju c'ajbel cye tiyjila, mlay ch'expet ex cucx ctel te jumajx, chi Kman te Aarón. 20Ex tmatl Kman te Aarón cyja': Minti' ttx'otx'a ex minti' tetzbila ctel tuj cytx'otx' aj Israel. Akine chin oquel te tetzbila tuj cytx'otx' aj Israel. 21Aju tlaji'n in tzaj cyk'o'n aj Israel ti'j twitz cyawal, cxel nk'o'ne te cyetzbil aj Leví te twi cyc'u'j, tu'nju in che ajben tuj ja xbalun te mojbabl tibil. 22Atzun ke mastl aj Israel mi'ntl che pon lak'e' ti'j ja xbalun te mojbabl tibil, porque tu'n jlu jacu cybincha jun il ex jacu che cyim tu'n tlaj. 23O'cx cye aj Leví che ajbel tuj ja xbalun te mojbabl tibil, ex ka at jun mya ba'n ma binchanjtz ti'j, atzun ke at cyil ti'j. Atzun jun ley jlu cyjel ten cyuc'ile te jumajx, ex wikinwik cyjel cyma'ne cye cyc'wa'le. Ke aj Leví minti' cytx'otx' ctel tuj cytx'otx' mastl aj Israel, 24porque ma txi nk'o'ne te cyetzbil aju tlaji'n in tzaj cyk'o'n aj Israel weye ti'j twitz cyawal. Cyja'tzun ma txi nma'ne: Minti' cytx'otx' ctel tuj cytx'otx' aj Israel, chi Kman te Aarón. 25Tzaj yolin Kman tuc'il Moisés ex tma: 26K'manxa cye aj Leví cyja': Oc ttzaj cyc'mo'ne aju tlaji'n ti'j twitz cyawal aj Israel, aju o txi nk'o'ne te cyetzbile, c'elel cyi'ne tlaji'n ti'j tlaji'n ctzajel cyc'mo'ne, tu'n ttzaj cyk'o'ne weye. 27Atzun cyeye cyoyaj ctzajel cyk'o'ne junx ta' tuc'il cye aj Israel cyoyaj in tzaj cyk'o'n ti'j triw ex ti'j ta'l twitz uva. 28Cyja'tzun c'elel cypa'ne cyoyaje te Kman ti'j tlaji'n ctzajel cyk'o'n aj Israel weye, ex cxel cyk'o'ne te pal Aarón. 29Ti'j tcyakilju ctzajel cyk'o'n cyeye c'elel cypa'ne ch'in ti'j, ic tza'n jun cyoyaje te weye, ex aju mas tbanil atzunju ctzajel cyk'o'ne weye. 30Tel-lenxi cypa'ne aju mas tbanil te weye, aju csobryil ba'n tu'n toc te cyeye, ic tza'nx cyexe cyawale triw ex ta'l twitz uva. 31Ba'ntzun tu'n t-xi cywa'ne akeye ex keju ate' tuj cyjaye nok tuj alcyex lugar. Atzun twi cyc'u'je tu'nju in che ajbene tuj ja xbalun te mojbabl tibil. 32Ka ma tz'el cypa'ne aju mas tbanil te weye, ba'n tu'n t-xi cywa'ne aju csobryil, ex mya il jlu; ictzun tten aju cyoyaj ke aj Israel xjansamaj, mlay baj cytz'ilsa'ne ex mlay che cyime, chicuya cye, chi Kman te Moisés.

will be added

X\