NÚMEROS 17

1Tzaj yolin Kman tuc'il Moisés ex tma: 2K'manxa cye aj Israel: Il ti'j tu'n ttzaj cyi'n teyle junjun nejenel cye junjun c'loj cyiyjil jun cy'ako'ch, ex ka tu'n tul cyi'n cablaj cy'ako'ch tu'n tcyakil, ex tz'iban oca tbi teyle junjun nejenel ti'j tcy'ako'ch. 3Tz'iban oca tbi Aarón ti'j tcy'ako'ch tiyjil Leví, porque tzul cyi'n jun cy'ako'chbaj te junjun nejenel cye junjun c'loj cyiyjil aj Israel. 4Atzun che bel tk'o'na tuj ja xbalun te mojbabl tibil, twitz cax c'ubl nleye jatum in cub nyec'un wibe twitza. 5Cbantel wu'ne tu'n ttzaj t-xul tcy'ako'ch aju xinak cjawil nsc'o'ne, tu'ntzun mi'n cucx cyyolin aj Israel mya ba'n cyi'je nwitze, chi Dios. 6Xi tma'n Moisés tcyakil jlu cye aj Israel, ex teyle junjun nejenel cye junjun c'loj cyiyjil xi tk'o'n tcy'ako'ch te Moisés. Cablaj cy'ako'ch bant tu'n tcyakil ex tuc'ix tcy'ako'ch Aarón oc te tajlal cyxol. 7E cubtzun tk'o'n Moisés ke cy'ako'ch lu twitz Kman tuj ja xbalun te mojbabl tibil. 8Tuj juntl k'ij, tej tocx Moisés tuj ja xbalun te mojbabl tibil, o til aju tcy'ako'ch Aarón cyi'j ke tiyjil Leví, otok tzaj t-xul, otok tz'oc t-xmacal ex attok twitz almendro otok k'anix ti'j. 9Etztzun ti'n Moisés cycyakil cy'ako'ch twitz Kman ex xi tyec'un cye aj Israel. Tbajlenxitzun cyque'yin, teyle junjun xi ti'n ju tcy'ako'ch. 10Tzajtzun tma'n Kman te Moisés: K'o'n ocxa juntl maj tcy'ako'ch Aarón twitz cax c'ubl nleye, ex axtzun c'u'n cyaja te jun techal cye tnam xjal lu miban che bin. Cyja'tzun cmayetel tu'na, tu'n mi'n cyyolintl mya ba'n wi'je, tu'ntzun mi'n cycyim. 11Tbinchatzun Moisés tcyakil ic tza'nx otok tzaj tma'n Kman te, 12atzun cye aj Israel xi cyma'n te Moisés: Ma ko najxe. Kcyakile ko cymele. 13Cycyakil keju in che pon lak'e' ti'j ja xbalun te mojbabl tibil bi'x in che cyim. ¿Maj ko najeltzune kcyakile? Che chi xjal.

will be added

X\