1 Tzaj yolin Kman tuc'il Moisés ex tma: 2 K'manxa cye aj Israel cyja': Oc cyocxe tuj tx'otx' cxel nk'o'ne cyeye tu'n cynajane tuj, 3 ex oc ttzaj cyk'o'ne jun tor ex ka jun ẍne'l tu'n tcub patit te nimbil weye, ka te chojbil patun in cub at tc'oc'jal in chin tzalaje ti'j, ex ka te oyaj, ka ti'j jun yol otok japun aju otok tzaj cytziyane weye, ex ka jun oyaj tu'n cyexe cygan ctzajel cyk'o'ne, ex ka ti'j jun nink'ij, 4 aju xjal ctzajel k'onte oyaj lu weye, ax icx ctzajel tk'o'n cabe libr arin tbanilxix xyok'imaj tuc'il jun litr aseyt, 5 ax icx ctzajel tk'o'n jun litr oyaj ta'l twitz uva tu'n tcub ko'n ti'j junjun tal tman ẍne'l in cub patit te chojbil, ex ka ti'j chojbil te mojbabl tibil. 6 Katzun jun tman ẍne'l chojbil ctzajel cyk'o'n, cxeltzun cyk'o'ntl cyaje libr tuc' mey arin xyok'imaj, tuc'il mas te jun litr aseyt, 7 ex mas te jun litr ta'l twitz uva, te jun oyaj at tc'oc'jal in chin tzalaje ti'j. 8 Katzun jun tal tor chojbil ctzajel cyk'o'n, ka jun chojbil tu'n tcub patit, ka jun chojbil te mojbabl tibil, ex ka ti'j tjapunlen jun yol otok txi cytziyan, 9 cxel cyk'o'ntl kak libr arin xyok'imaj, tuc' cabe litr aseyt, 10 tuc'ix cabe litr oyaj ta'l twitz uva tu'n tcub ko'n. A jlu jun oyaj patun in cub at tc'oc'jal in chin tzalaje ti'j. 11 Atzun jlu cbantel cyu'n ti'j junjun tor, ti'j junjun tman ẍne'l, ti'j junjun tal tman ẍne'l ex ti'j junjun tal tman chip oc ttzaj cyk'o'n. 12 Ic tza'nx cyajlal alumaj ctzajel cyk'o'n, icxtzun cyoyaj ctzajel cyk'o'n ti'j teyle junjun. 13 Il ti'j tu'n tjapun jlu cyu'n cycyakil aj Israel oc ttzaj cyk'o'n cyoyaj patun in cub at tc'oc'jal in chin tzalaje ti'j. 14 Ka at jun stranjer xjal ex ka nok alcye juntl xjal ax najl cyxole taj tu'n ttzaj tk'o'n toyaj weye patun in cub at tc'oc'jal in chin tzalaje ti'j, il ti'j tu'n tbant tcyakil tu'n ic tza'nx cyeye. 15 Aju ley c'ajbel cyeye, axtzunju c'ajbel cye stranjer xjal najlke cyxole; atzun ley lu cyjel ten cyuc'ile te jumajx, tu'n tajben cyeye ex wikinwik tu'n tcyaj cyma'ne cye cyc'wa'le. 16 Aju ley c'ajbel te cyeye, ax c'ajbel cye ke stranjer xjal najl cyxole. 17 Tzaj yolin Kman tuc'il Moisés ex tma: 18 K'manxa cye aj Israel cyja': Oc cyocxe tuj tx'otx' jatum che pol wi'ne, 19 ex oc ttzyet cywa'ne ti'j triw in tzaj tuj tx'otx', c'elel cypa'ne ch'in ti'j tu'n ttzaj cyk'o'ne weye. 20 Ctzajel cyk'o'ne weye jun pan ti'j tnejel ac'aj triw oc tex cyche'ne, te jun cyoyaje ti'j tcyakil twitz triw. 21 Aju oyaj lu cucx ctzajel cyk'o'ne weye tcyakil abk'i. 22 Katzun nok minaben ex mya ximamaj cyu'ne ma che ic'e cyibaj ke nmandamyente, akeju o che'x nma'ne te Moisés, 23 ex atxix tej t-xi tma'n Moisés cyeye, ka minti' ma japun cyu'ne, ex ka cyu'n cyiyjile che ul itz'j te tibajxi, 24 ex ka nok minaben ma cybincha tnam xjal jun il, ex mya ximamaj cyu'n, cycyakiltzun tnam xjal ctzajel cyk'o'n jun tal tor weye te jun oyaj patun in cub at tc'oc'jal in chin tzalaje ti'j, cyuc'ix ke oyaj ti'j twitz awal ex ta'l twitz uva, ic tza'nx o txi nma'ne; ax icx ctzajel cyk'o'n jun tman chip te chojbil il. 25 Atzunte pal cxel tk'o'n chojbil ic tza'nx in tma'n ley, tu'n tnajset cyil tnam xjal aj Israel, ex cbel nnajsa'ne cyil, porque mya tu'n cyex cygan otok cybincha il, ex tu'nju otok tzaj cyk'o'n cyoyaj patun in cub ex ju chojbil ti'j cyil. 26 Cbel nnajsa'ne cyil cycyakil tnam xjal aj Israel, cyuc'ix stranjer xjal najl cyxol, tu'nju mya tu'n cyex cygan otok cybincha il. 27 Ka at jun xjal nok minaben ma binchan il ex mya ximamaj tu'n, cxel tk'o'n xjal jun tal ttxu chip te jun abk'i te chojbil til. 28 Atzunte pal cxel tk'o'n chojbil ic tza'nx in tma'n ley tu'n tnajset til xjal aju nok minaben otok binchan il ex mya ximamaj tu'n, ex cbel nnajsa'ne til. 29 Ax ley lu c'ajbel cye aj Israel ex ax c'ajbel cye stranjer xjal najl cyxole, ka nok minaben otok che binchan il ex mya ximamaj cyu'n. 30 Katzun at jun xjal ma binchan il tu'n tex tgan, masque aj Israel ex ka stranjer xjal, a jlu mya ba'n ma tbincha wi'je, cyja'tzun, aju xjal lu cbel byet tu'ntzun mi'n ttentl cyxol t-xjalil, 31 porque ma tz'el tic'un nyole ex minti' ma japun nmandamyente tu'n. Aju xjal lu bi'x cbel byet, ex ax te at til ti'j tcamic. 32 Tej ate'tok aj Israel tuj tzkij tx'otx' e oc noj ti'j jun xinak in chmontok si' tuj k'ij te ojlabl. 33 Xi k'i'n cyu'n keju e oc noj ti'j, tu'n tpon twitz Moisés ex Aarón ex cywitz cycyakil tnam xjal, 34 ex ocx cyk'o'n tuj pres, porque na'nxtok cybinte alcye tu'n tbinchet ti'j. 35 Tzajtzun tma'n Kman te Moisés cyja': Il ti'j tu'n tcyim xjal lu. Cycyakil aj Israel e toc cyxo'n abj ti'j ti'jxi campament. 36 Extzun cyi'n aj Israel xjal lu ti'jxi campament ex oc cyxo'n abj ti'j tejxi tcyim cyu'n, ic tza'nx otok tzaj tma'n Kman te Moisés. 37 Tzaj yolin Kman tuc'il Moisés ex tma: 38 K'manxa cye aj Israel cyja': Akeye aj Israel cyuc'ix ke cyiyjile che ul itz'j te tibajxi, cyk'onque ttxa'n cyxbalune ẍli'jin tten ex cyc'alo'n oque jun piẍ nok' ẍk'ilun que'yin tuj junjun c'alo'bin te ẍli'jin. 39 Cyja'tzun, oc toc cyque'yine ttxa'n cyxbalune, ctzajel cyna'ne cycyakil nmandamyente tu'ntzun tjapun cyu'ne, ex tu'n mi'n cyxi lpe'ye ti'j cyexe cyximbetze ex ti'j cyexe cyajbile, porque cyu'n jlu jacu bant tu'n tel cypa'n cyibe wi'je. 40 Tu'nju ẍli'jin lu, jacu tzaj cyna'ne cycyakil nmandamyente tu'n tjapun cyu'ne, ex che tele xjan nwitze. 41 Akine Cymane ex Cydiose, aju etz k'inte cyeye tuj Ejipt tu'ntzun woque te Cydiose. Akine Cymane ex Cydiose.
