NÚMEROS 14

1Tzyettzun cysch'in aj Israel tu'n cyxobil; ex ak'bil cyu'n in che ok' wen. 2Ex cycyakil e oc ten yolil mya ba'n ti'j Moisés ex ti'j Aarón, in cyma'n: Mas ba'nwtlo nokwit max xko cyim tuj Ejipt ex ka tzalu tuj tzkij tx'otx'. 3¿Tiku'n xko tzaj ti'n Kman tu'n kpon tuj tx'otx' ma chixin? Porque ko cymel tuj k'oj ex ke kxu'jil ex ke kc'wa'l che tzyetel cyu'n aj k'oj ex che xel cyi'n. Maslo ba'n tu'n kaj tuj Ejipt. 4Ex in cyma'n cyxolx: E toc kk'o'n jun nejenel kxol ex e kaj meltz'aj tuj Ejipt. 5Atzunte Moisés ex Aarón e cub mutzk'aj ex pon tacl tibaj cywitz max twitz tx'otx' cywitz cycyakil tnam xjal. 6Atzunte Josué aju tcy'ajal Nun, tuc'ix Caleb aju tcy'ajal Jefone, akeju otok che'x aj que'yilte tx'otx' Canaán, el cysbit'un cyxbalun cyi'j tu'n cybis, 7ex xi cyma'n cye cycyakil aj Israel: —Aju tx'otx' o'x aje que'yilte, puro tbanilxix. 8Ka ma tzalaj Kman ki'j, ax te c'onil ke tu'n kcanun tuj tx'otx' ex ctzajel tk'o'n ke. Aju tx'otx' lu k'inun tx'otx' ex tbanilxix. 9Pero mi'n jaw cyi'n cyibe ti'j Kman, ex mi'n che xobe cywitz xjal ate' ma chixin, porque ke xjal lu jurat naj cbel cyi'j ku'n; mi a'l colol cyi'j, atzun ke, at Kman kuc'il. Mi'n che xobe cywitz, che chi, xi cyma'n. 10Atzun cye xjal o cyajbe tu'n toc cyxo'n abj cyi'j. Cubtzun tyec'un tib t-spic'umal Kman cywitz cycyakil aj Israel tibaj ja xbalun te mojbabl tibil, 11ex tzaj tma'n Kman te Moisés: —¿Jtoj ban txi cycolin xjal tu'n cyic'un wi'je? ¿Jtoj ban txi cycolin tu'n mi'n tke' cyc'u'j wi'je, ex o bant nimcu techal wu'ne cyxol? 12Tzul nsama'ne tx'u'j yabil cyi'j tu'n cycyim ex tu'n mi'n cyetzan ti'j tx'otx' Canaán; pero ti'ja c'elel jun tnam ma'xix wu'ne ex mas tipun ic tza'n cye, chi Dios te Moisés. 13Atzunte Moisés xi ttzak'we'n te Kman: —Oclo cybi aj Ejipt, jatum e etz ti'na tnam xjal lu tu'n tipumala, 14ex cxel-lo cyma'n cye tnam xjal najl tuj Canaán. Ax icx cye aj Canaán o cybi ka aya Nman Dios tcuba cyxol tnam xjal lu, ex twitzelaya in cub tyec'un tiba cywitz, ex aju muj jatum tocxa tuj, tcub cyibaj; nejliya cywitz te k'ijl tuj txkan muj ex te konic'an tuj txkan k'ak'. 15Ka ma che cub tbyo'na tnam xjal lu, ke nmak tnam o cybi tkanil ti'ja oc cyma: 16Mix ma bant tu'n Cydios tnam xjal aj Israel tu'n cypon tuj tx'otx' Canaán, aju xi ttziyan tu'n t-xi tk'o'n cye, ex cyja'tzun ma che cub tbyo'n tuj tzkij tx'otx'. 17Tiltzun Nman Dios, yec'untza nimxix tipumala ja'lo, ic tza'nx o tzaj ttziyana, porque o tmaya 18ka minti' in jaw k'ojl naja, ma'xix tc'ujlalila ex in cub tnajsa'na mya ba'n ex ttx'u'jil wibaj, masque minti' nni'c'x ti'j tu'na tu'n mi'n tcub tcastiw jun xjal at til, nok o'cx in cub tk'o'na cycastiw c'wa'lbaj tu'n tlaj mya ba'n cybinchben cyman, cyuc'ix ke tal chmambaj ex ke ttxca' chmambaj. 19Tu'nju tc'ujlalila ma'xix najsancuya aju mya ba'n ma bant cyu'n tnam xjal lu, ic tza'n ma ten tpasensa cyi'j tej maxtok ate' tuj Ejipt ax icx ja'lo. 20Atzunte Kman tzaj ttzak'we'n: —Ba'n, ma cub nnajsa'ne cyil ic tza'nx ma tmaya weye, 21pero cxel nma'ne teya jun yol axix toc wu'nx wibe, ex axix toc nojni tcyakil twitz tx'otx' tu'n wajwalile: 22Cycyakil keju o cyil nspic'umale ex ke techal e bant wu'ne tuj Ejipt ex tuj tzkij tx'otx', ex ma chin oc k'o'ne cyu'n tuj nimcu joybil wi'je ex minti' in chinx cyniman, 23ax toc, mi jun cye oc cyila' aju tx'otx' xi ntziyane cye ktzan cyxe'chel. Mi jun cye keju ma che el ic'unte weye oc cyila' aju tx'otx'. 24Atzunte nmajene Caleb, tu'nju ma ten junxitl t-ximbetz ex ma chinx tniman tuj tcyakil, cxel nk'o'ne ambil te tu'n tpon tuj tx'otx' xi aj que'yilte, ex ake tiyjil che najal tuj. 25Ke aj Amalec ex ke aj Canaán, atzun najlke tuj chk'ajlaj. Atzun cyeye, cyaj meltz'aje nchi'j ex cyxi'ye tuj be in xi' tuj tzkij tx'otx' tumlal mar Cyak Que'yin. 26Ex tzaj tma'ntl Kman te Moisés ex te Aarón cyja': 27—¿Cucxpe c'ic'elex ta'w cyyol aj Israel wu'ne, ake jumajx mya ba'n ke? Ma nbiye in che yolin mya ba'n wi'je. 28K'manxa cye cyja': Akine Dios cxel nma'ne jun yol axix toc wu'nx wibe: Ic tza'n cyyole ma nbiye, icxtzun cbantel cyi'je wu'ne. 29Cycyakil keju o japun winkin abk'i cyu'n, ic tza'nx in tma'n tuj cyajlal xjal o jaw, ex ma che yolin mya ba'n wi'je, che cymel, ex aju cyximlal cyjel pale' tuj tzkij tx'otx' lu. 30Mi jun cye cpol tuj tx'otx' xi ntziyane aju tu'n cypon najal tuj, nok o'cx Caleb aju tcy'ajal Jefone, tuc'ix Josué aju tcy'ajal Nun, che pol tuj tx'otx' lu. 31Atzun cye cyc'wa'le, akeju o cymaye ka tu'n cycub tz'ak tuj cyk'ab aj k'oj cyi'je, che xel wi'ne tu'n cypon najal tuj tx'otx' aju ma tz'el cyic'une. 32Atzun cyeye, che cyjel pale'ye cyimni keye tuj tzkij tx'otx' lu. 33Atzun ke cyc'wa'le ax che pastoril cyalun 40 abk'i tuj tzkij tx'otx' lu. Nim c'ic'elex cyu'n tu'n tlaj mya ba'n ma bant cyu'ne, ocxi cybaj cyime tzalu tuj tzkij tx'otx'. 34Akeju e je'x aj que'yilte tx'otx', e ten 40 k'ij tu'n tic' cywitz ti'j, ax icxtzun 40 abk'i cchjetel cyile; jun abk'i ti'j jun k'ij. Atzun c'elel cynic'e ti'j alcye in tzaj tu'nju in chin k'ojine cyi'je. 35Akine Dios in xi nma'ne jlu: Atzun cbantel wu'ne cyi'j tnam xjal lu, akeju jawni cywitz ex ma jaw cyi'n cyib wi'je. Tujx tzkij tx'otx' lu che bajel cyim. 36Akeju xinak e je'x t-sama'n Moisés que'yilte tx'otx', ex tej cyul meltz'aj o cyma tkanil mya ba'n ti'j tx'otx', ex tu'n cyyol xjal lu e oc ten cycyakil tnam xjal yolil mya ba'n ti'j Moisés, 37akeju xinak lu tzaj jun c'ixbisabl cyibaj ex e cyim tu'n Kman. 38Cyxol cycyakil keju e je'x aj que'yilte tx'otx', o'cx te Caleb aju tcy'ajal Jefone, tuc'ix Josué aju tcy'ajal Nun e cyaj ten ex minti' e cyim. 39Tejtzun t-xi ttx'olba'n Moisés cye aj Israel aju otok tma Kman te, cycyakil aj Israel e bisun nimxix wen, 40ex te juntl k'ij te prim e jaw we', e jax twi witz ex cyma: —Ax toc ma ko binchan il, atzun ja'lo ko' tuj lugar o tzaj ttziyan Kman ke. 41Atzunte Moisés xi tma'n cye: —¿Tiku'n ma che ic'e tibaj tyol Kman? Mya ba'n c'elel te cyeye. 42Tiltzun mi'n che jaxe, porque mi a'l Kman cyuc'ile ex cbel cyi'je cyu'n aj k'oj cyi'je, 43porque lu ke aj Amalec ex ke aj Canaán in che ayon cyi'je tu'n cyk'ojin cyuc'ile ex tu'n cycub byo'ne cyu'n. Tu'nju ma tz'el cypa'n cyibe ti'j Kman, cyja'tzun mi a'l Kman cyuc'ile, chi Moisés cye. 44Atzun cye minti' xi cybi'n tu'n mi'n cyjax twi witz ex e jax o'cx cye. Atzunte Moisés tuc'ix cax c'ubl tley Dios ax e cyaj ten tuj campament. 45E etztzun ke aj Amalec cyuc'ix ke aj Canaán, akeju najlke tuj lugar lu, e oc ten k'ojlel cyi'j aj Israel, cub cyi'j cyu'n ex e je'x lpe' cyi'j tejxi cypon tuj lugar Horma.

will be added

X\