1 Tzaj yolin Kman tuc'il Moisés ex tma: 2 Samanxa junjun xinak que'yilte tx'otx' Canaán aju cxel nk'o'ne cye aj Israel. Samanxa junjun xinak ma' cyoclen, jun cyxol teyle junjun c'loj aj Israel. 3 E je'xtzun t-sama'n Moisés tej ate'tok tuj tzkij tx'otx' Parán, ic tza'nx otok tma Kman. Cycyakil ke xinak e je'x sama'n, nejenel ke cyxol aj Israel, 4 ex atzun ke jlu: Cyxol tiyjil Rubén, a Samúa xi', aju tcy'ajal Zacur; 5 cyxol tiyjil Simeón, a Safat xi', aju tcy'ajal Hori; 6 cyxol tiyjil Judá, a Caleb xi', aju tcy'ajal Jefone; 7 cyxol tiyjil Isacar, a Igal xi', aju tcy'ajal José; 8 cyxol tiyjil Efraín, a Oseas xi', aju tcy'ajal Nun; 9 cyxol tiyjil Benjamín, a Palti xi', aju tcy'ajal Rafú; 10 cyxol tiyjil Zabulón, a Gadiel xi', aju tcy'ajal Sodi; 11 cyxol tiyjil José, ti'j tiyjil Manasés, a Gadi xi', aju tcy'ajal Susi; 12 cyxol tiyjil Dan, a Amiel xi', aju tcy'ajal Gemali; 13 cyxol tiyjil Aser, a Setur xi', aju tcy'ajal Micael; 14 cyxol tiyjil Neftalí, a Nahbi xi', aju tcy'ajal Vapsi; 15 cyxol tiyjil Gad, a Geuel xi', aju tcy'ajal Maqui. 16 Atzun cybi ke xinak e je'x t-sama'n Moisés que'yilte tx'otx'. Baj tch'expu'n Moisés tbi Oseas aju tcy'ajal Nun, ex Josué tbi oc tk'o'n. 17 E je'xtzun t-sama'n Moisés ke xinak lu que'yilte tx'otx' Canaán ex xi tma'n cye: —Cyja' cyjaxe tuj lugar Néguev ex cyjaxe tuj tiwitz tx'otx'. 18 Cyque'yin baje tx'otx' tza'n tten, ax icx ke xjal najl tuj, ka at nim cyipun ex ka minti' cyipun, ka nim cybaj ex ka nic'xi cybaj. 19 Cyque'yin baje ke tnam, ka at muro toc cyi'j ex ka minti', ex aju tx'otx' jatum najl ke xjal, ka ba'n ex ka mya ba'n, 20 ka ba'n ttzaj awal tuj tx'otx' ex ka mi'n, ex ka at tze' tuj ex ka minti'. Cyuwx cyc'u'je, cyi'ntze junjun twitz awal at tuj tx'otx', chi Moisés cye. Acu tk'ijlalil tu'n tjaw chmet tnejel twitz uva. 21 E je'xtzun ke xinak ex baj cyque'yin tx'otx', xi'x ke' cyu'n tuj tzkij tx'otx' Zin tuj tumlal tnayaj k'ij, ex e japun baj max tuj Lugar Rehob ttxa'n tnam Hamat tuj tumlal tbank'ab k'ij. 22 E ic' tuj tx'otx' Néguev ex e pon max tuj tnam Hebrón. Atzun najltok Ahimán tuc'ix Sesai ex Talmai, ake jlu tiyjil Anac ke. Otok bant wuk abk'i tbantlen tnam Hebrón tej tbant tnam Zoán tuj Ejipt. 23 E pon max jatum ta' tk'ab xak Escol, ex atzun el cytx'emin jun tk'ab uva nim twitz toc ti'j, octzun cyyobin ti'j jun tze' ex cabe xjal tzaj k'inte te. Ax icx tzaj cyi'n carnad ẍok' tuc'ix higo. 24 Escol tbi tk'ab xak oc cyk'o'n, tu'nju atzun el cytx'emin aj Israel aju rasim uva lu. 25 Tuj 40 k'ij baj cyque'yin tx'otx', ex tbajlenxi jlu e ajtztzun meltz'aj 26 tu'n cyul tuj lugar Cades tuj tzkij tx'otx' Parán. Atzun ate'tok Moisés tuc'ix Aarón ex cycyakil aj Israel. Xi cytx'olba'n cye aju otok cyil ti'j tx'otx' ex xi cyyec'un cye aju twitz awal in tzaj tuj tx'otx'. 27 Ax icx xi cyma'n te Moisés: —Ma kox aje tuj tx'otx' jatum o'x t-sama'na. Axix toc aju tx'otx' lu k'inun tx'otx' ex tbanilxix, ex atzun ke twitz awal in tk'o'n tx'otx' jlu, 28 pero ke xjal najl ma chixin at nim cyipun ex ke tnam nimakxix ke ex at muro toc cyi'j. Ex mya o'cx jlu, ax icx ma kile ke xjal ma' cywa'l tiyjil Anac ke. 29 Tuj Néguev, atzun najl ke aj Amalec, ex tuj tiwitz tx'otx', atzun najl ke aj Hetey, ke aj Jebusey ex ke aj Amorrey, atzun nikayin ttzi mar ex ttzi nima Jordán, atzun najl ke aj Canaán. 30 Atzunte Caleb xi tma'n tu'n mi'n cyk'ajt tnam xjal ate' twitz Moisés ex tma: —Ko'ke tu'n tcambet tx'otx' lu ku'n. Jacu cambet ku'n. 31 Atzun keju e je'x aj tuc'il que'yilte tx'otx' tzaj cytzak'we'n: —Mi'n, mlay ko xcye' cyi'j xjal lu, porque mas at cyipun kwitz. 32 Ex e oc ten k'malte cye aj Israel ka aju tx'otx' otok che'x aj que'yilte jumajx mya ba'n te, ex xi cyma'n: —Aju tx'otx' o'x aje que'yilte, jumajx xobajil, ex cycyakil xinak o kile ma chixin ma' cywa'l. 33 Ax icx o kile ke xjal ma' cywa'l akeju tiyjil Anac. Tej kcub tene cytxlaj o kna'ye mer ic tza'n ẍplon ko'ye, ax icxlo o e'laye tuj cywitz tej cyque'yinte ko'ye.
