NÚMEROS 12

1E oc ten María ex Aarón yolil mya ba'n ti'j Moisés tu'nju otok jaw moje' Moisés tuc'il jun xu'j aj Etiopía. 2Ax icx o cyma: Mya nok o'cx tuc'il Moisés in yolin Kman, ax icx in yolin kuc'il. Ex o tbi Kman cyyol. 3Ax toc ate Moisés mansxix, mas mans cywitz mastl xjal twitz tx'otx'. 4Jurattzun xi tma'n Kman te Moisés, te Aarón ex te María cyja': Cyxi'ye cyoxile twitz ja xbalun te mojbabl tibil. E je'xtzun cyoxil. 5Cu'tztzun Kman tuj muj, cub ten ttzi ja xbalun te mojbabl tibil ex xi ttxco'n Aarón tuc'ix María. Tejtzun cycanun twitz, 6tzaj tma'n cye: Cybintze aju cxel nma'ne cyeye: Ka at jun nsanjele cyxole, in chin yoline tuc'il mer ic tza'n tuj witzic', ex ka tuj twitzic', 7atzun tuc'il nmajene Moisés minti' in bant wu'ne icju. Ate Moisés mas in japun tu'n cywitz cycyakil nmajene. 8In chin yoline tuc'il Moisés nwitzeleye tuc'il jun yol chic'lxix, ex mya tuj techal, ex in chin ilwaje tu'n. ¿Tza'ntzun tten minti' ma tzaj cyxobile tu'n cyyoline mya ba'n ti'j nmajene Moisés? 9Tzaj nimxix tk'oj Kman cyi'j cycabil ex ajtzun. 10Tejtzun tjaw lak'e' muj tibaj ja xbalun te mojbabl tibil, lu María otok jawil tx'a'c ti'j, aju minti' k'anbil ti'j, ex sak oc que'yin tcyakil t-ximlal tu'n tx'a'c. Tejtzun t-xi tque'yin Aarón ti'j María otok jawil tx'a'c ti'j aju minti' k'anbil ti'j, 11xi tma'n te Moisés: Binchama xtalbil tat, mi'n cub tk'o'na kcastiwoye ti'j ju il ma kbinchaye tu'n kchcyinibile. 12Mi'n tak'a ambil tu'n toc María ic tza'n jun c'wa'l otok cyim na'nxtok tul itz'j ex oc tul itz'j otok baj k'ay mij t-ximlal. 13Octzun ten Moisés cubsal twitz Kman ex tma: Nman Dios, in chin cubsane twitza tu'n tbanix María tu'na. 14Tzaj ttzak'we'n Kman te Moisés: Nokwit a tman ma tz'ocx tzubante tuj twitz, mawtlo cyaj ten wuk k'ij tuj tch'ixwi. E tex tu'n tten wuk k'ij ti'jxi campament, ex te tibajxi ba'n tu'n tul meltz'aj juntl maj. 15Cyja'tzun tten, ex k'i'n María wuk k'ij ti'jxi campament, atzun cye tnam xjal ax e cub ten ayol ti'j. 16Tejtzun tul meltz'aj María juntl maj cyuc'il, cubtzun be cyu'n, e ic' tuj lugar Hazerot ex atzun e cub tentl tuj lugar tzkij tx'otx' Parán.

will be added

X\