NÚMEROS 11

1At jun k'ij e oc ten aj Israel yolil mya ba'n ti'j Kman tu'n tlaj ju in baj cyi'j. Tej cybinjtz tu'n Kman, tzaj nim tk'oj cyi'j ex tzaj t-sama'n k'ak' tibaj jun piẍ ttxa'n campament. 2E jawtzun sch'in tnam xjal ex e oc ten kanil onbil te Moisés. O cubsan Moisés twitz Kman cyi'j ex cub yupj k'ak'. 3Cyja'tzun oc k'o'n tbi lugar lu Tabera, porque atzun o c'ant k'ak' tu'n Kman cyi'j. 4Otok tz'oc cysmon cyib ela' txcaj xjal cyuc'il aj Israel, ex ake jlu o'cx in che ximan ti'j cychi'; ax icx cye aj Israel el cycano'n cyi'j e oc ten ok'el ex cyma: Ay, nokwit at jun ba'n ttzaj k'onte kchi' chibj. 5Cucx tul ti'j kc'u'j kcotz cyiẍ oc tbaj ku'n tuj Ejipt, tuc'ix pepin, melón, jun wik seboy puerro tbi, seboy ex anjs. 6Atzun ja'lo ma baj kgan ti'j maná, porque o'cx maná in baj ku'n, che chi. 7Aju maná mer ic que'yin ic tza'n iyaj culantr, ẍk'anyin que'yin ic tza'n tk'olil tzaj. 8In che ex xjal chmolte te ex oc tjaw cyche'n ex ka oc tbaj cytx'ino'n, in jax cytzk'ajsa'n tuj c'il ex ka in cub cybincha'n ic tza'n wabj, ex aju tc'oc'jal nno'c ic tza'n pan xi'yni aseyt tuj. 9Oc tcub tk'ab che'w te konic'an tuj campament ax icx in cub aju wabj maná. 10O tbi Moisés in che ok'tok cycyakil aj Israel ttzi'yile cyja xbalun. Tzajtzun nim tk'oj Kman cyi'j, ax icx te Moisés mya ba'n ela tuj twitz, 11ex xi tma'n te Kman: —¿Tiku'n in tbincha'na mya ba'n wi'je, akine tmajena? ¿Titzun tk'oja wi'je, tu'nju ma che cyaj tk'o'na ke xjal lu tuj ncwente ex ma che oc te weye ic tza'n jun iktz alxix? 12Baka akine cyman xjal lu ex baka akine cytxu', tu'n ttzaj tma'na weye tu'n cyxi npalo'ne ic tza'n ne', ex tu'n cypon wi'ne max tuj tx'otx' xi ttziyana cye cyxe'chel. 13¿Jatum ctzajel wi'ne chibj tu'n t-xi k'ot te cychi' cycyakil xjal lu? In che ok' ex in che ul k'malte wuc'ile: K'ontza chibj te kchi'ye, che chi. 14Mlayx chin xcye'ye tu'n cyxi wi'ne cycyakil xjal lu njunalxe; jun iktz jlu alxix te weye. 15Ka a jlu cbantel tu'na wi'je, mejor chin tbyoncuya. Ka axix toc in chin tc'ujla'na, mi'n tak'a ambil tu'n ntentle tuj yajbil weye, chi Moisés. 16Atzunte Kman xi ttzak'we'n: —Che chmon oca 70 tij xjal cyxol aj Israel, akeju ojtzki'n tu'na at cyoclen cyxol xjal; che k'intza ke tuj ja xbalun te mojbabl tibil ex ax e cyayon tuc'ila. 17Chin beletze ex chin yolile tuc'ila; c'elel wi'ne ch'in toclena aju tc'ama tu'n Xewbaj Xjan, ex cxel nk'o'ne cye, tu'ntzun cyonin tuc'ila tu'n cyoc cwentit ke xjal lu, tu'ntzun mi'n cyten xjal o'cx tuj teya tcwent. 18K'manxa cye xjal tu'n cybaj cyxjansan cyib te nchi'j ex che chyo'l chibj, porque o che nbiye in che ok' ex in cyma'n: Nokwit at jun ba'n ttzaj k'onte kchi' chibj; mas ba'ntok kten tuj Ejipt, che chi. Ax ba'n, cxel nk'o'ne cychi' chibj, 19ex mya o'cx te jun k'ij, mi te cabe k'ij, mi te jwe', mi te laj mi te winkin. Mi'n. 20Che chyo'l chibj tuj enter jun xjaw, ocxi tjawil noj tuj cykul tu'n ttzaj xab cyc'u'j, porque ma chin el ic'une cyu'n, akine Cyman atine cyxol. Ma che ok' ex ma cyma nwitze: ¿Tza'n tten xko etz tuj Ejipt? 21Atzunte Moisés xi ttzak'we'n: —At kak syent mil soldad wuc'ile, ex atzun teya in tma'na ka tu'n ttzaj tk'o'na kchi'ye chibj tuj enter jun xjaw. 22¿Jatum at nim ẍne'l ex wacẍ tu'n cycub byet ex tu'n tcanun te cychi' cycyakil xjal lu? Masque tzaj tk'o'na cycyakil cyiẍ at tuj mar te cychi', mlaylo canun cye, chi Moisés. 23Atzunte Kman tzaj ttzak'we'n: —¿Nokpe ch'in wipumale tuj twitza? Ja'lo c'oquel tque'yina ka cjapunel ex ka mi'n aju ma txi nma'ne teya. 24Etztzun Moisés ex xi ttx'olba'n cye xjal aju otok tma Kman. Te tibajxi oc tchmo'n Moisés 70 tij xjal cyxol aj Israel ex e cub ttxolba'n ti'jele ja xbalun te mojbabl tibil. 25Cu'tztzun Kman tuj muj ex o yolin tuc'il Moisés; eltzun ti'n Kman ch'in toclen Moisés, aju otok tc'am tu'n Xewbaj Xjan, ex xi tk'o'n cye 70 tij xjal. Tej tcub ten Xewbaj Xjan cyibaj, e octzun ten yolil ic tza'n t-sanjel Dios, pero minti'tl e yolin juntl maj icju. 26At cabe xinak, jun Eldad tbi, atzun juntl Medad tbi. Akeju cabe xinak lu, ajun ke cyoc te tajlal cyxol 70 tij xjal pero minti' e je'x tuj ja xbalun te mojbabl tibil, nok o'cx ax e cyaj ten tuj campament. Ax icx ul Xewbaj Xjan cyuc'il ex e oc ten yolil ic tza'n t-sanjel Dios. 27Entons tzaj kelan jun cu'xun k'malte te Moisés cyja': —Ate Eldad ex Medad in che yolin cyxol xjal mer ic tza'n t-sanjel Dios ke, chi cu'xun. 28Atzunte Josué aju tcy'ajal Nun, aju matok cu'xunx tej toc te onil te Moisés, tma: —Tat Moisés, k'manxa cye tu'n mi'n cyyolin icju. 29Xi ttzak'we'n Moisés: —¿Apetzun taja o'cx weye tu'n tten woclene? Nokwit ba'n t-xi tk'o'n Kman T-xew cye cycyakil tnam xjal etzan tu'n, ex tu'n cyoc cycyakil te t-sanjel Dios. 30Ajtzun meltz'aj Moisés cyuc'ix cytijil xjal cyxol aj Israel tu'n cypon tuj campament. 31Tzaj txkan cyk'ik' tuj mar tu'n Kman, tzaj ti'n cyk'ik' txkan tz'uchin ex e cub tz'ak ti'jele campament, ex balo te jun k'ij tbetj jatum ponin baj cytxa'n ti'jele campament. In che lipan nikayin twitz tx'otx', balo te jun var cyjaw tibaj tx'otx'. 32Tuj enter k'ij ex enter konic'an ex tuj enter juntl k'ij e chmon xjal cyi'j tz'uchin. Aju xjal nic'xi tz'uchin chmet tu'n, nok laj byuj chmet tu'n, ex cub cytzkijsa'n ti'jele campament. 33Matoktzun nno'cx cyk'o'n cychi' tz'uchin tuj cytzi', na'nxtok tbaj cycoc'sa'n, tzaj tk'oj Kman cyi'j, tzaj tk'o'n cycastiw ex e cyim nimcu xjal. 34Cyja'tzun oc cyk'o'n tbi lugar lu Kibrot-hataava, porque atzun lugar jatum e cu'x maku'n ke xjal o'cx toc cyc'u'j ti'j cychi'. 35Tuj lugar Kibrot-hataava cub be cyu'n tnam xjal tu'n cypon tuj lugar Hazerot ex atzun e cub ten.

will be added

X\