NÚMEROS 10

1Tzaj yolin Kman tuc'il Moisés ex tma: 2Binchan baja cabe chun sak pwak cytx'otx'il, tx'ino'n tu'n martiy, tu'n tajben te chmobl xjal, ex c'oquel k'ajtzet te jun techal tu'n cyic' lak'e' xjal. 3Oc cyoc k'ajtzet cycabil chun, cycyakil xjal c'oquel cychmon cyib twitza ttzi ja xbalun te mojbabl tibil. 4Katzun junx chun ma tz'oc k'ajtzet, o'cxtzun cye nejenel cye junjun c'loj cyiyjil aj Israel c'oquel cychmon cyib tuc'ila. 5Octzun cyoc k'ajtzet tnejel maj chun ch'in cyxol tk'ajk'ajel, cbeltzun be cyu'n xjal cycub tuj tumlal tjawitz k'ij, 6ex oc cyoc k'ajtza'n tcabin maj chun, cbeltzun be cyu'n keju cycub tuj tumlal tnayaj k'ij. Oc cyoc k'ajtzet chun ch'in cyxol tk'ajk'ajel, atzun techal tu'n tcub be cyu'n xjal. 7Atzun oc cyoc k'ajtzet chun ma' cyxol tk'ajk'ajel, atzun techal tu'n toc cychmon cyib cycyakil xjal. 8Tuj cycwent pal, akeju tcy'ajal Aarón, tu'n cyoc k'ajtzet chun. Aju ley lu cyjel ten cyuc'ile te jumajx ex wikinwik cyjel cyma'ne cye cyc'wa'le. 9Ex ka ma che ul aj k'oj k'ojlel cyi'je tuj cytanmiye, c'oquel cyk'ajtza'ne chun ex che jawil sch'i'ne nim, tu'n cyexe k'ojlel cyuc'il, tu'ntzun cytzaj nna'ne, akine cymane ex Cydiose; ex che cletele wu'ne cywitz aj k'oj cyi'je. 10Ex cyk'ajtza'n oque chun cyuj k'ij te tzalajbil, cyuj nink'ij, ex cyuj k'ij oc cytzaj que'yin ac'aj xjaw, ex oc t-xi cyk'o'ne cyoyaje patun in cub ex ju chojbil te mojbabl tibil, tu'ntzun cytzaj nna'ne. Akine Cymane ex Cydiose, chi Kman te Moisés. 11Tuj winkin tajlal tcabin xjaw te tcabin abk'i, jaw lak'e' muj tibaj ja xbalun jatum c'u'n tley Dios, 12ex cubtzun be cyu'n aj Israel. E ic' tuj tzkij tx'otx' Sinaí ex atzun o we' muj tuj tzkij tx'otx' Parán. 13Atzun tnejel maj e bet ic tza'nx otok tzaj tma'n Kman te Moisés: 14Tnejelxix nejni ke soldad aj Judá tuc'il cybander k'i'n; aju nejenel cyxol soldad lu, atzun Naasón aju tcy'ajal Aminadab, 15atzun nejenel cyxol soldad tiyjil Isacar, atzun Natanael aju tcy'ajal Zuar, 16ex aju nejenel cyxol soldad tiyjil Zabulón, atzun Eliab aju tcy'ajal Helón. 17Tejtzun tbaj cyco'pin ja xbalun te mojbabl tibil, ake tiyjil Gersón ex tiyjil Merari e je'x ikante te ex cub be cyu'n. 18Lepchix e je'x soldad tiyjil Rubén, tuc'ix cybander k'i'n, ex aju nejenel cyxol, atzun Elisur aju tcy'ajal Sedeur; 19aju nejenel cyxol soldad tiyjil Simeón, atzun Selumiel aju tcy'ajal Zurisadai, 20ex aju nejenel cyxol soldad tiyjil Gad, atzun Eliasaf aju tcy'ajal Deuel. 21Lepchix e je'x ke tiyjil Coat, k'i'n ke macbil xjan cyu'n. Oc in che pon tuj jun lugar, ya otok jaw bincha'n ja xbalun te mojbabl tibil. 22Ex akeju lepchix cyi'j, atzun ke soldad tiyjil Efraín, tuc'ix cybander k'i'n, ex aju nejenel cyxol, atzun Elisama aju tcy'ajal Amiud; 23aju nejenel cyxol soldad tiyjil Manasés, atzun Gamaliel aju tcy'ajal Pedasur, 24ex aju nejenel cyxol soldad tiyjil Benjamín, atzun Abidán aju tcy'ajal Gedeoni. 25Te mancbilxitzun e je'x lpe' ke soldad tiyjil Dan, tuc'ix cybander k'i'n, ex aju nejenel cyxol, atzun Ahiezer aju tcy'ajal Amisadai; 26aju nejenel cyxol soldad tiyjil Azer, atzun Pagiel aju tcy'ajal Ocrán, 27ex aju nejenel cyxol soldad tiyjil Neftalí, atzun Ahira aju tcy'ajal Enán. 28Cyja'tzun e tenba ke soldad aj Israel tej cybet. 29At jun k'ij xi tma'n Moisés te Hobab aju tbalc, aju tcy'ajal Reuel, aju aj Madián ex tji' Moisés, ex chi cyja': —Ma ko'x keye tuj tx'otx' o tzaj ttziyan Kman tu'n ttzaj tk'o'n keye. Ko' kuc'ile ex ba'n ctela ku'ne, porque ma tzaj ttziyan Kman tu'n tbinchante ba'n cye aj Israel. 30Atzunte Hobab xi ttzak'we'n: —Mlay chinxe cyuc'ile, nok o'cx chin ajel meltz'aje tuj ntx'otx'e jatum ate' ke xjal at nxilene cyuc'il. 31Atzunte Moisés xi tma'n te: —Mi'n tz'aja, ojtzki'n ke lugar tu'na jatum ba'n tu'n kcub ten tuj tzkij tx'otx', ex jacu tz'ajbena yec'ul be keye. 32Ka ma txi'ya kuc'ile, jacu tz'oca te tajlal ku'ne ti'j tcyakilju ba'n tzul tk'o'n Kman keye. 33Cyja'tzun tten e ic' t-xe witz te Kman ex e bet ox k'ij. Aju cax c'ubl tley Dios nejnitok cywitz, in jyon ti'j jun lugar jatum tu'n cyojlan. 34Te k'ijl, oc ttzyet cybe, in bet muj te Kman cyibaj. 35Ex octzun tic' cyi'n cax, in xi tma'n Moisés cyja': We'ctza Nman. E cyel sputj ke aj k'oj ti'ja, ex e cyel ok keju in che ic'un teya. 36Ex oc tpon cax jatum tu'n tcub ten, in xi tma'n Moisés cyja': Tajtza ja'lo Nman cyuc'il cycyakil c'loj aj Israel miban cyajlanjtz.

will be added

X\