NEHEMÍAS 9

1Tuj 24 tajlal ax xjaw oc cychmon cyib aj Israel tu'n tcub cyyo'n we'yaj, oc cyk'o'n cyxbalun ch'i'x twitz ex jax cyjato'n tx'otx' tuj cywi', 2otok tz'el cypa'n cyib aj Israel cyi'j cycyakil stranjer xjal. E cub we' ex jatz cypa'n cyil tuc'ix cyil ke cyxe'chel. 3Tej ate'tok tuj cylugar, tuj ox or jaw sch'i'n cywitz aju yol in tma'n tuj tley Kman aju Cydios, ex tujtl ox or jatz cypa'n cyil ex e c'ulun te Kman. 4Te tibajxi jlu e jax aj Leví twi wa'lbil ex atzun ke jlu: Jesúa, Bani, Cadmiel, Sebanías, Buni, Serebías, Bani ex Quenani; cycyakil ke jlu e cubsan twitz Kman aju Cydios, tuc'il tk'ajk'ajel cywi' cyuwxix; 5atzun ke aj Leví, Jesúa, Cadmiel, Bani, Hasabnías, Serebías, Hodías, Sebanías ex Petaías xi cyma'n cye aj Israel: Che we'ctze, cynimsa'nctze tbi Kman aju Cydiose tuj tcyakil tabk'iyil te jumajx, ex nimanxwit tbi tu'nju ma' t-xilen, ex cyk'onxe chjonte te tuc'il nimbil. 6E octzun ten aj Israel na'l Dios cyja': Aya Kmane ex minti' juntl, aya binchante cya'j ex aju at max tibajxi cya'j, cyuc'ix cycyakil ke che'w ate'c twitz; aya binchante tx'otx' tuc'ix tcyakilju at twitz; aya binchante cye mar tuc'ix tcyakilju at cyuj. Aya in tk'o'na cychwinklal cycyakil; cyja'tzun, cycyakil keju ate' tuj cya'j nim cyajlal in che c'ulun twitza. 7Aya Nman Dios jaw t-sc'ona Abram, aya etz k'inte te tuj Ur aju cytanmi aj Caldey, ex aya oc k'onte juntl tbi Abraham. 8El tnic'a ti'j ka aju xinak lu k'ukl tc'u'j ti'ja, ex cyaj bant ti'j jun tyola tuc'il tu'n t-xi tk'o'na cytx'otx' aj Canaán cye tiyjil, tuc'ix cytx'otx' aj Hetey, aj Amorrey, aj Ferezey aj Jebusey ex aj Gergesey, ex ma japun tyola porque tz'aklxixa. 9O tila aju c'ixbisabl ic'x cyu'n ke kxe'chele tuj Ejipt ex o tbiya tej cyjaw ayayan ttzi Mar Cyak Que'yin. 10O tbinchaya ke binchben nim cyipumal ti'j rey Faraón, cyi'j cycyakil ke tmajen ex cyi'j cycyakil ke xjal ate'tok tuj ttanmi, porque o tila tej cyoc puro jawni cyi'j aj Israel. Cyja'tzun cyaj xe't tkanil ti'ja ka nim tipumala, ex cucx tten ja'lo. 11Cub tpa'na mar cywitz, ex atzun e ic'x aj Israel tuj tmij mar tuj tzkij, atzun ke aj k'oj cyi'j, e cyaj tmulk'i'na max t-xe'pun mar, mer ic tza'n jun abj in cu'x tz'ak max t-xe'pun nim a'. 12Te k'ijl cub neja cywitz tuj muj, ex te konic'an cub neja cywitz tuj tkan k'ak' tu'n t-spic'banteya tuj cybe jatum tu'n cybet. 13O cubila twi witz Sinaí ex max twitz cya'j tzaj yolina cyuc'il; tzaj tma'na cye ke yol tz'aklxix te cawbil, ke xnak'tzbil axix toc, ke ley ex ke mandamyent ba'nxix. 14Ax icx xi t-xnak'tza'na cye tu'n cyajben ke k'ij te ojlabl cyu'n te c'ulbil teya, ex tzaj tk'o'na ke mandamyent cye, cyuc'ix ke ley ex ke xnak'tzbil, aju tzaj tma'na te tmajena Moisés. 15Ax icx xi tk'o'na cywa, aju wabj tzaj tuj cya'j, tu'n tel we'yaj cyi'j ex tzaj tk'o'na cyc'a a' etz tuj pic, tu'n tel txketle'n cyi'j. Ex xi tma'na cye tu'n cyoc te tajwil tx'otx' aju otok txi ttziyana cye. 16Atzun ke kxe'chele jaw cyniman cyib, e oc miban che bin ex minti' xi cyniman ke tmandamyenta. 17Minti' xi cyniman tyola ex minti' tzaj cyna'n aju binchben nim tipumal otok bant tu'na te colbil cye. E oc miban che bin ex jaw cysc'o'n jun nejenel cyxol tu'n cyaj k'i'n juntl maj tu'n tuj yajbil cye tuj Ejipt. Pero aya jun Dios in cub tnajsa'na cyil xjal, at xtalbil tuc'ila, in k'ak'an tc'u'ja cyi'j xjal, yaj in tzaj tk'oja ex nim tc'ujlalila; cyja'tzun minti' e cyaj tcolina. 18Masque cub cybincha'n jun tilbilal tal wacẍ bincha'maj ti'j c'uxbil in cub ulj oc tocx k'o'n tuj k'ak', ex cyma ka atzun dios jlu otok tz'etz k'inte cye tuj Ejipt, ex cybincha mastl nintz il twitza; 19pero minti' e cyaj tcolina tuj lugar tzkij tx'otx', porque tzaj k'ak'an tc'u'ja cyi'j. Aju muj cub ten cyibaj k'ijl te yec'ul cybe minti' el tpa'n tib cyi'j, ax icx tkan k'ak' cub ten cyibaj te konic'an tu'n t-spic'bante tuj cybe minti' el tpa'n tib cyi'j. 20Ax icx xi tk'o'na T-xewa ba'n te xnak'tzalte cye. Cabal o canun wabj maná tzaj tk'o'na cye, ex xi tk'o'na a' te cyc'a tu'n tel txketle'n cyi'j. 21Tuj 40 abk'i e oc tc'a'chana tuj lugar tzkij tx'otx' ex cabal o canun tcyakil cye; minti' o baj cyxbalun ex minti' xi mal cykan. 22Xi tk'o'na ke cawbil ex ke mastl nasyon cye; xi t-sipana te cyetzbil, e oc te tajwil tx'otx' Hesbón jatum in cawintok rey Sehón, ex e oc te tajwil tx'otx' Basán jatum in cawintok rey Og. 23Tu'na chmet nim cybaj ke cyc'wa'l, ic tza'n cyajlal ke che'w ate' twitz cya'j, ex e pon ti'na tu'n cyc'monte ju tx'otx' te cyetzbil, aju otok txi ttziyana tu'n t-xi tk'o'na te cyetzbil ktzan cyman. 24E ocxtzun ke cyc'wa'l ex cub cyi'j ke xjal aj Canaán cyu'n, ex cycyakil ke xjal najlke tuj tx'otx' lu e cyaj tk'o'na tjak' cycawbil; atzun ke cyrey cyuc'ix ke mastl xjal ax najlke, e je'x tk'o'na tuj cyk'ab tu'n cybinchante cyi'j nok alcye cyajbil. 25E oc te cyajwil ke tnam toc muro cyi'j ex tbanil tx'otx', cyuc'ix ke ja nojni cyuj cyu'n ke ti'xti tbanilxix, ex ke xoch, ke tkan uva, ke tkan olivo ex mastl txcaj tze' ba'n tlo'njtz cywitz, e wa'n tejxi tnoj cyc'u'j wen, e gordyix ex e achin ti'j t-xtalbila nimxix. 26Pero e oc miban che bin, el cypa'n cyib ti'ja ex el cyic'un tleya. E cub cybyo'n ke t-sanjela tu'nju xi cychic'ba'n cyil ke xjal, ex tu'nju xi cyma'n cye tu'n cyajtz meltz'aj juntl maj tuc'ila, ex nimxix mya ba'n cybincha twitza. 27Cyja'tzun e je'x tk'o'na tu'n cycub tz'ak tuj cyk'ab aj k'oj cyi'j, ex e baj yajla'n cyu'n. Te tibajxi, tej cyna'nte ta'w yajbil cye, e octzun ten kanil onbil teya, atzun teya, tu'nju at nim tk'ak'bil tc'u'ja, e tzaj tbi'na max tuj cya'j ex e jaw buyj ke xinak te colol cyi'j tuj cyk'ab ke aj k'oj. 28Pero tej cyna'nte ate'tok ch'in tuj txubtxaj, in che oc ten juntl maj binchal mya ba'n twitza; cyja'tzun e cyaj tk'o'na tu'n cycub tz'ak tuj cyk'ab aj k'oj cyi'j ex e yajlanjtz cyu'n. Tu'n jlu e oc ten juntl maj kanil onbil teya, ex atzun teya, tu'nju at nimxix tk'ak'bil tc'u'ja, e tzaj tbi'ntla max tuj cya'j, ex nimcu maj e clet tu'na tuj yajbil cye. 29Xi tma'na cye tu'n tjapun juntl maj tleya cyu'n, atzun cye jaw cyniman cyib twitza ex minti' xi cyniman tmandamyenta, e ic' tibaj tcawbila aju in tk'o'n chwinklal teju xjal in japun tu'n, e oc miban che bin ex tx'u'j cywi', ex minti' xi cyniman tyola. 30Nim abk'i o ten tpasensa cyi'j ex xi tchic'ba'na cye tu'n tten cycwent cyi'j, xi tma'na cye tu'n T-xewa Xjan ex tu'n cyyol ke t-sanjela, pero minti' xi cybi'n, cyja'tzun e cyaj tk'o'na tjak' cycawbil mastl nasyon twitz tx'otx'. 31Masque icju, pero tu'nju at nim tk'ak'bil tc'u'ja, minti' e naj tu'na te jumajx ex minti' e cyaj tcolina; porque aya jun Dios at xtalbil tuc'ila ex at nim tk'ak'bil tc'u'ja. 32Cyja'tzun Kman Dios, aya Dios ma'xix toclena, at nim tipumala ex xobajilxixa, in japun tyola aju in cyaj bant ti'j tu'na ex aju tc'ujlalila nimxix cucx in ten, mi'n tz'oc tk'o'na te ch'in tcyakilju nintz castiw ma tzaj cyibaj kreye, cyibaj ke nejenel kxole, cyibaj ke pal ate' kxole, cyibaj ke t-sanjela ate' kxole, cyibaj ke kxe'chele ex cyibaj cycyakil xjal aj Israel; max tzaj xe't jlu tuj tk'ijlalil tej cyten ke rey te Asiria ex cucx tten ja'lo. 33Pero mya aya at til ti'j tcyakilju mya ba'n ma tzaj ki'je; porque tuj tumelxix aju ma tbinchaya, atzun keye ma kbinchaye mya ba'n. 34Tza'nx ke kreye, ax icx ke nejenel ate' kxole, ke pal ate' kxole, ex ke kxe'chele, minti' o japun tleya cyu'n; minti' xi cyniman ke tmandamyenta ex minti' xi cyniman aju xi tma'na cye. 35Tej cyten tuj cyex cycawbil ex tej ttzaj tk'o'na nim ti'xti cye tuj tx'otx' lu, aju nim ex tbanilxix, minti' e c'ulun teya ex minti' cyaj cycolin cybinchben mya ba'n. 36Ko tque'yintza ja'lo, ma ko oque te majen tujx tx'otx' tzaj tk'o'na cye kxe'chele tu'n cywa'n ti'j tcyakil twitz awal in tzaj tk'o'n ex ti'j k'inumabl at tuj. 37Aju twitz awal nimxix in tzaj tk'o'n tx'otx', atzun in xi k'o'n cye ke rey, akeju ma che oc tk'o'na te cawil kibaje tu'n tlaj kile, ex in cybincha'n ki'je nok alcye cyajbil ex cyi'j ke kalune. Cyja'tzun puro bis ato'ye, che chi aj Israel tuj cyna'j Dios. 38Tu'n tcyakil jlu a ko'ye ma txi ktziyane jun yol axix toc ex ma cub ktz'ibane twitz jun u'j, ex aju u'j ma tz'oc cyseyarin ke nejenel keye, cyuc'ix ke aj Leví ex ke pal, ex ma che pirmarin ti'j.

will be added

X\