NEHEMÍAS 8

1octzun cychmon cyib cycyakil xjal tuj plas tcub nikayin twitz tpwertil tnam, Tpwertil A' tbi, ex xi cyma'n te Esdras aju xnak'tzal ti'j ley, tu'n ttzaj ti'n libro te ley aju cyaj ttz'iban Moisés, aju otok tzaj tk'o'n Kman cye aj Israel. 2Tuj tnejel k'ij te twukin xjaw, ate Esdras aju toc te pal, ul ti'n libro te ley tuj buyj tibil jatum baj cychmon cyib ke xinak ex ke xu'j, cyuc'ix cycyakil keju otok tz'oc cynabl; 3jaw t-sch'i'n Esdras libro te ley cywitz cycyakil xjal, tzyet-x te prim ex cucx t-sch'in tejxi tpon chilcuk'ij, ex atzun cub we' twitz plas tcub nikayin ttxlaj tpwertil tnam Tpwertil A' tbi. Cycyakil xjal in che bin ti'j ley tej tjaw t-sch'i'n. 4Ate Esdras aju xnak'tzal ti'j ley, wa'ltok tibaj jun wa'lbil tz'lom aju otok cub bincha'n tu'n tajben tuj k'ij lu, ex tuj tbank'ab wa'lketok Matatías, Sema, Anías, Urías, Hilcías ex Maasías ttxlaj. Atzun tuj tnayaj e cub ten Pedaías, Misael, Malquías, Hasum, Hasbadana, Zacarías ex Mesulam. 5Cubtzun tjako'n Esdras libro te ley cywitz cycyakil xjal, ex tu'nju ma' tjaw aju wa'lbil twitz cya'j, cyja'tzun k'ancha'l cye cycyakil xjal. Tejtzun tjaket libro, cycyakil xjal e cub we'. 6Octzun ten Esdras nimsal tbi Kman aju Dios ma'xix toclen, ex cycyakil xjal jaw cyi'n cyk'ab twitz cya'j ex cyma: Icxwitju, icxwitju; e cub ẍmeje' tejxi tpon tacl tibaj cywitz max twitz tx'otx' ex e oc ten c'ulul te Kman. 7Atzun ke aj Leví: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán ex Pelaía, atzun ke jlu e je'x chic'bante tley Dios cye xjal, atzun cye xjal ax wa'lketok tujx cylugar. 8Jaw cysch'i'n aj Leví aju in tma'n tuj libro te tley Dios tuc'il tk'ajk'ajel cywi' cyuw, ex xi cychic'ba'n aju in tma'n tuj libro tu'n tel cynic' xjal cabalxix ti'j. 9Cycyakil xjal e oc ten ok'el tej cybinte aju in tma'n ley, atzunte Nehemías aju gobernador, tuc'ix Esdras aju xnak'tzal ti'j ley ex pal, cyuc'ix aj Leví, akeju e je'x chic'bante ley cye xjal, xi cyma'n cye cycyakil tu'n mi'n cybisun ex tu'n mi'n cyok', porque aju k'ij lu pa'maj tu'n tajben te c'ulbil te Dios, aju Cydios. 10Ax icx xi tma'n Nehemías cye: Cyaje ex che chyo'ne ti'j tbanil chibj, che c'ane ta'l twitz uva chi' ex cyk'onxe ch'in cye keju minti' banimaj cye, porque aju k'ij lu, jun k'ij pa'maj tu'n Kman tu'n tajben te c'ulbil te. Mi'n che bisune, porque aju tzalajbil tu'n Kman in tk'o'n cyipumale. 11Ax icx ke aj Leví xi cyk'ukba'n cyc'u'j xjal, xi cyma'n cye tu'n mi'n cyk'ajt ex tu'n mi'n cyok', porque aju k'ij lu pa'maj tu'n Kman tu'n tajben te c'ulbil te. 12Cycyakiltzun xjal e je'x wa'l ex c'al, ex xi cyk'o'n cywa keju minti' cywa banimaj ex cub cyic'san jun nintz nink'ij tu'nju cabalxix el cynic' ti'j ju otok tzaj xnak'tza'n cye. 13Tuj juntl k'ij cycyakil ke nejenel cye junjun c'loj xjal at cyxilen cyxolx, cyuc'ix ke pal ex ke aj Leví, oc cychmon cyib tuc'il Esdras aju xnak'tzal ti'j ley, tu'n cyxnak'tzan ti'j ju in tma'n ley, 14ex e oc noj ti'j jun yol tz'iban tuj ley jatum in tma'n aju otok tma Kman te Moisés, ka tuj twukin xjaw il ti'j tu'n tcub cyic'sa'n aj Israel nink'ij, cyk'ijlalil ke tal ja t-xak tze'yin cywi' ex il ti'j tu'n cyten cyuj. 15Extzun tkanil cyuj cycyakil tnam ex tuj Jerusalén, tu'n cyxi' xjal tuj c'ul jyolte t-xak olivo, t-xak k'atxab, t-xak xa'j ex mastl tze' polin cyxak, tu'n tbaj cybincha'n ke tal ja t-xak tze'yin cywi', ic tza'n tz'ibamaj tuj ley. 16E extzun ke xjal ex e ul meltz'aj k'i'n t-xak tze' cyu'n, tu'n cybant tal ja t-xak tze'yin cywi', twi cyja ex ka ttxa'n cype'n teyle junjun, ax icx ttxa'n tpe'n tja Dios ex tuj plas tcub ttxlaj tpwertil tnam aju toc tbi Tpwertil A', ax icx tuj juntl plas tcub ttxlaj tpwertil tnam, aju toc tbi Pwert te Efraín. 17Cycyakil aj Israel, akeju otok che etz tuj Babilonia ex otok che ul tuj Jerusalén, jaw cybincha'n ke tal ja t-xak tze'yin cywi', ex axtzun e ten cyuj. Atxix tuj tk'ijlalil Josué aju tcy'ajal Nun, bajxtok bant jun maj ic tza'nju o bant tuj k'ij lu, ex nimxix e tzalaj ke xjal. 18Tuj enter wuk k'ij cub cyic'sa'n nink'ij ex tcyakil k'ij jaw t-sch'i'n Esdras junjun tnej yol in tma'n tuj libro te tley Dios; tzyet tu'n tuj tnejel k'ij ex pon baj tuj mancbil k'ij, ex tuj tumin k'ij oc jun buyj tibil cyu'n ma' t-xilen, ic tza'n tz'iban tuj ley.

will be added

X\