NEHEMÍAS 6

1Tejtzun cybinte Sanbalat, Tobías, Gesem aju aj Arabia, ex mastl aj k'oj ki'je, ka otok jaw nbincha'ntle muro ex otok makset tcyakil jatum ba'n tu'n cyoctz aj k'oj, (o'cxcu ke pwert na'nxtok cyoc baj nk'o'ne), 2ul cysama'n Sanbalat ex Gesem jun tkanil wuc'ile tu'n tpon kchmon kibe cyuc'il tuj jun aldey tuj chk'ajlaj Ono tbi. Pero aju mer cyximbetz tu'n cybinchante mya ba'n wi'je. 3E je'xtzun nsama'ne ke sanjel k'malte cye cyja': Minti' ambil wi'je ex at nim wak'une ilxix ti'j tu'n tbant, cyja'tzun mlay chinxe; jacu we' ak'untl ka ma chinxe jatum in cyma'ne tu'n npone, nchiye cye. 4Cyaje maj ul cysama'n ax tkanil lu wuc'ile, pero ax tzak'webl aj nk'o'ne ic tza'nx otok txi nma'ne nej. 5Ul t-sama'n Sanbalat tjwe'yin maj jun tmajen k'olte ax tkanil lu tz'iban tuj jun u'j jako'maj. 6Chi in tma'n tuj u'j cyja': In bet tkanil cyxol mastl nasyon, ax icx in tma'n Gesem ka ax toc, ka aya ex ke xjal Judiy in che ximane ti'j tu'n tjaw cyi'n cyibe ti'j rey ex tu'ntzunju ma jaw cybincha'ne muro ti'jele tnam, ax icx in cyma'n ka aya taja tu'n toca te rey, 7ex ma tz'oc tk'o'na cyoclen ke t-sanjel Dios tu'n t-xi cyma'n cye xjal aj Jerusalén ka at rey tuj Judá. Mya yajcu binjtz tkanil lu tu'n rey Artajerjes, cyja'tzun ba'n tu'n ttzaja tu'n kyolin o'cx ke, chi Sanbalat tuj u'j. 8Atzun weye aj nsama'ne tzak'webl ex xi nma'ne te ka mya ax toc aju in tma'n, ex ka nok tu'nx otok jaw jlet jlu tuj tnabl. 9Atzun cye o che jyon tumel tu'n koc sec'pu'ne cyu'n; tuj cyximbetz ka tu'n ttzaj baj kc'u'je, tu'ntzun mi'n tpon baj ak'untl ku'ne, atzun weye xi nma'ne te Dios cyja': Nman Dios, chin tonintza tu'n tpon baj ak'untl wu'ne. 10Te tibajxi inxe tja Semaías aju tcy'ajal Delaía ex tal tchman Mehetabel; otok tz'ocx tlamon tib tuj tja ex tzaj tma'n weye: Ko ocx tuj tja Dios ex che eletz klamo'n ke pwert, porque tuj ak'bil lu che ul xjal byolte teya. 11Atzun weye xi ntzak'we'ne: ¿Ba'npe tu'n tel ok jun xinak ic tza'n kine tu'n tocx tclon tib tuj tja Dios tu'n mi'n tcub byo'n? Mlay chinx oke tuj tja Dios, nchiye te. 12Ax icx el nnic'e ti'j, mya tu'n Dios otok tzaj k'ma'n ju yol lu te; tzaj tma'n icju porque otok tc'am pwak tu'n Sanbalat ex Tobías; 13xi cyk'o'n xjal pwak lu te, tu'ntzun woc xobtzane cyu'n ex tu'n nbinchane il twitz Dios. Nokwit o nbinchaye icju, owtlo che yolin mya ba'n wi'je ex owtlo chin ele tuj nch'ixwiye cyu'n. 14Nman Dios: Na'ntza aju ma cybincha Sanbalat ex Tobías. Ax icx mi'n tzic' tna'l tu'na aju ma tbincha Noadías wi'je, aju xu'j oc tk'on tib te t-sanjela, ex ke mastl xjal oc cyk'on cyib te t-sanjela, akeju o cyajbe tu'n ttzaj baj nc'u'je cyu'n. 15Baj bant muro tuj 25 tajlal xjaw Elul tbi, ex 52 k'ij xi ti'n tu'n tbaj bant. 16Tej cybinte aj k'oj ki'je, ex ke xjal ate' cyuj ke nasyon ate' ki'jele ka otok baj bant muro ku'ne, tzaj nim cyxobil ex bi'x naj cynimbil cyib, porque el cynic' ti'j ka aju ak'untl lu otok bant nok tu'nju onbil tu'n Dios. 17Tuj enter 52 k'ij lu, nim u'j ul t-sama'n Tobías cyuc'il xjal Judiy ma' cyoclen, ax icx ke xjal Judiy xi cysama'n ela' u'j tuc'il Tobías, 18porque nim xjal Judiy otok moje' cyyol tuc'il Tobías, porque ate Tobías otok tz'oc te tji' Secanías aju tcy'ajal Ara, ex aju tcy'ajal Tobías, aju Johanán tbi, otok moje' tuc'il tme'jel Mesulam aju tcy'ajal Berequías. 19Cucx in che pon aj xjal k'malte weye ka ba'n tmod Tobías, ax icx in che'x aj k'malte tuc'il Tobías aju in chin yoline ti'j. Atzunte Tobías nim u'j ul t-sama'n wuc'ile tu'n ttzaj baj nc'u'je tu'n.

will be added

X\