NEHEMÍAS 5

1Tuj tk'ijlalil lu tzaj jun yol cyu'n ke xinak ex cyu'n ke cyxu'jil cyi'jx cyxjalil ax Judiy ke. 2At junjun in cyma'n cyja': At nimcu kcy'ajale ex kme'jele ex kaje tu'n ttzaj k'o'n ch'in triw te kwaye tu'ntzun mi'n kcyime tu'n we'yaj; 3atzun txkantl in cyma'n: Ma txi kk'o'ne ktx'otx'e, tkan k-uvaye ex kjaye te prent nok tu'n tlak'et kwaye tu'n tlaj we'yaj, 4ex at junjuntl in cyma'n: Ma tz'el kch'exo'ne pwak tu'n tchjet chojenj ku'ne, aju nne'l tkanin rey ti'j ktx'otx'e ex ti'j tkan k-uvaye. 5Tza'nx ke kxjalile ax icx keye junx kiyjile; ke kc'wa'le junx ta' cyoclen cyuc'il ke cye cyc'wa'l. Pero masque icju, il ti'j tu'n t-xi kk'o'ne kcy'ajale ex kme'jele tu'n cyoc te majen. Ex at junjun kme'jele ate' naj te majen, ex mlayx bant tu'n tmayet jlu ku'ne, porque ma cyaj ten ktx'otx'e ex tkan k-uvaye tuj tcwent juntl, che chi. 6Tejtzun nbinteye aju in baj cyi'j, tzaj nimxix nk'oje. 7Te tibajxi, tej tbaj nximane ti'j, e je'x ncawine ke xjal Judiy, akeju k'inun ex aj sanjelal at cyoclen tu'n gobierni, ex xi nma'ne cye: ¿Tiku'n nne'l cykanine ta'l ch'ex pwak cye cyxjalile? Extzun jun tkanil wu'ne tu'n cytzaj baj cycyakil xjal tu'n tbant ti'j jlu, 8ex xi nma'ne cye: Keye nic'punlo ma bant ku'ne tu'n cyclet ke kxjalil, akeju otok che'x c'ayin cyuj ke nasyon jatum ate' ke xjal mya nimal Dios ke, atzun cyeye ja'lo minti' in xi cyk'o'ne triw te cywa cyxjalile ka minti' ma tzaj cyc'ayin cyc'wa'l te cymajene. Entons il ti'j tu'n kxi'ye juntl maj colpil cye. Atzun cye minti' e k'ajt, tu'nju minti' tumel tu'n tmojtzet yol cyu'n. 9Ex xi nma'ntle cye: Mya ba'n aju in cybincha'ne. ¿Myapelo mas ba'n tu'n cyxobe twitz Kman, tu'ntzun mi'n cyxmayin xjal ki'j, akeju mya nimal Dios ke, akeju aj k'oj ki'j? 10Ax icx weye cyuc'ix keju at nxilene cyuc'il ex keju onil weye o txi kk'o'ne pwak ex triw te cych'ex, pero ba'n tu'n tcub knajsa'n cyc'as. 11Ax icx ba'n tu'n taj cyk'o'ne cytx'otx' bi'x ja'lo, tuc'ix tkan cy-uva, tkan cy-olivo ex cyja, ex ba'n tu'n tcub cynajsa'ne cyc'as, ka pwak, ka twitz awal, ka vin ex ka chibj aseyt, nchiye, xi nma'ne cye. 12Atzun cye tzaj cytzak'we'n: Jacu tz'aj kk'o'ne tcyakil jlu ex mlay txi kkanintle cyc'as at kuc'ile. Cbantel ku'ne tcyakil ic tza'nx ma tzaj tma'na keye, che chi. E tzaj ntxco'ne ke pal, ex cywitztzun xi nma'ne tu'n t-xi cytziyan jun yol axix toc tu'n tbant cyu'n aju otok cyma. 13Ax icx el nchito'ne ti'j nxbalune ex xi nma'ne cyja': Ictzun c'elex tchito'n Dios ke xjal tuj cyja ex tuj cytx'otx', akeju minti' ma japun yol lu cyu'n aju ma txi cytziyan, ex cyja'tzun c'elel ti'n Dios tcyakilju at cye, nchiye, xi nma'ne. Cycyakil xjal tzaj cytzak'we'n: Bant-xwit icju; jawtzun cynimsa'n tbi Kman ex o japun cyu'n tcyakilju yol otok txi cytziyan. 14Ax icx tej woc k'o'ne te gobernador tuj Judá tu'n rey Artajerjes, tzyet wu'ne tej otok bant winkin abk'i ttzyetlen tcawin rey ex pon baj tuj 32 abk'i te tcawbil, ex tuj cablaj abk'i lu, mi akine mi keju onil ate' wuc'ile, minti' tzaj kc'mo'ne twi kc'u'je ex mi jun onbil cyu'n xjal aj Judá. 15Atzun ke gobernador e ten tej na'nxtok wule, e oc te iktz cye tnam xjal, porque nne'l cype'yin xjal 40 sak pwak tu'n tajben te twi cywa ex te twi cyc'a vin, ex ax ke cymajen gobernador e oc ten yajlal cye tnam xjal. Atzun weye minti' bant wu'ne icju, tu'nju in chin xobe twitz Dios. 16Ax icx weye ma jaw nbincha'ne jun piẍ muro ti'j tnam, ax icx cycyakil aj sanjelal ate' ntxlaje ma che ak'nan ti'j ak'untl lu ex minti' ma cub ketzane jun piẍ tx'otx'. 17In che cub ke' 150 xjal wa'l ti'j nmese; at Judiy ex at ma' cyoclen tuj tcawbil gobierni, ex minti' in che oc te tajlal akeju in che tzaj tuj juntl nasyon visitarilte keye. 18Ex aju in bant wu'ne tcyakil k'ij tuj wexe ncwent, atzun jlu: Ncub byet jun wacẍ, kak ẍne'l tbanilxix ex nim ec'; ex tuj lajchak k'ij in xi nma'ne tu'n tul k'i'n nim ta'l twitz uva te kc'aye. Masque icju, minti' xi nkanine twi nc'u'je, aju at woclene ti'j tu'nju gobernador kine, porque nimxix talil iktz tcubtok cyibaj tnam xjal lu. 19Nman Dios, na'ntza tcyakil aju ba'n ma nbinchaye ti'j tnam lu, ex k'ontza tcy'iwbila wibaje.

will be added

X\