NEHEMÍAS 13

1Tuj tk'ijlalil lu jaw sch'i'n tu'jil tley Moisés cywitz cycyakil xjal, ex tujtzun tu'jil tley Moisés cnet jatum tz'ibamaj cyi'j aj Amón ex aj Moab, ka jumajx minti' cyoclen tu'n cyten cyxol ke xjal etzan tu'n Dios, 2porque minti' e etz canul cyi'j aj Israel tuc'il wabj ex c'abj, nok o'cx xi cyk'o'n pwak te Balaam tu'n t-xi tkanin mya ba'n cyibaj. Masque icju, pero tzaj tk'o'n Kman Dios cy'iwbil cyibaj te t-xel mya ba'n. 3Tejtzun cybinte aju ley lu, e ex cylajo'n aj Israel ke stranjer xjal najlketok cyxol. 4Otok tz'el k'ij tuj tcwenttok pal Eliasib ta' ke ja tuj tja Dios jatum c'u'n ke oyaj, ex tu'nju otok tz'oc tamiwin tib Eliasib tuc'il Tobías, 5cyja'tzun otok txi tk'o'n jun cwart matij te, jatum nno'cx c'u't tcyakil oyaj nej, ex atzun ke jlu: Storac, ke macbil, aju tlaji'n nne'l k'i'n ti'j twitz triw, ti'j ta'l twitz uva ex ti'j aseyt, aju k'ma'maj tu'n t-xi k'ot cye aj Leví, cye bitzal ex cye ke xk'ukil ttzi tja Dios, ax icx jatum in xi c'u't aju onbil in xi k'ot cye ke pal. 6Mi a'ltok kine tuj Jerusalén tej tbaj jlu, porque tej otok bant 32 abk'i ttzyetlen tcawin Artajerjes aju rey te Babilonia, in aj meltz'aje tuc'il tuj Babilonia ex tbajlenxi ela' k'ij, xi nkanine permis te, 7ex in ajtztzune juntl maj tu'n wule tuj Jerusalén. Atzun el nnic'e ti'j aju mya ba'n otok tbincha Eliasib, tu'nju otok txi tk'o'n jun cwart matij te Tobías, aju cwart tcub twitz tja Dios. 8A jlu mya ba'n e'la tuj nwitze, cyja'tzun e je'tz wi'ne tcyakil ti'xti te Tobías tocxsa'n tuj cwart lu, 9ex xi nk'o'ne orden tu'n t-sakset cwart, ex tu'n tocx cyk'o'n juntl maj tuj cwart lu, ke macbil in che ajben tuj tja Dios, ke oyaj ex storac. 10Ax icx o nbiye ka minti' otok txi cyk'o'n xjal cyoyaj, aju banimaj ti'j tu'n t-xi k'ot cye aj Leví; ex tu'n jlu, ke aj Leví ex ke bitzal, akeju at cyoclen tu'n cyk'o'n c'ulbil, teyle junjun otok tz'aj ok tuj tex ttx'otx'. 11E octzun wic'le'ne ke cawil, tu'nju otok cyaj cycolin tja Dios. Te tibajxi e oc nchmo'ne ke pal ex ke aj Leví, ex cyaj bant cyten wu'ne juntl maj tuj cyak'un. 12Ex cycyakil xjal aj Judá ul cyi'n juntl maj tlaji'n ti'j twitz triw, ti'j ta'l twitz uva ex ti'j aseyt, tuj ja te c'ubl oyaj. 13E cyajtzun nk'o'ne ke ja c'ubl twitz awal tuj tcwent pal Selemías, tuc'ix Sadoc aju aj tz'ibal, ex tuc'ix jun aj Leví Pedaías tbi, ex oc nk'o'ne Hanán te onil cye, aju tcy'ajal Zacur ex tal tchman Matanías, porque cycyakil jlu k'uklxix nc'u'je cyi'j. Atzun ke at cyoclen tu'n tcub cysipan ke oyaj cyxol ke cyuc'il. 14Nman Dios: Chin tna'ntza ti'j ju ma bant wu'ne ex mi'n tzic' tna'l tu'na ju ba'n ma nbinchaye ti'j tjaya ex cyi'j ke c'ulbil. 15Tuj tk'ijlalil lu, o wile tuj Judá at junjun xjal in che wabin twitz uva tuj jun choc tu'n tbant vin tuj k'ij te ojlabl, ex at in che ikan triw tuj che'lin tten, ax icx at nno'c cyk'o'n ke bur ikal ta'l twitz uva, ex ke rasim twitz uva tuc'ix twitz higo ex tcyakil txcaj iktz tu'n t-xi cyc'ayin tuj Jerusalén, ax tuj k'ij te ojlabl. E octzun wic'le'ne tu'nju in che c'ayin tuj k'ij lu. 16Ax icx at junjun xjal aj Tiro, akeju ax najlke tuj Jerusalén, in pon cyi'n cyiẍ ex tcyakil txcaj c'aẍjel, in che c'ayin ti'j cye xjal Judiy tuj Jerusalén tuj k'ij te ojlabl. 17E octzun wic'le'ne ke nejenel cye xjal aj Judá ex xi nma'ne cye cyja': —¿Tiku'n ma cybinchaye mya ba'n, tu'nju ma tz'oc cyk'o'ne k'ij te ojlabl te minti' tajben? 18Atzun jlu cybincha ke cyxe'chele, ex tu'ntzun jlu ma tzaj ti'n Kman nimcu mya ba'n kibaj ex tibaj tnam lu. ¿Myapetzun tu'n ttzaj mas tk'oj Dios cyi'j aj Israel tu'nju ma tz'oc cyk'o'ne k'ij te ojlabl te minti' tajben? 19Xi nma'ne cye tu'n cylamet naj ke tpwertil tnam Jerusalén, o'cx oc toc kax tuj viernes ex max tu'n cyjaket ocxi tex k'ij sábado. E cub nk'o'ne junjun xjal ajbel weye ttzi tpwertil tnam, tu'n mi'n toctz mi jun iktz tuj k'ij te ojlabl. 20Ke comersyant ex ke c'ayil, ex jun konic'an cyu'n jun maj, ex ka cab maj, ti'jxi tnam Jerusalén. 21Pero in yoline cyuc'il ti'j jlu, ex e oc wic'le'ne tu'nju e cyaj tan twitz muro te tnam, ax icx xi ma'ne cye: Ka ma cybinchaye juntl maj icju, che oquex nk'o'ne pres, nchiye. Atxixtzun ya minti'tl e ul tuj k'ij te ojlabl. 22Te tibajxi xi nk'o'ne orden cye aj Leví tu'n tbaj cyxjansan cyib ex tu'n cyxi' xk'ukil cye tpwertil tnam, tu'ntzun mi'n tbant jun mya ba'n tuj k'ij te ojlabl. Nman Dios: Chin tna'ntza ti'j jlu ex k'ak'antz tc'u'ja wi'je, ic tza'n tc'ujlalila nimxix. 23Ax icx tuj tk'ijlalil lu o wile attok junjun xjal Judiy otok che moje' cyuc'il ke xu'j aj Asdod, aj Amón ex aj Moab; 24ex mij cyc'wa'l in che yolin tuj cyyol aj Asdod ex ka tuj cyyol mastl nasyon, pero minti' ba'n cyyol xjal Judiy cyu'n. 25In yoline cyuc'il ti'j jlu ex tzaj nkanine mya ba'n cyibaj; at junjun e baj nc'ixbisa'ne ex jatz nbako'ne ttzmal cywi', ex e oc nlajwersine tu'n t-xi cytziyan jun yol axix toc twitz Dios, tu'n mi'n txi cyk'o'n ambil cye cyme'jel tu'n cymoje' cyuc'il cycy'ajal stranjer xjal, ex tu'n mi'n ttzaj cyi'n cyme'jel stranjer xjal te t-xu'jil cycy'ajal, ex tu'n mi'n cyoc ke xu'j stranjer xjal te cyex cyxu'jil. Ax icx xi nma'ne cye: 26Atzun il jlu tbincha Salomón aju rey cye aj Israel. Mi jun rey cyuj mastl nasyon pon ic tza'n te, o c'ujlanjtz tu'n Dios ex oc k'o'n te rey cyibaj cycyakil aj Israel. Masque icju, pero nok tu'n cylaj ke xu'j stranjer xjal, binchan rey Salomón il. 27Cyja'tzun mi'n wajtle tu'n nbinteye ti'j matij il in cybincha'ne twitz Kman Dios, tu'nju in che moje'ye cyuc'il ke xu'j stranjer xjal, nchiye cye. 28At jun tcy'ajal Joiada ex tal tchman tnejel pal Eliasib, otok tz'oc te tji' Sanbalat aju aj Bet-horón; bi'x ex nlajo'ne k'a lu tu'n mi'n ttentl nwitze. 29Nman Dios, na'ntza cyil ke pal ma baj cytz'ilsa'n cyoclen ex ma che ic' tibaj yol cyaj bant ti'j tu'na cyuc'il ke pal ex ke aj Leví. 30Cyja'tzun, xi nk'o'ne orden cye tu'n tel cypa'n cyib ti'j tcyakil mya ba'n in cybincha'n stranjer xjal, ex banttzun cyu'n icju. Banttzun cyten ke pal ex ke aj Leví wu'ne tuj cyturn, teyle junjun alcye tu'n tbant tu'n. 31Ax icx cyaj bant ti'j wu'ne alcye tu'n ttzaj k'inte si' tuj k'ij banin ti'j ex tu'n ttzaj cyi'n xjal tnejel twitz cyawal. Nman Dios: Chin tna'ntza ex k'ontza t-xtalbila wibaje.

will be added

X\