NEHEMÍAS 12

1Atzun ke pal jlu ex ke aj Leví, akeju e etz tuj Babilonia junx tuc'il Zorobabel aju tcy'ajal Salatiel, ex tuc'il Jesúa. Atzun cybi ke pal jlu: Seraías, Jeremías, Esdras, 2Amarías, Maluc, Hatús, 3Secanías, Rehum, Meremot, 4Iddo, Gineto, Abías 5Mijamín, Maadías, Bilga, 6Semaías, Joiarib, Jedaías, 7Salú, Amoc, Hilcías ex Jedaías. Atzun ke nejenel cye ke pal jlu ex nejenel ke cye keju at cyxilen cyuc'il tuj tk'ijlalil Jesúa. 8Ke aj Leví atzun ke jlu: Jesúa, Binúi, Cadmiel, Serebías, Judá ex Matanías, cyuc'ix ke cyuc'il; atzun ke at cyoclen tu'n cybitzan bitz te nimbil te Dios; 9tuc'ix Bacbuquías ex Uni, ax cabetl cyuc'il jlu, ex atzun ke in che cub ten cywitz tuj juntl pac' oc in che bitzan. 10Ate Jesúa tman Joiacim, atzunte Joiacim tman Eliasib, atzunte Eliasib tman Joiada, 11atzunte Joiada tman Jonatán, ex atzunte Jonatán tman Jadúa. 12Ke pal nejenel ke cye junjun c'loj pal at cyxilen cyuc'il tuj tk'ijlalil Joiacim, atzun ke jlu: Aju nejenel cye tiyjil Seraías, atzun Meraías; aju nejenel cye tiyjil Jeremías, atzun Hananías; 13aju nejenel cye tiyjil Esdras, atzun Mesulam; aju nejenel cye tiyjil Amarías, atzun Johanán; 14aju nejenel cye tiyjil Melicú, atzun Jonatán; aju nejenel cye tiyjil Sebanías, atzun José; 15aju nejenel cye tiyjil Harim, atzun Adna; aju nejenel cye tiyjil Meraiot, atzun Helcai; 16aju nejenel cye tiyjil Iddo, atzun Zacarías, aju nejenel cye tiyjil Ginetón, atzun Mesulam; 17aju nejenel cye tiyjil Abías, atzun Zicri; aju nejenel cye tiyjil Miniamín ex te Moadías, atzun Piltai; 18aju nejenel cye tiyjil Bilga, atzun Samúa; aju nejenel cye tiyjil Semaías, atzun Jonatán; 19aju nejenel cye tiyjil Joiarib, atzun Matenai; aju nejenel cye tiyjil Jedaías, atzun Uzi; 20aju nejenel cye tiyjil Salai, atzun Calai, aju nejenel cye tiyjil Amoc, atzun Eber; 21aju nejenel cye tiyjil Hilcías, atzun Hasabías; aju nejenel cye tiyjil Jedaías, atzun Natanael. 22Tz'ibamaj cybi ke nejenel cye junjun c'loj aj Leví at cyxilen cyxolx, ax icx cye pal, atxix tuj tk'ijlalil Eliasib, Joiada, Johanán ex Jadúa, tejxi tcawin Darío aju aj Persia. 23Ke nejenel cye junjun c'loj aj Leví at cyxilen cyxolx, atzun tz'iban cybi tuj u'j jatum ta' tcyakilju tx'olbaben ti'j cyak'unben, ex ul baj tuj tk'ijlalil Johanán aju tcy'ajal Eliasib. 24Ke nejenel cye aj Leví, atzun ke jlu: Hasabías, Serebías, Jesúa aju tcy'ajal Cadmiel, cyuc'ix ke cyuc'il in che cub ten cywitz tuj juntl pac', in jaw cynimsa'n tbi Kman ex in xi cyk'o'n chjonte te oc in tzaj cytzak'we'n tuj cybitz, ic tza'n k'ma'maj tu'n David aju tmajen Dios. 25Ex akeju in che xk'ukin cytzi tlamel ja c'ubl twitz awal, atzun ke jlu: Matanías, Bacbuquías, Obadías, Mesulam, Talmón ex Acub. 26Ake jlu e ten tuj tk'ijlalil Joiacim aju tcy'ajal Jesúa ex tal tchman Josadac, ex tuj tk'ijlalil gobernador Nehemías ex tuj tk'ijlalil Esdras aju pal ex xnak'tzal ti'j ley. 27Tejtzun tpon k'ij tu'n tic'set tk'ijlalil muro toc ti'j Jerusalén, e jyonjtz ke aj Leví tuj tcyakil lugar jatum najlke, e je'xtzun k'i'n tuj Jerusalén tu'n tic'set tk'ijlalil muro tuc'il tzalajbil, tu'n tjaw nimset tbi Dios tuc'il bitz ex cyuc'il chnab, lak c'uxbil, quitar ex arpa. 28Ex oc cychmon cyib ke bitzal, akeju najlke ti'jele Jerusalén cyuc'ix keju ate' cyuj ke aldey te Netofa, 29cyuc'ix keju ate' tuj Bet-gilgal, cyuc'ix keju ate' tuj cojbil at tuj Geba ex tuj Azmavet; porque akeju bitzal otok che cub ten najal cyuj ke aldey ate' ti'jele Jerusalén. 30Tejtzun tbaj cyxjansan cyib ke pal ex ke aj Leví, e oc ten xjansal cye tnam xjal, cyuc'ix ke tpwertil tnam ex ju muro. 31Te tibajxi xi nma'ne tu'n cyjax ke nejenel cye aj Judá twi muro, ex e oc nk'o'ne cabe c'loj bitzal nim cyajlal. Aju tnejel c'loj cyja' e je'x bet tibaj muro tuj bank'abaj tumlal pwert jatum nne'x chitet tz'is. 32Cyi'jxi ke bitzal, lepchix t-xi' Osaías, cyuc'il mij nejenel cye aj Judá, 33tuc'ix Azarías, Esdras, Mesulam, 34Judá, Benjamín, Semaías ex Jeremías. 35Ke pal ate' cyuc'il, akeju in che k'ajtzan chun, atzun ke jlu: Zacarías aju tcy'ajal Jonatán, ate Jonatán tcy'ajal Semaías, atzunte Semaías tcy'ajal Matanías, atzunte Matanías tcy'ajal Micaías, atzunte Micaías tcy'ajal Zacur, ex atzunte Zacur tcy'ajal Asaf. 36Ke mastl cyerman atzun ke jlu: Semaías, Azarael, Milalai, Gilalai, Maai, Natanael, Judá ex Hanani, ex atzun ke jlu in che k'ajtzan ke chnab, ic tza'n ke chnab e ajben tu'n David aju tmajen Dios, ex atzunte Esdras aju xnak'tzal ti'j ley, nejnitok cywitz. 37Tej cypon jatum ta' Pwert Twi A' tbi, e je'x bettl ex e jax cywi' ke grad aju in japun jatum ta' tnam toc tbi Ttanmi David, ex cucx e jax tu'n cyjapun jatum cub ten tja rey David, tejxi cyjapun jatum ta' Pwert Cye A' tbi, aju tcub tumlal tjawitz k'ij. 38Atzun tcabin c'loj bitzal cyja' e je'x bet tuj nayaj, lepch nxi'ye cyi'j tcabin c'loj bitzal tibaj muro cyuc'il mijtl xjal, xi'x ke' ku'ne jatum tcubsa'n ja ma' twa'l, Ja te Jorni tbi, ex o pone jatum ta' Muro Ma' Twitz; 39ex o ic'e jatum cycubsa'n ke pwert lu: Aju Pwert Efraín tbi, Pwert Jesana tbi, Pwert cye Cyiẍ tbi, ex jatum ta' ja ma' twa'l Hananeel tbi, tuc'ix ju ja ma' twa'l Hamea tbi, max o pon baje jatum tcubsa'n Pwert cye Ẍne'l tbi, ex o cub we'ye jatum tcubsa'n Pwert te Xk'ukbil. 40Atzun ke cabe c'loj bitzal e pon tuj tja Dios, teyle junjun c'loj tuj cyex cylugar; ax icx weye cyuc'ix mij cawil, akeju in che bet junx wuc'ile. 41Ke pal in che k'ajtzan chun, atzun ke jlu: Eliacim, Maaseías, Miniamín, Micaías, Elioenai, Zacarías ex Hananías, 42Maasías, Semaías, Eleazar, Uzi, Johanán, Malquías, Elam ex Ezer. Ke bitzal in che bitzantok junx, ex aju nejenel cye, atzun Israhías. 43Tuj k'ij lu xi cyk'o'n nimcu chojbil, atzun cye xjal nimxix e tzalaj porque a Dios tzaj k'onte nimxix tzalajbil tuj chjk'ajlaj. Ax icx ke xu'j ex ke c'wa'l nimxix e tzalaj, ex aju tzalajbil baj tuj Jerusalén o binjtz cyuj ke lugar mas najchak. 44Tuj tk'ijlalil lu oc k'o'n cyoclen junjun xinak tu'n cycwentin ke ja te c'ubl oyaj aju in pon cyi'n xjal, ex tu'n tjaw cychmo'n tnejel cywitz awal ex ke tlaji'n nne'l cypa'n xjal ti'j ju at cye, tu'ntzun tajben cye pal ex cye aj Leví ic tza'n in tma'n ley, ex tu'ntzun tocx cyc'u'n cyuj ke c'ubl, porque ke xjal aj Judá in che tzalajtok cyi'j ke pal ex cyi'j aj Leví, tu'nju in che ajben tuj cyajbebl. 45Tza'nx cye, ax icx ke bitzal ex ke xk'ukil ttzi tja Dios, o japun cyu'n aju ajbebl tuj tak'un Dios, ex tuj cycwent tu'n tbaj cysaksa'n tcyakil, ic tza'nx banimaj ti'j tu'n David ex tu'n Salomón aju tcy'ajal. 46Atxix ojtxi tej tten Asaf tuj tk'ijlalil rey David, ate'tok ke nejenel cye ke bitzal, akeju in che bitzan bitz te nimbil te Dios ex te k'obl chjonte te. 47Cyja'tzun tuj tk'ijlalil tej tten Zorobabel, ax icx tej tten Nehemías, cycyakil aj Israel xi cyk'o'n twitz cyawal teyle junjun k'ij, tu'n tajben te cye ke bitzal ex cye ke xk'ukil ttzi tja Dios; ax icx xi cyk'o'n cye aj Leví aju at cyoclen ti'j, ax icx cye aj Leví nne'l cypa'n ch'in ti'j ju otok cyc'am, tu'n t-xi cyk'o'n cye ke pal, akeju tiyjil Aarón.

will be added

X\