NEHEMÍAS 1

1Atzun ke tyol Nehemías jlu, aju tcy'ajal Hacalías. Tej otok bant winkin abk'i ttzyetlen tcawin Artajerjes, tuj xjaw Quisleu tbi, akine Nehemías atintoke tuj nintz tnam Susa, 2tej tpon wermaniye Hanani cyuc'ix junjun xinak tzajni ke tuj Judá. Xitzun nkanine cye ti'j tnam Jerusalén ex cyi'j ke xjal Judiy, akeju otok che aj tuj Babilonia ex otok che pon tuj Jerusalén. 3Atzun cye tzaj cyma'n weye: Akeju o che aj tuj Babilonia ex o che pon tuj Judá ate' tuj nim bis ex in che ch'ixwi; atzunju muro toc ti'jele tnam Jerusalén jumajx o baj xitj, ex ke tlamel tnam o che baj tz'e'y tu'n k'ak', che chi. 4Tejtzun nbinteye tkanil lu, in cub ke'ye ok'el ex in bisune cab ox k'ij; cub nyo'ne we'yaj ex in oc tene na'l Dios aju at tuj cya'j. 5Ex xi nma'ne te tuj nna'j Diose cyja': Nman Dios ata tuj cya'j, aya Dios ma' toclen ex xobajilxix, minti' in baj tch'expu'n tyola aju in cyaj bant ti'j, ex at tk'ak'bil tc'u'ja cyi'j keju in che c'ujlan teya ex in che japun ke tmandamyenta cyu'n. 6Ja'lo in chin cubsane twitza tu'n ttzaj tbi'na nna'j Diose k'ijl ex konic'an cyi'j ke tmajena ake aj Israel. Ako'ye aj Israel ma ko binchane il twitza; akine cyuc'ix keju at nxilene cyuc'il ma ko binchane il. 7Nim mya ba'n ma kbinchaye twitza; minti' ma che japun ke tmandamyenta ku'ne, cyuc'ix ke tleya ex ke tcawbila, akeju e tzaj tma'na te tmajena Moisés. 8Na'ntza aju yol tzaj tma'na te tmajena Moisés, chiya cyja': Ka ma che binchane il, che bajel l cyuj mastl nasyon; 9katzun ma che ajtz meltz'aje juntl maj wuc'ile ex ka ma txi cynimane ke nmandamyente ex ka ma che japun cyu'ne, masque cyetbzbil cyibe max ttxa'npun tx'otx', che tzajel wi'ne ma chixin tu'n cyule juntl maj tuj lugar sc'o'maj wu'ne, jatum tu'n ttzaj na'n nbiye tuj, chitzuna, tmaya te Moisés. 10Tmajena ko'ye ex etzan ko'ye tu'na, ex o ko colpete tu'na tu'n nimxix tipumala. 11In chin cubsane twitza Nman, tu'n ttzaj tbi'na nkanbetze ex cykanbetz ke tmajena, akeju at cygan tu'n tjaw nimsa'n tbiya cyu'n. O'cx in chin kanine teya tu'n ba'n tel nbeye ex tu'n ntzaj xtaline tu'n rey, nchiye tuj nna'j Diose. Porque akine toctok te k'ol tc'a rey Artajerjes.

will be added

X\