NAHUM 3

1Ay bec'bil twitza tnam Nínive, porque nim xjal o che cub tbyo'na, nojni tuja tu'n nic'aj yol ex cyu'n byol xjal; nimxix wen o tz'elk'ana. 2Binxa tk'ajk'ajel asyal ex cyk'ajk'ajel ke rwed, tuc'ix tk'ajk'ajel cykan chej in che lipan, jawo'n ke carwaj cyu'n. 3Ke xjal cyjax cyibaj ke chej in che oc tzokpaj ti'j tnam. In che txilc'aj ke spad ex ke lans. Nimcu xjal ikan ẍil cyu'n, ex buyl cub cyximlal cyimni. Aju cyximlal ke cyimni mlay bant cyajlanjtz; in che jaw tolj ke xjal cyi'j. 4Tcyakil jlu ma tzaj ti'j tnam Nínive tu'n tlaj ic oc ic tza'n jun xu'j jawni twitz cyuc'il xinak, tbanilxix que'yin ex mejor xmoxin, xnak'tzamaj tu'n tcy'a'n; tu'nju tyaẍben ex tu'nju ba'n cy'a'n ma che cub t-sbu'n ke tnam ex ke nasyon. 5Ate Kman aju Tajaw Tcyakil chi in tma'n cyja': Lu kine in chin k'ojin ti'ja: Cbel nim tch'ixwiya wu'ne cywitz ke nasyon ex ke cawbil, ic tza'n in tzaj tch'ixwi jun xu'j ka ma tz'el k'i'n t-xbalun cywitz xjal. 6Cxel nxo'ne ttz'ilil ti'ja; cbel nk'o'ne tch'ixwiya, ex che labil xjal ti'ja. 7Cycyakil keju che oquel que'yinte teya che elel ok ti'ja ex oc cyma' cyja': Ma cub xitj tnam Nínive. ¿Alcye ctzajel tz'e'y tc'u'j ti'j? ¿Jatum ctzajel jun k'ukbalte tc'u'j? Che chilo. 8¿Maspetzun mejor teya twitz tnam Tebas aju tcubtok ttzi nima Nilo, aju camunintok ti'jele tu'n nimcu a' toctok ju nima te tcolbil tib, mer ic tza'n tapayi'n ti'j tu'n nima? 9Ke aj Etiopía cyuc'ix ke aj Ejipt, atzun ke e k'onte tipumal nimxix; ke aj Fut ex ke aj Libia, atzun ke onil te. 10Masque icju, pero e je'x k'i'n pres ke xjal najl ke tuj tnam Tebas, e cub pach'u'n ke tal c'wa'l cyuj cyscyin cay; jaw swert cyi'j ke xjal ma' cyoclen ex e baj c'alo'n ke nejenel cye tu'n caden. 11Ax icx teya cxel k'o'n k'e'n teya tu'n tchyo'n twi'ya ex cxel tewan tiba; ax icx cjyola ti'j jun lugar te colbil tiba tu'n cylaj ke aj k'oj ti'ja. 12Cycyakil ke lugar te colbil tiba ic cyten ic tza'n ke tkan higo nojni cyi'j tu'n twitz, jurat nnu'l tk'ij; ka ma che'x yucun in tzaj tzak twitz tuj ttzi ju cxel lo'nte cye. 13Ke t-soldadiya mer ic tza'n xu'j ke minti' cyipun; ma che jaket ke tlamel ttanmiya cywitz ke aj k'oj ti'ja ex ma che baj tz'e'y tu'n k'ak' ke t-xtocal tlamela. 14Chmon baja a' tu'ntzun twe'ya cywitz ke aj k'oj ma baj cytxolban cyib ti'jela; cyuwsan baja ke ja te colbil tiba. K'oncx tiba tuj xok'l, waban baja ju xcab tx'otx', tzyuma molt tu'n tbant lagriy. 15Atzun cbajel tz'e'ya tu'n k'ak' ex cnajela te jumajx tu'n spad, ic tza'n in baj naj awal cyu'n ẍplon, cyja'tzun chmet-x cybaje ic tza'n ke ẍplon. 16Chmet-xix nim cybaj ke comersyant ate' tuja, mer ic tza'n ke che'w ate' twitz cya'j. Mer ic tza'n ẍplon ke, in baj tcyakil cyu'n ex in che ic'tzun. 17Ke xk'ukil teya ic cyten ic tza'n ẍplon ex ke nejenel teya ic cyten ic tza'n txkan ẍplon in che oc we' cywitz ke tapya tuj tk'ijlalil che'w; octzun tjawil k'ij in che ic'tzun ex mi jun ba'n tu'n tza'n in che'x. 18Aya rey te Asiria, ma che cyim ke cwentil t-xjalila. Ax icx ma che cyim ke xjal at cyoclen ttxlaja, cysputin cyib ke t-xjalila cywi witz ex mi a'l jun ba'n toc chmonte cye. 19Minti' k'anbil ti'j xitbil teya; minti' k'anbil ti'j ẍil toc ti'ja. Cycyakil ke xjal in cybi'n aju ma tzaj ti'ja in tz'ajin cyk'ab tu'n tzalajbil tu'nju cycyakil o che c'ixbi tu'n nim mya ba'n o tbinchaya.

will be added

X\