MIQUEAS 7

1Bec'bil nwitze, ic kine ic tza'n jun xjal in xi' sucwil tjawlenxi baj twitz awal; minti'tl in cnet twitz uva tu'n ex mi twitz higo aju tajtok tu'n tlo'n ti'j. 2Twitz tx'otx' minti'tl jun xjal ba'n niman Dios ex minti' jun xjal tz'aklxix; cycyakil in che ayon ti'j tu'n cyoc ten byol cye xjal; cywitzx cyib in baj cyc'obin cyib. 3At cynabl tu'n tbant mya ba'n cyu'n; ke nejenel nne'l cykanin pwak cyi'j xjal, ke jwes in xi cyc'mo'n cyoyaj xjal nok tu'n mi'n tcub cysentens ke xjal at cyil, ke xjal ma' cyoclen in cyma'n nok alcye cyajbil tu'n tbant ex in moje' cyyol cyxolx ti'j alcye tu'n tbant cyu'n. 4Aju xjal mas ba'n nne'la tuj cywitz cyxolx, ic tten ic tza'n jun ch'i'x minti' tajben, ex aju xjal tz'aklxix nne'la tuj cywitz cyxolx, ic tten ic tza'n jun ch'i'x c'ul. Pero tzul tk'ijlalil tu'n tcub cycastiw, ic tza'n tzaj cyma'n ke xk'ukil akeju t-sanjel Dios; cjawiltzun naj cynabl. 5Mi'n txi tnimana tyol tvesina; mi'n tz'oc ke' tc'u'ja ti'j jun tamiwoya; ax icx ten tcwenta ti'j alcye yol cxel tma'na te t-xu'jila aju c'ujla'n tu'na. 6Porque in che el ic'un ke mambaj cyu'nx cycy'ajal ex in che oc ten ke txin k'ojlel ti'jx cytxu', ke txin alibaj in che oc ten k'ojlel ti'j xu'j cylib, ex ke aj k'oj ti'j jun xjal, ax keju ate' tuj tja. 7Atzun weye, chin ayole ti'j Kman; c'oquel ke' nc'u'je ti'j Dios aju Clol weye, porque chin tzajel bi'ne tu'n. 8Akeye aj k'oj ki'je, mi'n che tzalaje tu'nju mya ba'n ma tzaj ki'je; masque ma ko cub tz'ake, pero ko jawil we'ye; masque txolin ki'je tu'n klolj, pero ate Kman spic'un keye. 9Ma ko binchane il twitz Kman, tu'ntzun jlu c'ic'ex tk'oj ku'ne acux nnu'l colol ki'je ex acux in bant ki'je tu'n. Ko xel k'i'ne tu'n Kman tuj spic'un ex oc kila'ye oc tcub cyi'j aj k'oj ki'je tu'n. 10Ax icx c'oquel cyque'yin ke aj k'oj ki'je, ex tu'ntzun jlu ctzajel cych'ixwi keju o che k'mante keye cyja': ¿Jatumtzun ta' Cydiose? Che chi. Atzun ja'lo c'oquel kque'yine oc cybaj waban ic tza'n xok'l tcub cyuj cay. 11Akeye aj Jerusalén, lu tzul k'ij tu'n cyjaw binchet juntl maj ke muro ate'c ti'jele cytanmiye ex c'elel lak'e' tmojonil cytanmiye. 12Tuj tk'ijlalil lu, tuj tcyakil part che ul ke xjal tuc'ila; che tzajelx tuj Asiria ex cpol baj max tuj Ejipt, che tzajelx tuj Ejipt ex cpol baj max ttzi nima Éufrates; che tzajelx cytzi'yile mar ex cywi'yile witz. 13C'oquel twitz tx'otx' te tzkij tx'otx' tu'n cylaj keju najlke twitz, tu'n tlaj mya ba'n otok cybincha. 14Nman, che tcwentin oca ke xjal etzan tu'na, ic tza'n nno'c tcwentin pastor ke t-ẍne'l akeju najl tjak' c'ul o'cx cye, txolin cyi'j tu'n tx'otx' tbanilxix. K'inxa ke tuj tx'otx' Basán ex Galaad jatum at cywabl, ic tza'n tuj tk'ijlalil ojtxi. 15Binchama ke binchben nim cyipumal, tu'ntzun toc cyque'yin ic tza'n tej cyetz ti'na tuj Ejipt. 16Ax icx c'oquel cyque'yin ke txkantl nasyon, ex ctzajel cych'ixwi ti'j cye cyipumal. Che oquel ic tza'n jun xjal men ex chquin twi'. 17Che bel mutze' tuj kuk ic tza'n lobaj ex ic tza'n ke mastl jil in xi cyjaku'n cyc'u'j twitz tx'otx', in che lu'lun oc cyetz cyuj ja ma' cywa'l te cycolbil cyib ex tuc'il nimxix cyxobil che ul tuc'il Kman Dios. 18Minti' juntl Dios at ic tza'n teya porque in cub tnajsa'na aju mya ba'n in cybincha'n ke xjal etzan tu'na, akeju o che cyaj ank'in, ex nnic' tna'l cyil tu'na, in tzaj tyec'una tc'ujlalila keye, ex mya cucx in ten tk'oja te jumajx. 19Ctzajel k'ak'an juntl maj tc'u'ja ki'je ex cbelex tmaku'na kbinchbene mya ba'n. Cbelex t-xo'na tcyakil kile max t-xe'pun mar. 20Cjapunel tu'na aju tyola ex tc'ujlalila, aju tzaj ttziyana atxix ojtxi cye ke kxe'chele Abraham ex Jacob.

will be added

X\