MIQUEAS 6

1Cybintze ja'lo aju in tma'n Kman, chi cyja': Che we'ctze ex cychic'bantze aju cycolbil cyibe cywitz ke nmak witz, ex e tjaw tk'ajk'ajel cywi'ye tu'ntzun cybinte ke tal witz. 2Cybintze, akeye nmak witz ex tk'ukbil tx'otx' cyuwxix tten: Ke xjal etzan tu'n Kman che oquel tuj xjel tu'n ti'j cybinchben ex c'oquel ten xtisil cyi'j aj Israel. 3Chi Kman in tma'n cyja': Akeye xjal etzan wu'ne, ¿Alcye mya ba'n ma nbinchaye cyi'je ex ka alcye mya ba'n ma tz'e'le tuj cywitze? Chin cytzak'wentze. 4Akine etz k'inte cyeye tuj Ejipt tu'n mi'n cytentle te cymajen, ex xi nsama'ne Moisés, Aarón ex Mariy te ẍaklul cyeye. 5Akeye xjal etzan wu'ne, cyna'ntze ja'lo aju cub t-ximan Balac tu'n tbant cyi'je, aju cyrey aj Moab, ex cyna'ntze alcyeju tzak'webl tzaj k'o'n te tu'n Balaam aju tcy'ajal Beor. Cyna'ntze tej tcub be cyu'ne tuj lugar Sitim tu'n cypone tuj Gilgal, tu'ntzun tel cynic'e ti'j ju xtalbil o nbinchaye cyeye, chi Kman. 6¿Alcye tumel tu'n ncub tene c'ulul twitz Kman aju Dios ma'xix toclen? ¿Ba'npe tu'n ncub tene c'ulul twitz tuc'il jun tal wacẍ te jun abk'i, tu'n tcub nbyo'ne ex tu'n tcub npatune te jun oyaj te Kman? 7¿Jacupe tzalaj Kman ti'j ka ma txi nk'o'ne jun mil ẍne'l te jun oyaj te ex ka ma cub nk'o'ne nimxix chibj aseyt twitz? ¿Cxelpe nk'o'ne nej nc'wa'le te chojbil teju mya ba'n in bant wu'ne ex ju wile? Mi'n. 8Aya xjal, o tma Kman teya alcyeju ba'n ex alcye taj tu'n tbinchanteya: Taj Kman tu'n tbinchanteya aju tz'aklxix ex tu'n tten tc'ujlalila ti'j juntl ex tu'n tcub tmansin tiba twitz ju Tdiosa. 9Ate Kman in txocon cyi'j ke xjal ate' tuj tnam, ex aju xjal in xob twitz, at tnabl. Cyk'ontz cywi'ye ti'j castiw ex ti'j ju in cub k'onte castiw. 10Tuj tja xjal binchal mya ba'n at k'inumabl mya tuj tumel in cambet, ex at malbil mya tz'akl; ake jlu ic'un wu'ne. 11¿Tza'n tten tu'n tcub nnajsa'ne til ju xjal in che ajben ke balans ex ke marc mya tz'akl tu'n? 12Ke k'inun ate' tuj tnam lu, cycyakil in che yajlan cyi'j ke meba, ex cycyakil ke xjal najlke tuj, puro nic'al yol ke ex sbul ke. 13Cyja'tzun cbel nk'o'ne cycastiwoye; che najele wu'ne tu'n tlaj cyile. 14Che wa'le, pero mlay noj cyc'u'je, nok o'cx cucx che apale we'yaj; cjawil cychmo'ne cywaye, pero mlay cyaj clet ch'in cyu'ne, ex katzun at ch'in ma cyaj clet cyu'ne, cxel nk'o'ne cye keju che ul k'ojlel cyi'je. 15Che awale, pero mlay jaw cychmo'ne twitz cyawale; c'elex cyche'ne twitz olivo, pero mlay che nic'bene ti'j ju aseyt c'elel ti'j; c'elel cyyatz'o'ne ta'l twitz uva, pero mlay che c'ane ti'j ta'l. 16Porque ma che'x lpe'ye cyi'j tmandamyent rey Omri ex ti'j tcyakilju o cybincha keju ate' tuj tja rey Acab, ex ma cybinchaye aju cye o bant cyu'n. Cyja'tzun cxel nk'o'ne ambil tu'n cynaje ex tu'n cyoc xmayin keju najl tuj tnam ex che elel ic'une cyu'n mastl tnam.

will be added

X\