1 Tuj tk'ijlalil lu ul Juan aju in che byan xjal tu'n tuj a', o pacban tuj Judey tuj lugar tzkij tx'otx', 2 in tma'n cye xjal: —Tajtz ti'j cyanmiye, porque ma tzul lak'e' ju cawbil in tzaj tuj cya'j, chi Juan. 3 Ate Juan o yolin Isaías ti'j, aju t-sanjel Dios. Tma Isaías: In jaw tk'ajk'ajel twi' jun xjal tuj lugar tzkij tx'otx', in tma'n: Cybinchame tbe Kman, cybinchame jun tbe jikun ti'j. 4 Aju t-xbalun Juan toc, ttzmal chej camey, ex tz'u'm c'albil tc'u'j, ex ẍplon twa tuc'ix ta'l cab tuj tze'. 5 Ex e pon xjal tuc'il Juan, in che tzaj tuj Jerusalén ex tuj tcyakil Judey ex tuj tcyakil lugar ttzi'yile nima Jordán; 6 ex tej tjatz cypa'n cyil, e byan tu'n Juan tuj nima Jordán. 7 Pero tej tlonte Juan nimcu ke parisey cyuc'ix ke sadusey e pon tuc'il tu'n cybyan tuj a', xi tma'n cye: —Akeye tiyjil k'anti'. ¿Alcye ma k'mante cyeye tu'n cyel oke twitz ju castiw ma'xix tzul tu'n Dios? 8 Cybinchame ba'n, tu'ntzun tyec'unjtz ka otok tz'ajtz ti'j cyanmiye. 9 Ex mi'n cub cyximane tuj cyanmiye tu'n cymanteye: Tiyjil Abraham ko'ye; porque cxel nma'ne cyeye, jacu bant tu'n Dios tu'n cyoc ke abj lu te tiyjil Abraham. 10 Aju si'wbil c'uxbil ya ma pon t-xe tloc' tze'; cyja'tzun tcyakil tze' minti' in tk'o'n twitz ba'n, cjawil tx'emit, ex c'oquex k'ot tuj k'ak'. 11 Ax toc in che byane tuj a' wu'ne tu'nju ma tz'ajtz ti'j cyanmiye; pero aju lepchix ttzaj wi'je, oc che byale tu'n tu'n Xewbaj Xjan ex tu'n k'ak'; porque mas at tipumal nwitze, ex minti' woclene ti'j tu'n t-xi wi'ne t-xajab. 12 Tzyu'n xupbil triw tu'n, ex c'elel t-xupin ttz'isil triw tuj tpe'n; c'oquex tc'u'n triw tuj ttx'utx', atzun ttz'isil triw cbel tpatun tu'n k'ak' mlay yupj. 13 Etztzun Jesús tuj Galiley, ul tuc'il Juan ttzi nima Jordán tu'n tbyan tu'n Juan. 14 Minti' cub tuj twitz Juan tu'n tbyan Jesús tu'n, ex xi tma'n te: —Akine il ti'j tu'n nbyane tu'na; ¿tiku'n ma tzula wuc'ile tu'n tbyana wu'ne? 15 Pero xi ttzak'we'n Jesús: —E tbant ja'lo, tu'ntzun tjapun ku'n tcyakilju in tma'n Dios. —Ba'n, chi Juan. 16 Tej tbyan Jesús, jatz tuj a' ex jaket ttzi cya'j, ex o til Jesús T-xew Dios cu'tz tuj cya'j ic que'yin ic tza'n jun paloma, cubil tibaj Jesús. 17 Ex tzaj k'ajt Dios tuj cya'j in tma'n: —Atzun Nc'wa'le jlu c'ujla'nxix wu'ne, in chin tzalaje ti'j.
Copyright ℗ 2000 Hosanna Grabado por Producciones Cristianas Vina