1 Tbajlenxitzun ju k'ij te ojlabl, ch'ixtok kskix tuj tnejel k'ij te seman, e ul Mariy aj Magdala tuc'ix juntl Mariy que'yilte pantyón. 2 Ex tzaj jun cyaknajnab nimxix; porque cu'tz jun t-anjel Kman tuj cya'j; tej tcubil el ti'n ju abj ttzi pantyón ex cub ke' tibaj. 3 Ic que'yin twitz ic tza'n tkan k'ancyok, atzunju t-xbalun sak que'yin ic tza'n ttxa che'w. 4 Atzun ke soldad in che xk'ukin e jaw lu'lun tu'n tchi anjel, mer ic tza'n cyimni e oc. 5 Atzunte anjel xi tma'n cye xu'j: —Mi'n che xobe, porque ba'n wu'ne in che jyone ti'j Jesús aju jaw k'o'n twitz crus. 6 Mi a'l tzalu, ma jaw ank'in ic tza'n o tma. Cytzaje, cyque'yinxe jatum cub k'o'n t-ximlal. 7 Cyxi' naje, cymanxe cye t-xnak'tzben cyja': Ma jatz ank'in cyxol cyimni, ex lu cxel nej cywitze tu'n cypone tuj Galiley; atzun c'oquel cyque'yine, che chicuye cye t-xnak'tzben. Lu ma txi nma'ne cyeye, chi anjel cye xu'j. 8 Atzun cye xu'j e ajtz ttzi pantyón in che xob ex nim in che tzalaj; e je'x naj k'ol tkanil cye t-xnak'tzben Jesús, in che ojkelan wen. 9 Ex matok cyja' cyxi', lu Jesús oc noj cywitz, e je'x tk'olbe'n. Atzun cye xu'j e pon lak'e' ttxlaj, tzaj cychle'n tkan, ex e c'ulun twitz. 10 Xitzun tma'n Jesús cye: —Mi'n che xobe; cyxi'ye, cyk'onxe tkanil cye wermaniye tu'n cyxi' tuj Galiley, ex atzun chin oquel que'yine cyu'n. 11 Matok cyja' cyxi' ke xu'j, at junjun cye xk'ukil e je'x tuj tnam ex xi cyk'o'n tkanil cye nejenel cye pal ti'j tcyakilju otok baj. 12 Bajtzun cychmon cyib ke nejenel cye pal cyuc'ix ke cytijil xjal, e yolin ti'j cyxolx, xi cyk'o'n nim pwak cye soldad, 13 ex xi cyma'n cye: —Cymanxe cye xjal: E ul ke t-xnak'tzben te konic'an ex etz cyelk'a'n t-ximlal matok in ko tane, che chicuye. 14 Katzun ma tbi gobernador jlu, cbantel ti'j ku'ne tuc'il tu'ntzun cycolpaje, che chi ke nejenel cye pal. 15 Xitzun cyi'n soldad pwak ex cybincha ic tza'nx tzaj k'ma'n cye. Aju yol lu ma tz'el tkanil cyxol xjal judiy, ex ax yol in cyma'n ja'lo. 16 Atzun cye junlaj xnak'tzben e pon tuj Galiley twi witz jatum otok txi tma'n Jesús cye. 17 Tejtzun tilwaj Jesús cyu'n, e c'ulun twitz; pero at junjun jawje' cyc'u'j. 18 Pontzun lak'e' Jesús cytxlaj ex tma: —Ma tzaj k'o'n woclene ti'j tcyakilju at tuj cya'j ex twitz tx'otx'. 19 Cyja'tzun cyxi'ye, cymanxe cye xjal tu'n cyoc te nxnak'tzbene cyuj cycyakil nasyon, ex tu'n cybyan cyu'ne tuj tbi Dios Mambaj, ex tuj nbiye akine C'wa'lbaj, ex tuj tbi Xewbaj Xjan; 20 cyk'onxe xnak'tzbil cye tu'n tjapun cyu'n tcyakilju ma txi nma'ne cyeye. Ex lu kine chin tele cyuc'ile tcyakil k'ij acutzun in japun baj mancbil tk'ijlalil. Icxwitju.
Copyright ℗ 2000 Hosanna Grabado por Producciones Cristianas Vina