Mateo 27

1Tejtzun kskix, cycyakil nejenel cye pal cyuc'ix cytijil xjal judiy e yolin ti'j cyxolx tza'n tten tu'n tcyim Jesús cyu'n. 2Baj cyc'alo'n, xi cyi'n ex pon cyi'n twitz Ponsio Pilat aju gobernador. 3Ate Judas xi k'onte Jesús tuj cyk'ab xjal, tejtzun tlonte otok cub t-sentens Jesús tu'n tcyim, tzaj ta'w tuj tanmi, aj tk'o'n aju 30 sak pwak cye nejenel cye pal ex cye cytijil xjal ex tma: 4—Ma chin binchane il, ma txi nk'o'ne tuj cyk'abe jun xjal minti' til, chi Judas. Atzun cye cyma: —Minti' ke kaj ti'j, malomte tib. 5Cyajtzun t-xo'n Judas aju sak pwak tuj tja Dios, etztzun, xi'tzun, jaw tyobin tib ex oc tc'alo'n tkul tu'n tcyim. 6Atzun cye nejenel cye pal jaw cyi'n aju sak pwak ex cyma: —Mya k'o'n tu'n ley tu'n tcu'x kk'o'n tuj c'ubl te oyaj, porque aju pwak lu chojbil twi' jun xjal tu'n tcyim, che chi. 7Tejtzun cybaj yolin ti'j, ajbentzun pwak cyu'n tu'n tlak'et jun piẍ tx'otx' toc tbi tx'otx' te binchbil ẍok', atzun tu'n cycu'x makut ke betin xjal tuj tx'otx' lu. 8Cyja'tzun oc k'o'n tbi tx'otx': Tx'otx' twi' tchc'el jun xjal, ex ax tbi toc ja'lo. 9Cyja'tzun japun aju k'ma'maj tu'n Jeremías aju t-sanjel Dios. Chi Jeremías: Xitzun cyi'n aju 30 sak pwak, atzun twi' jun xjalju cyaj bant ti'j cyu'n aj Israel. 10Xi cyk'o'n pwak lu twi tx'otx' te binchal ẍok', ic tza'nx tzaj tma'n Kman weye. 11Atzunte Jesús wa'ltok twitz gobernador; xitzun tkanin gobernador te: —¿Apeya ju Rey cye xjal judiy? Chi gobernador. —Akine ic tza'n ma tmaya, chi Jesús xi tma'n te. 12Tejtzun cyoc ten ke nejenel cye pal cyuc'ix ke cytijil xjal tx'olbalte til, minti' jun yol tma Jesús. 13Xitzun tma'n Pilat te: —¿Minti'pe in tbi'na nimcu in k'manjtz ti'ja cyu'n? 14Pero te Jesús mi jun yol xi ttzak'we'n; tu'ntzunju nim o labin gobernador ti'j. 15Cycyakil abk'i in bant tu'n gobernador tu'n tetz ttzokpi'n jun pres tuj nink'ij, nok alcye cyajbil tnam xjal tu'n tetz tzokpi'n. 16Attok jun xinak tocx tuj pres, Barrabás tbi, bi'maj cyu'n cycyakil xjal. 17Tej tbaj cychmon cyib ke xjal, xi tma'n Pilat cye: —¿Alcye cyajbile tu'n tex ntzokpi'ne? ¿Cyajpeye tu'n tex ntzokpi'ne Barrabás ex ka a Jesús aju Crist tbi? Chi Pilat. 18Porque bi'ntok tu'n Pilat, pon k'i'n Jesús cyu'n nok tu'nju at tlo'ch cyc'u'j ti'j. 19Cubtzun ke' Pilat tuj k'ukbil tu'n tcawin, tzaj sama'n jun xjal tu'n t-xu'jil k'malte te cyja': Mi'n tz'oc tk'on tiba ti'j ju xjal tz'aklxix lu, porque tuj nwitzic'e konic'an may' nim ma tzic'x wu'ne tu'n tlaj, chi t-xu'jila, chi xjal. 20Atzun ke nejenel cye pal cyuc'ix ke cytijil xjal cub ti'j cynabl xjal cyu'n tu'n t-xi cykanin tu'n tetz tzokpi'n Barrabás, atzunte Jesús tu'n tcyim. 21Xitzun tkanin juntl maj gobernador: —¿Alcye jun cyajbile tu'n tex ntzokpi'ne? Atzun cye xjal cyma: —Ate Barrabás tu'n tetz ttzokpi'na. 22Xitzun tma'n Pilat cye: —¿Titzun oc nbincha'ye ti'j Jesús aju Crist tbi? Cymatzun cycyakil xjal: —E tjaw twitz crus. 23Atzunte Pilat xi tma'n cye: —¿Alcyetzun jun mya ba'n ma tbincha? Pero cye xjal mas e jaw sch'in: —E tjaw twitz crus, che chi. 24Tejtzun tlonte Pilat minti' tu'n tbant ti'j, nok mas in che jaw tilj xjal, tzaj ti'n Pilat ch'in a', el ttx'jo'n tk'ab cywitz cycyakil xjal ex tma: —Minti' wile ti'j ju xjal tz'aklxix lu ka ma cyim. Cyque'yinxe ti c'oquel, chi Pilat. 25Xi cytzak'we'n cycyakil xjal: —Akeko' at kile cyuc'ix kc'wa'le ka ma cyim xjal lu. 26Etztzun tzokpi'n Barrabás tu'n Pilat; atzunte Jesús baj asyalin ex xi k'o'n tu'n Pilat tuj cyk'ab soldad tu'n tjaw cyk'o'n twitz crus. 27Xitzun k'i'n Jesús cyu'n t-soldad gobernador, ocx cyi'n tuj cwartel, baj cytxolban cyib cycyakil soldad ti'j. 28El cyi'n t-xbalun Jesús, oc cyk'o'n jun cyak xbalun ti'j, 29ex baj cybincha'n jun coron ch'i'x, jax cyk'o'n tuj twi', ex xi cyk'o'n jun ajlaj tuj tbank'ab. E cubtzun ẍmeje' twitz ex e xmayin ti'j: —In xi kk'olbene aya Rey cye xjal judiy, cucxwit tel tk'ija, che chi. 30Oc cytzuban tuj twitz, el cyi'n ju ajlaj te ex oc cybju'n ti'j twi'. 31Tejtzun cybaj xmayin ti'j, el cyi'n ju cyak xbalun ti'j, oc cyk'o'n axju t-xbalun, ex xi cyi'n tu'n tjaw cyk'o'n twitz crus. 32Tejtzun cyetz, oc noj jun xjal cywitz, Simón tbi ex aj Sirene, oc cyjwersin tu'n t-xi tikan tcrus Jesús. 33E pontzun tuj jun lugar Gólgota tbi; aju yol Gólgota atzun in tma'n: Jun lugar Tbakil Wibaj. 34Tej cypon tuj lugar lu, xi cyk'o'n tc'a vinagre smo'n tuc'il ta'l c'ul puro c'a; pero tej t-xi tnic'be'n Jesús, minti' xi tc'an. 35Tej tjaw k'o'n Jesús twitz crus, baj cysipan soldad ke t-xbalun cyxolx, ex e oc ten k'il swert cyi'j, alcye tu'n t-xi ti'n junjun. [Bant jlu cyu'n, tu'ntzun tjapun aju k'ma'maj tu'n t-sanjel Dios chi cyja': Jaw cyi'n swert ti'j nxbalune ex baj cysipan cyxolx, chi t-sanjel Dios.] 36E cubtzun ke' in che xk'ukin ti'j Jesús. 37Cub cytz'iban alcye til, jax cyk'o'n twitz crus tibaj twi', in tma'n cyja': Atzun Jesús jlu, aju Rey cye xjal judiy. 38Ax icx jaw cyk'o'n cabe elek' twitz crus junx tuc'il Jesús, jun tuj tbank'ab ex jun tuj tnayaj. 39Atzun cye xjal in che ic' twitz crus in che xmayin ti'j Jesús, in xi cyyucun cywi', 40ex in cyma'n: —Aya in tma'na tu'n tcub t-xituna tja Dios ex tuj ox k'ij tu'n tjaw tbincha'na juntl maj, clom tiba tu'nx tiba. Ka Tc'wa'l Diosa, tcu'tza twitz crus, che chi xjal. 41Ax icx ke nejenel cye pal, cyuc'ix ke xnak'tzal ti'j ley, cyuc'ix ke parisey ex cyuc'ix ke cytijil xjal, in che xmayin ti'j ex in cyma'n: 42—Ke mastl xjal e clet tu'n, atzun te minti' in bant tclonte tib; ka rey jlu cye aj Israel, ba'n tu'n tcu'tz twitz crus ja'lo tu'ntzun kocslan ti'j. 43O ke' tc'u'j ti'j Dios; e tclet tu'n Dios ja'lo ka axix toc taj Dios ti'j; porque o tma ka Tc'wa'l Dioste, che chi xjal. 44Ax icx ke elek' e oc ten ilil ti'j, akeju e jaw k'o'n twitz crus junx tuc'il. 45Cub kloljxix tcyakil twitz tx'otx', xe't-x te chilcuk'ij, maxitzun el spic'e' te las tres te kale. 46Ch'ixtok tpon las tres te kale, jaw tk'ajk'ajel twi Jesús cyuwxix ex tma: —Elí, Elí, ¿lama sabactani? Atzun in tma'n ju yol lu: Nman Dios, Nman Dios, ¿tiku'n ma chin cyaj tcolina? Chi Jesús. 47Tej cybinte junjun xjal ax ate'tok, cyma cyxolx: —Ate jlu in txocon ti'j Elías, che chi. 48Jurat naj xi kelan jun cye, tzaj ti'n jun esponja ex cu'x tmu'n tuj vinagre, ex oc tk'o'n twi' jun ajlaj, jax tk'o'n tu'n tel ttz'uban Jesús. 49Atzun cye txkantl cyma: —E tten nej; ko que'yin ti'j ka tzul Elías clol te. 50Atzunte Jesús jaw tk'ajk'ajel twi' juntl maj cyuwxix, jawtzun baj t-xew. 51Atzunju xbalun te makbil tcub tuj tmij tja Dios cub sbit'j, cabe piẍ ela, tzaj sbit'j twi', cubil t-xe'. Tzaj lu'lun tx'otx' ex ke nmak abj e je'x pax; 52ex ke pantyón e jaket; ex nimcu cyximlal ocslal otok che cyim e jaw ank'in, 53e je'tz tuj pantyón, e ul tuj Jerusalén aju tnam xjan, ex cub cyyec'un cyib cywitz nimcu xjal tjatzlenxi ank'in Jesús. 54Aju capitán cyuc'ix keju ate' tuc'il in che xk'ukin ti'j Jesús, tej cylonte cyaknajnab ex tcyakilju o baj, tzaj nim cyxobil, ex cyma: —Axix toc Tc'wa'l Dios te jlu, che chi. 55Nimcu xu'j axtok ate' in che que'yin najchak, otok che tzaj lpe' ke xu'j lu ti'j Jesús tej ttzaj tuj Galiley, ex otok che ajben te. 56Cyxol keju xu'j lu attok Mariy aj Magdala, tuc'ix Mariy cytxu' Jacobo ex José, ex tuc'ix cytxu' tcy'ajal Zebedey. 57Tejtzun tkokax, ul jun xinak k'inun, José tbi ex aj Arimatey, otok tz'oc te t-xnak'tzben Jesús. 58Xi' José tuc'il Pilat, xi tkanin t-ximlal Jesús. Xi tk'o'n Pilat orden tu'n t-xi k'o'n t-ximlal Jesús te. 59Xitzun ti'n José t-ximlal Jesús, ocx tbalk'i'n tuj jun sak xbalun, 60ocx tk'o'n tuj jun pantyón ac'aj, texte José tpantyón, otok tz'ocx tlacu'n tuj pic; tzaj ttolin jun abj ma tij, oc tk'o'n ttzi pantyón ex ajtzun. 61Axtoktzun ate' Mariy aj Magdala, tuc'ix juntl Mariy, k'ukl ke twitz pantyón. 62Tuj juntl k'ij baj cychmon cyib ke nejenel cye pal twitz Pilat cyuc'ix ke parisey, ewtok tbantlen cyten xjal tu'n tic'set ju k'ij te ojlabl. 63Xi cyma'n te Pilat: —Tat, ma tzul ti'j kc'u'je at jun yol o tma aju sbul lu tej itz'xtok: Oc tel ox k'ij chin jawil ank'ine, chi xjal lu. 64Cyja'tzun k'onxa orden tu'n tcyuwset ju pantyón tuj ox k'ij, mya yajcu che ul ke t-xnak'tzben te konic'an, ex c'eletz cyelk'a'n t-ximlal, ex cxel cyma'n cye xjal: Ma jaw ank'in cyxol cyimni, che chilo. Entons mas che bajel sbu'n xjal ja'lo twitzju nej, che chi. 65Xitzun tma'n Pilat cye: —Lu jun c'loj soldad lu tu'n cyxi' cyuc'ile; cyxi'ye, ex cycyuwsan oque ttzi pantyón ic tza'nx ba'n cyu'ne. 66E je'xtzun, baj cycyuwsa'n ttzi pantyón, oc cyk'o'n jun sey ti'j abj, ex e cyaj cyk'o'n ke soldad te xk'ukil.

will be added

X\