Mateo 23

1Octzun ten Jesús yolil cyuc'il xjal ex cyuc'il t-xnak'tzben ex xi tma'n cye: 2—Ke xnak'tzal ti'j ley ex ke parisey nno'c cyk'on cyib te xnak'tzal tu'n cyk'onte xnak'tzbil ti'j tley Moisés. 3Cyja'tzun, tcyakilju ctzajel cyma'n cyeye tu'n tjapun cyu'ne, japunx cyu'ne ex cybinchame; pero mi'n cybinchaye ic tza'n cye in cybincha'n, porque in cyma'n alcye tu'n tbant ex ax ke minti' in bant cyu'n. 4Porque in baj cyc'alo'n ke iktz alxix, ex minti' in c'isj cyu'n xjal, ex in cyma'n tu'n tjaw cyikan xjal; atzun cye mlay tz'oc cyk'o'n jun tal cyk'ab ti'j iktz tu'n tjaw lamo'n iktz ti'j xjal. 5Tcyakilju cybinchben in bant nok o'cx tu'n toc cyque'yin xjal. Porque in cub cytz'iban tyol Dios twitz jun piẍ tz'u'm ma' twitz, nno'c cyc'alo'n ti'j cyk'ab ex ka tibaj cywitz, ex nno'c cyk'o'n cyxbalun ẍjo'w ẍli'jin ttxa'n. 6Ex cyajbil tu'n cycub ke' tuj tnejel k'ukbil tuj nintz wa'n, ex tu'n cycub ke' tuj tnejel k'ukbil cyuj ja te c'ulbil. 7Ex cyajbil tu'n cyoc k'olbe'n tuj plas ex tu'n toc k'o'n cybi xnak'tzal cyu'n xjal. 8Atzun cyeye mi'n cub tuj cywitze tu'n toc k'o'n cybiye xnak'tzal, porque junx xnak'tzal cyeye, aju Crist, atzun cyeye cyitz'in cyibe cycyakile. 9Ex mi'n tz'oc cyk'o'ne te cymane jun xjal tzalu twitz tx'otx'; porque junx Cymane at, aju at tuj cya'j. 10Ex mi'n tz'oc k'o'n cybiye nejenel cyu'n xjal, porque junx nejenel cyeye at, atzun kine aju Crist. 11Aju mas ma' toclen cyxole, atzunju c'oquel te cymajene. 12Porque alcye ma jaw tniman tib c'oquel te ch'in; pero alcye ma tz'oc tk'on tib te ch'in oc cjawil nimsa'n. 13Pero ay bec'bil cywitze, akeye xnak'tzal ti'j ley ex akeye parisey xmletz' keye, porque in xi cymayo'ne tu'n cyocx xjal tuj cawbil in tzaj tuj cya'j; mi akeye minti' in che ocxe, ex mi'n cyaje tu'n cyocx ke xjal, akeju cyajbil tu'n cyocx. 14[Ay bec'bil cywitze akeye xnak'tzal ti'j ley ex akeye parisey xmletz' keye, porque nne'l cyi'ne cyja meba xu'j, ex in che na'ne Dios nim tuj tu'n tcub ewat cybinchbene cywitz xjal. Tu'ntzunju cbel jun cysentense mas cyuwxix.] 15Ay bec'bil cywitze akeye xnak'tzal ti'j ley ex akeye parisey xmletz' keye. In baj cybetine tibaj mar ex twitz tx'otx' tu'n toc jun xjal te cyxnak'tzbene; octzun toc xjal te cyxnak'tzbene, mas aj il nno'c cywitze, ex mas in xi' tuj il cyu'ne tu'n t-xi' tuj infierni. 16Ay bec'bil cywitze, ẍaklul xjal keye pero moẍ keye. In cyma'ne: Ka at jun xjal ma txi ttziyan jun yol ex ka ma tzaj tna'n tja Dios ti'j, mya il ti'j tu'n tjapun tyol; pero ka at jun xjal ma txi ttziyan jun yol ex ka ma tzaj tna'n k'an pwak tocx tuj tja Dios ti'j tyol, il ti'j tu'n tjapun tyol, che chiye. 17Minti' cynable ex moẍ keye. ¿Alcye mas at toclen, ape k'an pwak, ex ka a tja Dios aju nno'c k'an pwak te xjan tu'n? 18Ax icx in cyma'ne: Ka at jun xjal ma txi ttziyan jun yol ex ka ma tzaj tna'n altar ti'j tyol, mya il ti'j tu'n tjapun tyol; pero ka at jun xjal ma txi ttziyan jun tyol ex ka ma tzaj tna'n oyaj ti'j, aju tcub tibaj altar, il ti'j tu'n tjapun tyol, che chiye. 19Minti' cynable ex moẍ keye. ¿Alcye mas at toclen, apeju oyaj, ex ka a altar aju nno'c oyaj te xjan tu'n? 20Porque alcye jun xjal ma txi ttziyan jun yol ex ka ma tzaj tna'n altar ti'j tyol, ax icx in tzaj tna'n ti'j tcyakilju tcub tibaj altar. 21Ex alcye jun xjal ma txi ttziyan jun yol ex ka ma tzaj tna'n tja Dios ti'j tyol, ax icx in tzaj tna'n Dios aju najl tuj. 22Ex alcye jun xjal ma txi ttziyan jun yol ex ka ma tzaj tna'n cya'j ti'j tyol, ax icx in tzaj tna'n tk'ukbil Dios jatum in cawin, ex in tzaj tna'n Dios aju k'ukl tibaj. 23Ay bec'bil cywitze akeye xnak'tzal ti'j ley ex akeye parisey xmletz' keye. In xi cyk'o'ne tlaji'n te Dios ti'j tal c'ul alwen tbi, ex ti'j tal c'ul anís tbi, ex ti'j tal c'ul comino tbi, atzunju mas at toclen in tma'n tuj ley in cyaj cyk'o'ne; minti' in cybincha'ne aju tz'aklxix, ex minti' in k'ak'an cyc'u'je cyi'j xjal, ex minti' in japun cyu'ne aju in xi cytziyane. Atzun jlu ilxix ti'j tu'n cybinchanteye, ax icx tu'n t-xi cyk'o'ne tlaji'n. 24Akeye ẍaklul xjal keye, pero moẍ keye, in jatz cyi'ne jun tal us tuj cyc'aye, ex in xi cybalk'u'ne jun chej camey. 25Ay bec'bil cywitze akeye xnak'tzal ti'j ley ex akeye parisey xmletz' keye. Porque nne'l cytx'jo'ne ti'jtzi vas ex ti'jtzi lak, atzun tuj cyanmiye o'cx in che ximane ti'j tu'n cyelk'ane ex in pon cyc'u'je ti'j nimcu. 26Aya parisey moẍa. Nej tx'jo'mela tuj vas ex tuj lak, ax icx tu'n t-sakix ti'jtzi. 27Ay bec'bil cywitze akeye xnak'tzal ti'j ley ex akeye parisey xmletz' keye. Porque ic cytene ic tza'n ke pantyón k'o'maj txun cyi'j, tbanil che que'yin ti'jtzi, atzunju cyujxi nojni tu'n cybakil cyimni ex tu'n tcyakil ttz'ilil. 28Icxtzun cyeye, in cyyec'un cyibe cywitz xjal mer ic tza'n tz'aklxix keye, atzun tuj cyanmiye nojni tu'n xmletz'il ex tu'n mya ba'n. 29Ay bec'bil cywitze akeye xnak'tzal ti'j ley ex akeye parisey xmletz' keye. Porque in jaw cybincha'ne cypantyón ke t-sanjel Dios, ex in baj cybincha'ne cypantyón ke tz'aklxix tu'n tcyaj tbanil che que'yin, 30ex in cyma'ne: Nokwit ato'ye tuj tk'ijlalil tej cyten kchmane ojtxi, miwtlo oc kk'on kibe cyuc'il tu'n cycub byet ke t-sanjel Dios, che chiye. 31Cyja'tzun nno'c cyk'on cyibe testiw cyi'jxe, ka akeye cyiyjil keju e cub byonte ke t-sanjel Dios. 32Japunxtzun cyu'ne aju cyaj yec'un cyeye cyu'n cychmane. 33Lobaj keye ex tiyjil k'anti' keye ¿tza'ntzun tten tu'n cyco'pje tu'n mi'n tcub cysentense tu'n cyxi'ye tuj infierni? 34Cyja'tzun cxel nsama'ne ke nsanjele cyuc'ile, cyuc'ix keju at cynabl, cyuc'ix ke xnak'tzal; cyxoltzun jlu at junjun cbel cybyo'ne ex cjawil cyk'o'ne twitz crus, ex junjuntl cbajel cyc'ixbisa'ne tuj ja te cyc'ulbile, ex oc cyel ok cywitze che xel lpe'ye cyi'j tuj junjun tnam tu'n cyyajlanjtz cyu'ne; 35cyja'tzun ctzajel castiw cyibaje tu'n cylaj ke xjal e cub byo'n minti' cyil ex el cychc'el twitz tx'otx', tzajnix bant atxix ojtxi tej tcub byo'n Abel, ate xjal lu tz'aklxix, atzunju mancbil cub byo'n, atzun Zacarías tcy'ajal Berequías, aju cub cybyo'ne ti'jxi altar twitz tja Dios. 36Ax toc cxel nma'ne cyeye, tu'n tlaj tcyakil jlu ctzajel castiw cyibaj xjal ate' tuj tk'ijlalil ja'lo. 37Akeye aj Jerusalén in che cub cybyo'ne ke t-sanjel Dios ex in che oc cyxo'ne tu'n abj keju in che tzaj t-sama'n Dios cyuc'ile. Nimcu maj o wajbeye tu'n cyoc nchmo'n keye ic tza'n jun ttxu ec' in che oc tchmo'n ke tal tjak' t-xic', pero minti' o cyajbeye. 38Cybintze, aju tja Dios at cyxole cyjel colin tu'n Dios. 39Porque cxel nma'ne cyeye, mlay chin oc cyque'yintle ja'lo, maxitzun chin oquel cyque'yintle ocxi cymanteye: Cy'iwla'n teju tzul, aju ctzajel sama'n tu'n Kman.

will be added

X\