1 O yolin Jesús juntl maj cye tuj techal, chi cyja': 2 —Aju cawbil in tzaj tuj cya'j ic tten ic tza'n jun rey tbincha jun nintz wa'n tej tmoje' tc'wa'l. 3 Xi t-sama'n rey ke tmajen txcol cye xjal otok txi k'ma'n cye tu'n cyul tuj mejeble'n; pero akeju xjal lu minti' cub tuj cywitz tu'n cytzaj. 4 Xitzun t-sama'n rey junjuntl tmajen ex xi tma'n cye: Cymanxe cye ke xjal txco'maj ke: Lu ma bant wabj wu'ne; ma che cub nbyo'ne wacẍ cyuc'ix ke walune ulni cynabl, tcyakil ma bant tten; cytzaje tuj mejeble'n, che chicuye. 5 Atzun cye xjal minti' xi cybi'n. At jun xi' ak'nal ti'j tawal, ex juntl xi' c'ayil; 6 ex txkantl xjal e tzyet ke majen cyu'n, e oc ten yasul cyi'j, ex e cub cybyo'n. 7 Tejtzun tbinte rey jlu, tzaj nim tk'oj; e je'x t-sama'n ke t-soldad, bi'x cub cybyo'n soldad keju byol xjal, ex cub cypatun cytanmi. 8 Xitzun tma'n rey cye tmajen: Aju nintz wa'n te mejeble'n ma bant tten tcyakil; pero ke xjal xi k'met cye tu'n cyul, mya ba'n ke. 9 Cyxi'tzune jatum in che moje' be, ex cytxcontze cycyakil xjal alcyex ma che cnet cyu'ne, tu'n cyul tuj mejeble'n, chi rey. 10 E je'xtzun ke majen tuj be, e tzaj cychmo'n cycyakil xjal e cnet cyu'n, ke xjal mya ba'n ex ke xjal ba'n; cyja'tzun aju ja jatum oc mejeble'n o noj cyu'n xjal otok che tzaj txco'n. 11 Ocxtzun rey que'yil cye xjal otok che tzaj txco'n, o til rey jun xjal mya t-xbalun toc aju in ajben te mejeble'n. 12 Xi tma'n rey te xjal: Aya wuc'il, ¿tza'n tten soctza tzalu ex mya t-xbaluna toc aju in ajben te mejeble'n? Atzunte xjal minti' k'ajt. 13 Xitzun tma'n rey cye keju in che sipan wabj: Cyc'alome tkan tuc'ix tk'ab, ex cyxo'mixe tuj klolj ttxa'n pe'n; atzun ctzajel ok'el ex ckitx'itx'il t-xe cye' xjal, chi rey. 14 Porque nimcu in che tzaj txco'n, pero nic'xi keju sc'o'maj ke, chi Jesús. 15 E je'xtzun ke parisey, ex e yolin ti'j cyxolx tza'n tten tu'n tcub tz'ak Jesús cyu'n ti'j jun tyol. 16 E je'x cysama'n parisey cyxnak'tzben tuc'il Jesús cyuc'ix keju in che oc lpe' ti'j Herodes ex xi cyma'n te: —Xnak'tzal, bi'n ke ku'n aya ax toc tyola, ex in tk'o'na xnak'tzbil tuj tumelxix tza'n tten tu'n kbet twitz Dios, ex minti' in xoba cywitz xjal, porque minti' nno'c tque'yina aju t-xilen xjal. 17 K'mantza keye, ¿chi toc tu'na? ¿Ba'npe tu'n t-xi kk'o'ne chojbil nne'l tkanin gobierni ex ka mi'n? Che chi. 18 Pero el tnic' Jesús ti'j cyximbetz mya ba'n ex xi tma'n cye: —¿Tiku'n in che jyone tumel wi'je tu'n ncub tz'ake tuj jun wile? Xmletz' keye. 19 Cyyec'untze jun pwak weye aju in xi k'ot te chojbil. Xitzun cyyec'un jun denari pwak. 20 Xitzun tkanin Jesús cye: —¿Al etzun tilbilal toc twitz pwak ex al etzun biybaj tz'iban twitz? 21 —Te gobierni, che chi. Xitzun tma'n Jesús cye: —Pwes cyk'onxe te gobierni aju te gobierni, ex cyk'onxe te Dios aju te Dios. 22 Tej cybinte jlu, e labin ti'j, cyajtzun ten Jesús cyu'n, ex e ic'tzun. 23 Tujx k'ij lu e ul junjun sadusey tuc'il Jesús, akeju in cyma'n ka mlay jatz ank'in jun xjal cyxol cyimni, ex xi cykanin te: 24 —Xnak'tzal, che chi, at jun yol cyaj tma'n Moisés: Ka at jun xjal ma cyim ex minti' jun tc'wa'l otok tzaj, axju titz'in cmojebel tuc'il t-xu'jil ktzan ttzic, tu'ntzun tcyaj jun t-xel ktzan ttzic tu'n, tu'n mi'n tnaj tiyjil. 25 At wuk xjal e ten kxole cyitz'in cyib. Cnettzun t-xu'jil ju tnejel, ex cyim; ex tu'nju minti' jun tc'wa'l cyaj, cyaj ten ju t-xu'jil te t-xu'jil tcab c'wa'l. 26 Ax icx o baj ti'j tcab c'wa'l ex ti'j toxin, ax icx baj cyi'j cywukil, e baj cyim. 27 Cycyimlenxi cycyakil, ax icx te xu'j cyim. 28 Tuj tk'ijlalil oc cyjatz ank'in cyimni, ¿alcyetzun coquel te tchmil xu'j cyxol keju wuk xjal cyitz'in cyib tu'nju cywukil e xujlante te? Che chi Sadusey. 29 Xitzun ttzak'we'n Jesús: —Ma che el tzpete ti'j porque minti' nne'l cynic'e ti'j ju in tma'n tuj Tu'jil, ex minti' nne'l cynic'e ti'j tipumal Dios. 30 Porque tuj tk'ijlalil oc cyjatz ank'in xjal cyxol cyimni minti' cyxu'jil xinak cnetel ex minti' cychmil xu'j cnetel, porque cycyakil ic che oquel ic tza'n ke t-anjel Dios ate' tuj cya'j. 31 Pero ti'j ju tu'n cyjatz ank'in xjal cyxol cyimni, ¿bajxpe jaw cysch'i'ne aju o tma Dios cyeye, chi cyja':? 32 Akine Tdios Abraham, ex Tdios Isaac, ex Tdios Jacob, chi Dios. Ate Dios mya Cydios cyimni, nok o'cx Cydios itz', chi Jesús cye. 33 Tej cybinte xjal jlu, e labin ti'j t-xnak'tzbil Jesús. 34 Atzun cye parisey, tej cybinte ka minti' e k'ajt sadusey tu'n Jesús, baj cychmon cyib. 35 Ex at jun chic'bal ti'j ley cyxol o tajbe tu'n toc Jesús tuj joybil ti'j tu'n, xi tkanin te: 36 —Xnak'tzal, ¿alcye jun mandamyent mas ma' toclen tuj ley? Chi xjal. 37 Xi tma'n Jesús te: —Cyc'ujlame Kman Dios tu'n tcyakil cyanmiye ex tu'n tcyakil cyc'u'je ex tu'n tcyakil cynable. 38 Atzun tnejel mandamyent jlu ma'xix toclen. 39 Ex aju tcabin mandamyent icx tten ic tza'n tnejel, in tma'n: Cyc'ujlame ke cyuc'ile ic tza'nx cyeye in cyc'ujlan cyibe. 40 Akeju cabe mandamyent lu, atzun ttxuylal tley Moisés ex ttxuylal cyyol ke t-sanjel Dios, chi Jesús te xjal. 41 Axtok cychmon cyib ke parisey, xi tkanin Jesús cye: 42 —¿Chi toc cyu'ne ti'j ju Crist aju at toclen tu'n Dios? ¿Al e c'wa'lbaj? Xi cyma'n te: —Te David. 43 Xitzun tma'n Jesús cye: —¿Tza'ntzun tten in yolin David ti'j tu'n Xewbaj Xjan, in tma'n ka a Crist Tajaw? Porque chi David: 44 Xi tma'n Kman te Wajawe: Kecuya tuj nbank'abe acutzun in cub cyi'j ke aj k'oj ti'ja wu'ne, chi tuj Tu'jil. 45 [Ka in tma'n David ka a Crist Tajaw, ¿tza'ntzun tten tu'n toc Crist te tc'wa'l David?] Chi Jesús cye. 46 Ex mi jun cye cnet yol tu'n tu'n t-xi ttzak'we'n; ya minti'tl oc cynimarin cyib tu'n t-xi cykanin juntl yol te.
Copyright ℗ 2000 Hosanna Grabado por Producciones Cristianas Vina