Mateo 21

1Ch'ixtok cycanun tuj Jerusalén, e pon tuj tal tnam Betfagé t-xe witz Olivos tbi, xi t-sama'n Jesús cabe t-xnak'tzben 2ex xi tma'n cye: —Cyxi'ye tuj tal tnam tocx chixin; atzun cnetel jun ttxu bur cyu'ne c'alo'n tuc'ix jun tal bur; cypaju'mile ex cyintze tzalu. 3Ka at jun xjal ma tma jun yol cyeye, cymanxe te: C'ajbel te Kajaw, ex jurat che ajetz tk'o'n. che chicuye, chi Jesús. 4Tcyakil jlu o bant tu'ntzun tjapun aju yol k'ma'maj tu'n t-sanjel Dios, chi cyja': 5Cymanxe cye xjal aj Sión: Lu tzul Cyreye cyuc'ile, mans ex tjax tibaj jun ttxu bur, tjax tibaj jun tal bur, tal jun ttxu bur, chi t-sanjel Dios. 6E je'xtzun ke xnak'tzben, ex o cybincha ic tza'n tzaj k'ma'n cye tu'n Jesús. 7Ultzun cyi'n ju ttxu bur tuc'ix ju tal bur, jax cyk'o'n cyxbalun cyibaj; jaxtzun ke' Jesús tibaj tal bur. 8Atzun cye tnam xjal cub cylic'un cyxbalun tuj be; ex junjuntl el cytx'emin tk'ab tze', cub cyk'o'n tuj be. 9Atzun ke xjal nejni twitz Jesús cyuc'ix keju lepchix ti'j in che sch'in ex in cyma'n: —Kk'onx k'olbebl te Tc'wa'l rey David. Cy'iwla'n teju tzul, tu'n Kman ma tzaj sama'n. Nimanxwit tbi Dios tuj cya'j. 10Tejtzun tocx Jesús tuj tnam Jerusalén, cycyakil xjal tuj tnam e jaw tilj ex in cyma'n: —¿Alcyeju xjal lu? 11Atzun cye xjal xi cyma'n: —Ate jlu Jesús t-sanjel Dios, aju aj Nazaret tuj tx'otx' Galiley. 12Ocxtzun Jesús tuj tja Dios, e bje'tz tlajo'n cycyakil keju in che c'ayin ex in che lok'on tuj tja Dios; ex jaw tpich'k'u'n cymes ke ch'expul twitz pwak, tuc'ix cyk'ukbil keju in che c'ayin paloma. 13Xi tma'n cye: —At jun yol in tma'n tuj Tu'jil chi cyja': We nja, ja te nabl Dios tbi c'oquel, chi tuj Tu'jil; atzun cyeye ma tz'oc cyk'o'ne te cyjul elek', chi Jesús. 14E ultzun ke moẍ cyuc'ix ke cox tuc'il Jesús tuj tja Dios, ex e banix tu'n. 15Atzun cye nejenel cye pal cyuc'ix ke xnak'tzal ti'j ley, tzaj cyk'oj tej cylonte ke tbinchben Jesús nim tipumal, ex tej cybinte in che sch'in ke c'wa'l tuj tja Dios ex in cyma'n: Kk'onx k'olbebl te Tc'wa'l rey David, che chi c'wa'l. 16Ex xi cyma'n nejenel cye pal te Jesús: —¿Mape tbiya aju in cyma'n jlu? —Ma nbiye, chi Jesús. Yajtzun cyeye, ¿bajxpe jaw cysch'i'ne tuj Tu'jil jatum in yolin ti'j jlu? Chi cyja': Ma tzaj tma'na tu'n tjaw nimsa'n tbiya cyu'n tal c'wa'l ex cyu'n keju in che ch'u'n, chi tuj Tu'jil. 17E cyajtzun tk'o'n Jesús ke xjal, etz ti'jtzi tnam Jerusalén, pon tuj tnam Betania ex axtzun cyaj ten te konic'an. 18Te juntl k'ij te prim, cyja'tok t-xi' Jesús tuj tnam Jerusalén, tzaj el tc'u'j. 19Ex o til Jesús jun tkan higo tcub ttzi be, xi'tzun t-xe tkan higo, pero minti' cnet jun twitz higo tu'n, o'cx t-xak at. Xitzun tma'n Jesús te tkan higo: —Te jumajx mlay tz'oc jun twitza, chi Jesús. Bi'xtzun tzkij tkan higo. 20Tej cylonte ke t-xnak'tzben jlu, e labin ti'j. —¿Tza'ntzun tten bi'x ma tzkij tkan higo? Che chi. 21Xi ttzak'we'n Jesús: —Ax toc cxel nma'ne cyeye, ka at cyocslable ex ka minti' ma jawje' cyc'u'je, mya nok o'cx jacu bant tu'n ttzkij tkan higo cyu'ne, ax icx jacu txi cyma'ne teju witz lu: Tic'a ex xo'nx tiba tuj mar, ka che chiye, ex cbanteltzun aju cxel cyma'ne. 22Ex tcyakilju cxel cykanine tuj na'j Dios, ex ka ma ke' cyc'u'je ti'j Dios, oc cyc'ma'ye. 23Tej tocx Jesús tuj tja Dios, e pon lak'e' ke nejenel cye pal cyuc'ix ke cytijil xjal judiy; matok in tk'o'n Jesús xnak'tzbil xi cykanin te: —¿Ti toclena tu'n tbinchanteya tcyakil jlu? ¿Alcye ma tzaj k'onte toclena? Che chi. 24Xi ttzak'we'n Jesús: —Icx weye at jun yol cxel nkanine cyeye; ka ma tzaj cytzak'we'ne, ax icx weye cxel nma'ne cyeye ti woclene tu'n nbinchanteye tcyakil jlu. 25¿Alcye tzaj k'onte toclen Juan tu'n cybyan xjal tu'n? ¿Tu'npe Dios ex ka cyu'n xjal? Chi Jesús cye. Atzun cye e oc ten yolil ti'j cyxolx in cyma'n: —Ka ma txi kma'n, tu'n Dios tzaj k'o'n toclen, ctzajeltzun tma'n ke: ¿Tiku'ntzun minti' xi cyocsla'ne? Chilo. 26Ex ka ma txi kma'n, cyu'n xjal tzaj k'o'n toclen, jaculo tzaj kxobil cywitz xjal porque cycyakil in che yolin ti'j ka ate Juan t-sanjel Dios. 27Xitzun cyma'n te Jesús: —Minti' bi'n ku'ne. Icx te Jesús xi tma'n cye: —Icx weye mlay txi nma'ne cyeye ti woclene tu'n nbinchanteye tcyakil jlu. 28Pero ¿chi toc cyu'ne? At jun xjal attok cabe tc'wa'l; pon xjal tuc'il ju tzicbaj ex xi tma'n te: Nc'wa'l, txi'ya ak'nal ja'lo tu'n tcub twitz uva. 29Tzaj ttzak'we'n ju tc'wa'l: Mlay chinxe. Pero te yajxitl ajtz ti'j tanmi ex xi'tzun. 30Ax icx pontl ju mambaj tuc'il ju tz'inbaj, ax ju yol xi tma'n te; atzunte tz'inbaj tzaj ttzak'we'n: Chin xe'le, Tat. Pero minti' xi'. 31¿Alcyetzun cyxol cabe c'wa'lbaj lu tbincha aju tajbil tman? Chi Jesús cye. Xi cytzak'we'n xjal: —Aju tzicbaj. Xi tma'ntl Jesús cye: —Ax toc cxel nma'ne cyeye: Ke peyil pwak ex ke xu'j aj pajil nej che oquex cywitze tuj tcawbil Dios. 32Porque ul Juan cyuc'ile, aju e byan xjal tu'n, in tma'n tu'n cybinchanteye aju tz'aklxix, ex minti' xi cyocsla'ne; atzun cye peyil pwak ex ke xu'j aj pajil xi cyocsla'n; atzun cyeye o cyile jlu, pero minti' ajtz ti'j cyanmiye ex minti' xi cyocsla'ne. 33Cybintze juntl techal: At jun patrón cu'x tawa'n tkan uva, oc tk'o'n pe'n ti'j, cu'x tlacu'n jun jul jatum tu'n tel ptz'et ta'l uva, jaw tbincha'n jun ja te cwentbil tkan uva, cyajtzun tk'o'n tx'otx' te majen cye junjun ak'nal ex xi'tzun tuj jun lugar najchak. 34Tejtzun tul tk'ijlalil tu'n tcub twitz awal, e tzajtzun t-sama'n patrón ke tmajen cyuc'il majenal tx'otx' tu'n tc'monte ch'in twitz awal te ta'l ttx'otx'. 35Atzun cye majenal tx'otx' e tzyet ke majen cyu'n; jun baj cyc'ixbisa'n, juntl cub cybyo'n, ex juntl oc cyxo'n tu'n abj. 36E tzajtzun t-sama'ntl patrón txkantl tmajen, mas ela' cybet cywitz keju e tzaj t-sama'n nej; atzun cye majenal tx'otx' icx cybincha cyi'j ic tza'n cybincha nej. 37Te mancbilxitzun tzaj t-sama'n patrón tc'wa'l: Kapelo at ch'in tchi nc'wa'le tuj cywitz, chi patrón. 38Atzun cye majenal tx'otx', tej cylonte cyja' ttzaj tc'wa'l patrón, cyma cyxolx: Atzunte etzal jlu; chux keye kbyoncu ex ktzyum aju tetzbil, tu'ntzun tcyaj ten tetzbil te ke, che chi. 39Tzyettzun cyu'n, ex cyi'n ti'jxi tkan awal, ex cub cybyo'n. 40Octzun tul tajaw tkan awal, ¿chi toc cyu'ne, ti oc tbincha' cyi'j ke majenal tx'otx' lu? Chi Jesús cye. 41Xitzun cyma'n: —Oc che bel tbyo'n ke xjal lu mya ba'n ke, mlay tzaj k'ak'an tc'u'j cyi'j; atzun tkan uva cxel tk'o'n te majen cye txkantl ak'nal, tu'ntzun t-xi cyk'o'n ch'in twitz awal te oc tul tk'ij, che chi xjal. 42Entons xi tma'n Jesús cye: —¿Bajxpe jaw cysch'i'ne ti in tma'n tuj Tu'jil? Chi cyja': Aju abj el cyic'un ke binchal ja ma tz'oc te scyini te simyent. Tu'n Kman ma bant jlu, ex ma' t-xilen jlu tuj kwitz, chi tuj Tu'jil. 43Cyja'tzun cxel nma'ne cyeye, c'elel k'i'n cyoclene tu'n mi'n cyocxe tuj tcawbil Dios, ex cxel tk'o'n Dios cyoclen juntl c'loj xjal, tu'n t-xi cyk'o'n ch'in twitz awal teju tajaw awal. 44Alcye jun xjal ma jaw tolj ex ma cub tz'ak tibaj abj lu, bi'x cbajel tokj; ex alcye jun xjal ka ma cub tz'ak abj lu tibaj, bi'x cbajel buchj xjal tu'n, chi Jesús cye. 45Tejtzun cybinte ke nejenel cye pal cyuc'ix ke parisey akeju techal tma Jesús, el cynic' ti'j ka cyi'j in yolintok Jesús. 46O cyajbe tu'n ttzyet Jesús cyu'n, pero tzaj cyxobil cywitz xjal, porque in cyma'n xjal ka t-sanjel Dios te Jesús.

will be added

X\