Mateo 20

1Aju cawbil in tzaj tuj cya'j ic tten ic tza'n jun patrón, te prim ex jyol majen tu'n cyak'nan tu'n tcub twitz uva. 2Banttzun ti'j tu'n cyuc'il majen, jun denari pwak twi cyc'u'j jun k'ij, e je'xtzun t-sama'n ak'nal. 3Tej tpon las nueve ex patrón juntl maj, o til junjun xjal ate' tuj plas minti' cyak'un. 4Xi tma'n cye: Ax icx cyeye cyxi'ye ak'nal wuc'ile, jacu chjet cyk'ije wu'ne, chi patrón. E je'xtzun ke majen ak'nal. 5Ex patrón juntl maj te chilcuk'ij ex juntl maj te las tres te kale, ax icx o tbincha. 6Extzun juntl maj ch'ixtok tpon las sinco, e cnet junjuntl xjal tu'n minti' cyak'un ex xi tma'n cye: ¿Tiku'n nok nne'x cyk'ije tzalu minti' in che ak'nane? 7Xitzun cyma'n te: Porque mi a'l jun saj k'mante kak'une. Xitzun tma'n patrón cye: Ax icx cyeye cyxi'ye ak'nal wuc'ile, jacu chjet twi cyc'u'je wu'ne. 8Tejtzun tkokax, xi tma'n patrón te tmayordom: Txcontza ke majen ex k'onxa twi cyc'u'j; nej k'onxa twi cyc'u'j keju ẍe ul te mancbil, te mancbiltzun k'onxa twi cyc'u'j keju ẍe ul nej. 9Tejtzun cypon keju e je'x ak'nal ch'ixtok tpon las sinco, teyle junjun o tc'am jun denari pwak. 10Tejtzun cypon keju e je'x ak'nal nej, cub cyximan ka mas tu'n cychjet. Pero ax icx teyle junjun o cyc'am jun denari pwak. 11Tejtzun cyc'monte twi cyc'u'j, tzaj jun cyyol ti'j patrón, 12ex xi cyma'n: Ke majen ẍe ul te mancbil nok jun or ma che ak'nan, ex ax twi cyc'u'j ma chjet tu'na ic tza'n keye ma ko sicte ti'j ak'untl ex ma tzic'x ta'w k'ij ku'ne enter k'ij. 13Xi ttzak'we'n patrón ex xi tma'n te jun majen: Aya wuc'il, minti' jun mya ba'n ma nbinchaye teya. ¿Myapetzun bi'x xbant ti'j ku'n jun denari pwak twi tc'u'ja? 14K'inxa twi tc'u'ja ex txi'ya. Ic tza'n ma txi nk'o'ne teya, ax icx waje tu'n t-xi nk'o'ne te xjal lu aju sul te mancbil. 15¿Myapetzun ba'n tu'n nbinchanteye alcye wajbile ti'j npwake? ¿Plojpe ma tz'el tuj twitza tu'nju ba'n ki'ne? 16Cyja'tzun, keju ate' te tnejel ja'lo, che oquel te mancbil, atzun keju ate' te mancbil ja'lo che oquel te tnejel. [Porque nimcu in che txconjtz, pero nic'xi keju sc'o'maj], chi Jesús, baj tma'n cye. 17Tej cyja'tok tjax Jesús tuj Jerusalén, xi tuc'in ke t-xnak'tzben tuj be junx cye ex xi tma'n cye: 18—Ko jawix tuj Jerusalén ex chin xel k'o'ne tuj cyk'ab nejenel cye pal ex tuj cyk'ab xnak'tzal ti'j ley, ex cbel k'o'n nsentense tu'n ncyime, akine sc'o'maj kine tu'n Dios tu'n ntene cyuc'il xjal, 19ex chin xel k'o'ne tuj cyk'ab stranjer xjal, chin oquel xmayine cyu'n, chin bajel c'ixbisa'ne, ex chin jawil k'o'ne twitz crus; pero tuj toxin k'ij chin jawil ank'ine cyxol cyimni. 20Pontzun lak'e' t-xu'jil Zebedey cyuc'ix ke tal, cub ẍmeje' twitz Jesús tu'n t-xi tkanin jun xtalbil. Atzunte Jesús xi tkanin te: 21—¿Alcye taja? Chi Jesús. Xitzun tma'n xu'j te: —K'ontza cyoclen keju cabe wale lu tu'n cycub ke' ttxlaja oc tula tu'n tcawina, jun tuj tbank'aba ex juntl tuj tnayaja. 22Xitzun ttzak'we'n Jesús: —Minti' nne'l cynic'e ti'j ju in tzaj cykanine. ¿Jacupe tzic'x cyu'ne ic tza'n weye ex tu'n t-xi cyc'a'ne aju cxel nc'a'ne? [¿Ex jacupe tzic'x nim c'ixc'oj cyu'ne ic tza'n weye c'ic'ex wu'ne?] —Jacu bant ku'ne, che chi. 23Xi tma'n Jesús cye: —Ax toc c'ic'ex yajbil cyu'ne aju weye c'ic'ex wu'ne; [ex c'ic'ex nim c'ixc'oj cyu'ne ic tza'n weye c'ic'ex wu'ne,] pero aju tu'n cycub ke'ye tuj nbank'abe ex tuj nnayaje, mya tuj ncwente ta', banimaj tu'n Nmane alcye ke tu'n cycub ke' ntxlaje. 24Tej cybinte keju lajtl t-xnak'tzben, tzaj cyk'oj cyi'j keju cabe cyitz'in cyib. 25E tzajtzun ttxco'n Jesús ex xi tma'n cye: —Bi'n cyu'ne, ke nejenel cyxol ke nasyon, in che cawin cyibaj xjal, ex keju at cyoclen, in che cyaj xjal tjak' cycawbil. 26Atzun cyxole mya ic ttenju. Ka at jun cyxole taj tu'n tten mas toclen, e toc te ajbel cyeye. 27Ex alcye taj tu'n toc te nejenel cyxole, e toc te cymajene. 28Ic tza'n weye, sc'o'maj kine tu'n Dios tu'n ntene cyuc'il xjal, minti' ma chin ule tu'n cyajben mastl weye, nok o'cx tu'n wajbene cye mastl ex tu'n t-xi nk'on wibe tu'n ncyime tu'n cycolpet nimcu xjal. 29Tejtzun tetz Jesús cyuc'ix t-xnak'tzben tuj tnam Jericó, e oc lpe' nim xjal ti'j. 30At cabe xjal moẍ k'ukl ke ttzi be. Tejtzun cybinte cyja' ttzaj Jesús, e jaw sch'in in cyma'n: —Aya Tat Tc'wa'l David, k'ak'antz tc'u'ja ki'je, che chi. 31Atzun cye xjal e oc ten ilil cyi'j, xi cymayo'n tu'n mi'n cyk'ajt; atzun cye moẍ mas e jaw sch'in cyuwxix, in cyma'n: —Aya Tat Tc'wa'l David, k'ak'antz tc'u'ja ki'je. 32We'tzun Jesús, e tzaj ttxco'n ex xi tma'n cye: —¿Alcye cyajbile tu'n nbinchanteye cyeye? Chi Jesús. 33Xitzun cyma'n ke moẍ te: —Tat, kajbile tu'n tjaket kwitze, che chi. 34Tzajtzun k'ak'an tc'u'j Jesús cyi'j, oc tmaco'n tbak' cywitz; ex jurat naj jaket cywitz, ex e oc lpe' ti'j.

will be added

X\