1 Tej titz'j Jesús tuj tnam Belén tuj tx'otx' Judey, tuj tk'ijlalil tej tten rey Herodes, at junjun xjal aj nabl e tzaj tuj tjawitz k'ij e ul tuj Jerusalén. 2 Xi cykanin: —¿Jatum ta' ju rey cye xjal judiy, aju ma tz'itz'j? Porque ma kile tche'w tuj tjawitz k'ij, ex ma ko tzaje c'ulul twitz, che chi. 3 Tej tbinte rey Herodes jlu, bi'x naj tnabl cyuc'ix cycyakil xjal aj Jerusalén. 4 Octzun tchmo'n Herodes cycyakil nejenel cye pal cyuc'ix ke xnak'tzal ti'j ley cye tnam xjal, xi tkanin cye jatum tu'n titz'j ju Crist aju at toclen tu'n Dios. 5 Xitzun cyma'n te: —Tuj tnam Belén tu'n titz'j, tuj tx'otx' Judey; porque ictzun tten tz'iban tu'n t-sanjel Dios. Chi t-sanjel Dios: 6 Aya tnam Belén tuj tx'otx' Judá, mya mas ch'in toclena cyxol mastl tnam tuj Judá; porque atzun ctzajel jun nejenel tuja, te cwentil cye xjal aj Israel, akeju etzan wu'ne. 7 E tzajtzun ttxco'n Herodes ke xjal aj nabl tuj ewaj, cheba xi t-xjelin cye jte'xi k'ij ttzajlen tyec'un tib che'w. 8 Xitzun t-sama'n Herodes ke xjal aj nabl tuj tnam Belén, ex xi tma'n cye: —Cyxi'ye tuj Belén, cheba cybime ti'j tal ne'; octzun tcnet cyu'ne, cytzaje k'malte weye tu'ntzun icx weye tu'n nxi'ye c'ulul twitz, chi Herodes. 9 Tejtzun cybinte ke xjal aj nabl tyol rey e je'xtzun. Ex lu ju che'w nejni cywitz, aju otok cyil tuj tjawitz k'ij. Tejtzun tcanun che'w jatum ta' tal ne', axtzun cub ten. 10 Tejtzun cylonte ke xjal aj nabl ju che'w, nimxix e jaw tzalaj. 11 E ocxtzun tuja ex o cyil ju tal ne' tuc'ix Mariy aju ttxu'; e cub ẍmeje' ex e c'ulun twitz ne'. Jatztzun cyi'n cyk'inumabl, xi cyk'o'n oyaj te, ex atzun jlu: K'an pwak, tuc'ix storac, tuc'ix tk'olil tze' mirra tbi. 12 Pero tzaj k'ma'n cye xjal aj nabl tu'n Dios tuj witzic' tu'n mi'n cyaj meltz'aj tuc'il Herodes; e ajtzun tuj cytanmi cnet juntl cybe. 13 Cyajlenxitzun ke xjal aj nabl, cub tyec'un tib jun t-anjel Kman twitz José tuj witzic'. Chi anjel: —We'ctza ex k'inxa tal ne' tuc'ix ttxu', ex t-xi oka tuj tx'otx' Ejipt, axtzun tcyaj tena, maxitzun c'ajetza oc t-xi nma'ne teya; porque ctzajel Herodes jyolte ne' tu'n tcub tbyo'n. 14 Tej tel twatl José, xi ti'n tal ne' tuc'ix ttxu' te konic'an ex xi' tuj Ejipt. 15 Axtzun cyaj ten tuj Ejipt; maxitzun ajtz tej tcyim Herodes, tu'ntzun tjapun ju yol k'ma'maj tu'n Kman tzaj tma'n tu'n t-sanjel: Tuj Ejipt etz ntxco'ne Nc'wa'le, chi t-sanjel Dios. 16 Tejtzun tel tnic' Herodes ti'j otok cub sbu'n cyu'n xjal aj nabl, tzaj nimxix tk'oj; ex etz jun orden tu'n, tu'n cybyet cycyakil tal k'a na'nx tjapun cabe abk'i cyu'n ate' tuj Belén ex cyuj aldey ti'jele Belén; el tnic' ti'j tk'ijlalil tu'nju yol tzaj k'ma'n te cyu'n aj nabl. 17 Japuntzun aju yol tz'iban tu'n Jeremías aju t-sanjel Dios. Chi Jeremías: 18 O binjtz tk'ajk'ajel cywi xjal tuj Ramá in che wuyin, in che ok' ex in che ayin; in ok' Raquel cyi'j ke tal, ex minti' o tajbe tu'n tk'ukbanjtz tc'u'j, porque otok che naj ke tal, chi Jeremías. 19 Pero tcyimlenxitzun Herodes, cub tyec'un tib jun t-anjel Kman twitz José tuj witzic' tuj tx'otx' Ejipt ex tma anjel: 20 —We'ctza, k'inxa tal ne' tuc'ix ttxu', ex txi'ya tuj cytx'otx' aj Israel, porque o che cyim keju oc tilil cyu'n tu'n tcub cybyo'n tal ne'. 21 Jawtzun we' José, xi ti'n tal ne' tuc'ix ttxu', ex ul tuj cytx'otx' aj Israel. 22 Pero tej tbinte José ate Arquelao in cawin tuj tx'otx' Judey te t-xel Herodes aju ktzan tman, tzaj t-xobil José tu'n t-xi' tuj Judey; pero tzaj tma'n Dios te tuj witzic' tu'n t-xi' tuj tx'otx' Galiley. 23 Ultzun ex najan tuj tnam Nazaret, tu'ntzun tjapun aju yol k'ma'maj cyu'n t-sanjel Dios ka ate Jesús attok toquel k'o'n tbi aj Nazaret.
Copyright ℗ 2000 Hosanna Grabado por Producciones Cristianas Vina