1 Tejtzun tbaj tma'n Jesús ju yol lu, etz tuj Galiley, xi' tuj tx'otx' Judey jlajxi nima Jordán. 2 Ex nim xjal e oc lpe' ti'j, ex atzun e banix yab tu'n. 3 E pontzun lak'e' ke parisey tuc'il Jesús tu'n toc tuj joybil ti'j cyu'n, ex xi cyma'n te: —¿K'o'npelo tu'n ley tu'n tex tlajo'n xinak t-xu'jil nok tu'n tlaj jun ti'xti? Che chi. 4 Xi ttzak'we'n Jesús: —¿Bajxpe jaw cysch'i'ne tuj Tu'jil tej tbant xjal tu'n Dios t-xe tnejel, xinak ex xu'j e cub tbincha'n? 5 Ex tma Dios: Cyja'tzun cyjel tk'o'n xinak tman tuc'ix ttxu', ex cmojebel tuc'il t-xu'jil, ex cycabil che oquel te junx. 6 Cyja'tzun mya cabe cyten, nok junx cyten; cyja'tzun, aju oc tmojba'n Dios, mi'n tz'el tpa'n xjal, chi Jesús cye. 7 Xitzun cyma'n parisey: —¿Tiku'ntzun cyaj tma'n Moisés tu'n tex tlajo'n xjal t-xu'jil ex tu'n t-xi k'ot jun u'j te xu'j jatum in tma'n ka otok cub cypa'n cyib? Che chi. 8 Xi tma'n Jesús cye: —Tu'nju puro cyuw cyanmiye, cyja'tzun cyaj tma'n Moisés tu'n tex cylajo'ne cyxu'jile. Pero t-xe tnejel mya ic ttenju. 9 Atzun weye cxel nma'ne cyeye, ka at jun xjal ma cub tpa'n tib tuc'il t-xu'jil ex ka minti' in tbincha'n xu'j aj pajil, katzun ma moje' xinak tuc'il juntl xu'j, in tbincha'n xinak aj pajil; [ex ka ma moje' juntl xinak tuc'il ju xu'j otok tz'el lajo'n, in tbincha'n xinak aj pajil], chi Jesús cye. 10 Xitzun cyma'n t-xnak'tzben Jesús te: —Ka ic tten tchwinklal xinak tuc'il t-xu'jil, maslo ba'n tu'n mi'n tcnet t-xu'jil xjal, che chi. 11 Xitzun tma'n Jesús cye: —Mya cycyakil xjal jacu txi cyniman ju yol lu, nok o'cx keju ma tzaj tk'o'n Dios cyoclen tu'n tjapun cyu'n. 12 Porque at junjun xjal minti' tumel tu'n cymoje' porque cyitz'jlenx icju; ex at junjun in che oc cyu'n xjal icju tu'n mi'n cymoje'; ex at junjun in che oc icju cyu'nx cyib, minti' in che moje' nok tu'n cyajben tuj tcawbil Dios in tzaj tuj cya'j. Alcye jacu bant jlu tu'n, bincham, chi Jesús cye. 13 E tzajtzun k'i'n junjun tal c'wa'l twitz Jesús tu'n tcub tk'o'n tk'ab tibaj cywi' ex tu'n tna'n Dios cyi'j; atzun cye t-xnak'tzben e mayet ke xjal cyu'n, akeju e tzaj k'inte cye tal c'wa'l. 14 Pero xi tma'n Jesús cye t-xnak'tzben: —Cyk'onxe ambil cye tal c'wa'l tu'n cytzaj wuc'ile ex mi'n che'x cymayo'ne; porque aju cawbil in tzaj tuj cya'j cyecye xjal ic cyten ic tza'n ke tal c'wa'l lu, chi Jesús. 15 Cubtzun tk'o'n tk'ab tibaj cywi', ex xi' tuj juntl lugar. 16 Ultzun jun cu'xun tuc'il Jesús ex xi tma'n te: —Xnak'tzal ba'n, ¿alcye ba'n tu'n nbinchanteye tu'n ncambanteye chwinklal te jumajx? 17 Xi tma'n Jesús te: —¿Tiku'n in chin oc tk'o'na te ba'n? Mi a'l jun xjal ba'n, o'cx te Dios ba'n. Ka taja tu'n tten tchwinklala te jumajx, che japunx ke mandamyent tu'na. 18 Xitzun tma'n cu'xun: —¿Alcyetzun ke mandamyent? Xi tma'n Jesús te: —Atzun ke jlu: Mi'n che biyune; mi'n cybinchaye aj pajil; mi'n che elk'ane; mi'n che nic'ane yol ti'j juntl; 19 cynimanxe cymane ex cytxuye; ex cyc'ujlame cyuc'ile ic tza'nx cyeye in cyc'ujlan cyibe. 20 Xitzun tma'n ju cu'xun te Jesús: —Tcyakil jlu o japun wu'ne tej matok c'wa'lx kine. ¿Alcyetzun juntl atx taj tu'n tjapun wu'ne? 21 Xitzun tma'n Jesús te: —Ka taja tu'n toca tz'aklxix, txi'ya, c'ayinxa tcyakilju at teya ex k'onxa cye meba, ex cteltzun tk'inumabla tuj cya'j; tzaja, ex lpe'ca wi'je. 22 Tejtzun tbinte cu'xun ju yol lu, ajtzun in bisunxix, porque nimtok tk'inumabl at. 23 Xitzun tma'n Jesús cye t-xnak'tzben: —Ax toc cxel nma'ne cyeye, cyuw tu'n tocx jun xjal k'inun tuj cawbil in tzaj tuj cya'j. 24 Cxel nma'ne juntl maj cyeye, mas jurat jacu tz'ex jun chej camey tuj toy' jun bak, twitzju tu'n tocx jun k'inun tuj tcawbil Dios. 25 Tej cybinte ke t-xnak'tzben Jesús ju yol lu, bi'x jaw naj cynabl, ex cyma: —Ka icju ¿alcyetzun jacu clet? 26 Xi tque'yin Jesús cywitz ex xi tma'n cye: —Mlay bant jlu cyu'n xjal, pero te Dios tcyakil jacu bant tu'n. 27 Xitzun ttzak'we'n Pedro: —Tat, quina ko'ye, ma cyaj kk'o'ne tcyakilju at keye ex ma ko oc lpe'ye ti'ja. ¿Alcyetzun ctzajel k'o'n keye? 28 Xi tma'n Jesús cye: —Ax toc cxel nma'ne cyeye, tuj tk'ijlalil oc toc tcyakil te ac'aj, chin bel ke'ye tuj nk'ukbile in koptz'aj tu'n ncawine, akine sc'o'maj kine tu'n Dios tu'n ntene cyuc'il xjal; ax icx cyeye che bel ke'ye tibaj cablaj k'ukbil tu'n cycawine cyibaj cablaj c'loj tiyjil Israel, porque ma che oc lpe'ye wi'je. 29 Ex alcye jun ma cyaj tk'o'n tja, ex ka ttzic, ex ka titz'in, ex ka tman, ex ka ttxu', ex ka t-xu'jil, ex ka tc'wa'l, ex ka ttx'otx', nok tu'n nlaje, jun syent maj oc tc'ma' t-xel, ex oc tcamba' tchwinklal te jumajx. 30 Pero keju ate' te tnejel ja'lo, nimcu che oquel te mancbil; ex keju ate' te mancbil ja'lo, nimcu che oquel te tnejel.
Copyright ℗ 2000 Hosanna Grabado por Producciones Cristianas Vina