Mateo 17

1Tbajlenxitzun kak k'ij, xi ti'n Jesús Pedro, tuc'ix Jacobo, tuc'ix Juan aju titz'in Jacobo, e je'x ti'n cyjunalx twi' jun witz ma' twa'l. 2O ch'expaj que'yin Jesús cywitz ke t-xnak'tzben, o koptz'aj twitz ic tza'n tkan k'ij, atzun t-xbalun o sakix ic tza'n t-spic'umal k'ij. 3Ex minaben cub tyec'un tib Moisés tuc'ix Elías, in che yolin tuc'il Jesús. 4Xitzun tma'n Pedro te Jesús: —Tat, ba'n ax tu'n kten tzalu; ka taja e tjaw kbincha'ne ox tal ja t-xak tze'yin cywi': Jun teya, jun te Moisés ex jun te Elías, chi Pedro. 5Matok in yolin Pedro, cub ten jun muj cyibaj in koptz'aj; ex at jun tk'ajk'ajel tzaj tuj muj, in tma'n: —Atzun Nc'wa'le jlu c'ujla'nxix wu'ne, in chin tzalaje ti'j. Cybinxe tyol. 6Tej cybinte t-xnak'tzben ju yol lu, e cub mutze' twitz tx'otx', ex tzaj nim cyxobil. 7Tzajtzun lak'e' Jesús cytxlaj, e oc tmaco'n ex xi tma'n: —Che we'ctze, mi'n che xobe. 8Tejtzun tjaw cyque'yin cywitz, minti' juntl xjal o cyil, o'cx te Jesús. 9Tejtzun cycu'tz twi witz, xi tcyuwsa'n Jesús cye: —Mi'n txi cyma'ne te jun xjal aju ma cyile; maxitzun cxel cyma'ne ocxi njatz ank'ine cyxol cyimni, akine sc'o'maj kine tu'n Dios tu'n ntene cyuc'il xjal, chi Jesús. 10Xitzun cykanin ke t-xnak'tzben: —¿Tiku'ntzun in cyma'n ke xnak'tzal ti'j ley ka ilxix ti'j tu'n tul nej Elías? Che chi. 11Xi ttzak'we'n Jesús: —Ax toc nej tzul Elías, ex cbajel tbincha'n juntl maj tcyakil. 12Pero cxel nma'ne cyeye, o tzul aj Elías ex minti' ma tz'el cynic' xjal ti'j, o'cx o cybincha ti'j alcye ju cyajbil. Ax icx weye chin bajel yajla'ne cyu'n, akine sc'o'maj kine tu'n Dios tu'n ntene cyuc'il xjal, chi Jesús cye. 13Maxitzun el cynic' ke t-xnak'tzben ti'j ka ti'j Juan o yolin Jesús, aju e byan xjal tu'n. 14Tej cypon jatum tenl ke xjal, ul jun xjal tuc'il Jesús, cub ẍmeje' twitz ex tma: 15—Tat, k'ak'antz tc'u'ja ti'j nc'wa'le, porque in tzaj tuj twitz ex nim in c'ixbisanjtz; porque nimcu maj in xi tz'ak tuj k'ak', ex nimcu maj in xi tz'ak tuj a'. 16Ex ma tzul wi'ne cyuc'il ke t-xnak'tzbena, pero minti' ma bant cyu'n tu'n tbanix. 17Xi ttzak'we'n Jesús: —Akeye xjal tuj tk'ijlalil ja'lo minti' cyocslable ex miban che bine. ¿Jte' k'ij tu'n ntene cyuc'ile? ¿Ex jte' k'ij tu'n cyic'xe wu'ne? Cyi'ntze c'wa'l tzalu. 18Xitzun tmayo'n Jesús ju'ẍ, etztzun ju'ẍ tuj tanmi c'wa'l, bi'xtzun cyaj banix c'wa'l. 19E ultzun ke t-xnak'tzben Jesús tuc'il, xi cykanin te cyjunalx: —¿Tiku'n minti' xko xcye'ye ti'j tu'n tetz ju'ẍ ku'ne? Che chi. 20Xi tma'n Jesús cye: —Tu'nju minti' in ke' cyc'u'je ti'j Dios, porque ax toc cxel nma'ne cyeye, nokwit at cyocslable, masque nok ch'in ic tza'n jun tal twitz mostaza, jaculo txi cyma'ne teju witz lu: Tic'a tzalu, txi'ya ma chixin. C'ic'eltzun. Ex minti' jun mlaywit bant cyu'ne ka at cyocslable. 21Pero aju jun txcaj ju'ẍ lu mlayx tz'etz, nok o'cx jacu tz'etz tu'n na'j Dios ex ka ma cub kyo'n we'yaj. 22Tejtzun cyten tuj tx'otx' Galiley, xi tma'n Jesús cye t-xnak'tzben: —Akine sc'o'maj kine tu'n Dios tu'n ntene cyuc'il xjal, chin xel k'o'ne tuj cyk'ab xjal, 23ex chin bel byo'ne cyu'n; pero tuj toxin k'ij chin jawil ank'ine, chi Jesús cye. Atzun cye t-xnak'tzben tzaj nimxix cybis tej cybinte jlu. 24Tejtzun cypon tuj tnam Capernaum, e ultzun ke peyil pwak tuc'il Pedro, keju in che peyin pwak tu'n tajben tuj tja Dios, ex xi cyma'n te Pedro: —¿Yajtzun ju Xnak'tzal cyeye, mi'npelo tzaj tk'o'n ju chojbil tu'n tajben tuj tja Dios? Che chi. 25—Oclo, chi Pedro. Tejtzun tocx Pedro tuja, tzaj yolin naj Jesús te, ex tma: —¿Chi toc tu'na, Simón? Ke rey ate' twitz tx'otx', ¿al e in xi cykanin ju chojbil? ¿Cyepe cyxjalil, ex ka cye stranjer xjal? Chi Jesús te. 26Xitzun ttzak'we'n Pedro: —Cye stranjer xjal nne'l cykanin, chi Pedro. Xi tma'n Jesús: —Entons minti' in che chojin ke cyxjalil. 27Pero tu'n mi'n ttzaj cyyol, txi'ya ttzi laguna, xon cu'xa tuj a' jun ganch te tzuybil cyiẍ, ex aju tnejel cyiẍ ctzyetel tu'na, tzyuma, octzun tjaket ttzi' tu'na, cnetel jun sak pwak tu'na; k'intza, ex k'onxa nchoje cye peyil pwak, tuc'ix teya, chi Jesús te.

will be added

X\