Mateo 16

1E pontzun ke parisey tuc'il Jesús, cyuc'ix ke sadusey, ex xi cykanin tu'n t-xi tyec'un Jesús jun señ in tzaj tuj cya'j; xi cyma'n jlu nok tu'n toc tuj joybil ti'j cyu'n. 2Atzunte Jesús xi ttzak'we'n: —Oc nne'x k'ij in cyma'ne: Mejor k'ij nchi'j, porque cyak t-xe cya'j. 3Atzunte prim in cyma'ne: Tzul k'ekab ja'lo, porque cyak t-xe cya'j ex k'ek muj. Xmletz' keye. Nne'l cynic'e ti'j alcye ctzajel tu'nju techal in cyque'yine twitz cya'j, pero atzunju señ ti'j alcye ctzajel tuj tk'ijlalil ja'lo, minti' nne'l cynic'e ti'j. 4Ke xjal tuj tk'ijlalil ja'lo mya ba'n ke ex ma tz'el cypa'n cyib ti'j Dios, ex in che kanin ti'j jun señ, pero mlay txi yec'un jun señ cye, o'cx ju señ ti'j Jonás aju t-sanjel Dios cxel yec'un cye. E cyajtzun tcolin Jesús ke xjal lu ex ic'tzun. 5Tejtzun cypon ke xnak'tzben jlajxi laguna, ic' tna'l cyu'n tu'n t-xi cyi'n cywa. 6Xi tma'n Jesús cye: —Ten cycwente cyi'je ti'j t-samel pan cye parisey ex cye sadusey, aju in jaw mal tc'u'j pan tu'n. 7Atzun cye t-xnak'tzben in che yolin ti'j cyxolx: —Kape tu'nju minti' saj ki'n kwa in tma'n jlu, che chi. 8Eltzun tnic' Jesús ti'j ju in che yolin ti'j ex xi tma'n cye: —Akeye xinak ch'in cyocslable, ¿tiku'n in che yoline ti'j cyxolxe ka minti' cywaye? 9¿Na'nxpe tel cynic'e ti'j, ex minti'pe in tzaj cyna'ne cyi'j jwe' pan xi sipet cyxol jwe' mil xinak ex jte' chi'l ttx'akan jaw cychmo'ne? 10¿Ex minti'pe in tzaj cyna'ne cyi'j wuk pan xi sipet cyxol cyaje mil xinak, ex jte' chi'l ttx'akan jaw cychmo'ne? 11¿Tiku'n minti' nne'l cynic'e ti'j, mya ti'j cywaye xi nma'ne cyeye, o'cx xi nma'ne tu'n tten cycwente ti'j t-samel pan cye parisey ex cye sadusey, aju in jaw mal tc'u'j pan tu'n, chi Jesús cye. 12Eltzun cynic' ke t-xnak'tzben ti'j ju yol o tma Jesús cye, mya ti'j t-samel pan tu'n toc cycwentin cyib, o'cx tu'n toc cycwentin cyib ti'j cyxnak'tzbil parisey ex cyxnak'tzbil sadusey. 13Tejtzun tpon Jesús tuj tnam Cesarea Filipo, xi tkanin cye t-xnak'tzben ex tma: —¿Chi toc cyu'n xjal wi'je, akine sc'o'maj kine tu'n Dios tu'n ntene cyuc'il xjal, alcye kine che chi xjal? 14Xitzun cyma'n ke t-xnak'tzben: —At junjun xjal in cyma'n ka aya Juan aju e byan xjal tu'n; ex junjuntl in cyma'n ka aya Elías; ex junjuntl in cyma'n ka aya Jeremías ex ka jun t-sanjel Dios, che chi. 15Xitzun tma'n Jesús cye: —Yajtzun cyeye, ¿alcye kine tuj cywitze? 16Xi ttzak'we'n Simón Pedro: —Aya ju Crist aju at toclen tu'n Dios; aya Tc'wa'l Dios itz', chi Pedro. 17Xitzun tma'n Jesús te: —At tzalajbil teya Simón, aya tcy'ajal Jonás, porque mya tu'n xjal ma tzaj yec'un jlu teya, nok o'cx tu'n Nmane aju at tuj cya'j ma tzaj tyec'un jlu teya. 18Ax icx weye cxel nma'ne teya: Aya Pedro, ex tibaj pic lu cjawil nbincha'ne ju iglesi etzan wu'ne; ex mlay cub ti'j tu'n tipumal camic. 19Ex teya che xel nk'o'ne ke tal ja tu'n tjaket aju cawbil in tzaj tuj cya'j; aju cxel tmayo'na tzalu twitz tx'otx', ax icx tuj cya'j cmayetel, ex aju cxel tma'na tu'n tbant tzalu twitz tx'otx', ax icx tuj cya'j ctzajel k'ma'n tu'n tbant, chi Jesús. 20Xitzun tcyuwsa'nxix Jesús cye t-xnak'tzben tu'n mi'n t-xi cyma'n cye xjal ka a Jesús ju Crist aju at toclen tu'n Dios. 21Maxitzun oc ten Jesús chic'balte cye t-xnak'tzben ka ilxix ti'j tu'n t-xi' tuj Jerusalén, ex tu'n tic'x nimcu tu'n cyu'n ke cytijil xjal, ex cyu'n ke nejenel cye pal ex cyu'n xnak'tzal ti'j ley; ex tma ka ilxix ti'j tu'n tcub byo'n ex tu'n tjaw ank'in tuj toxin k'ij. 22Xitzun uc'in Jesús tu'n Pedro tjunalx, oc ten Pedro mayolte Jesús. —Tat, Miwt tzaj tk'o'n Dios ambil tu'n tbant jlu. Cu chiwt tu'n mi'n ttzaj jlu ti'ja, chi Pedro xi tma'n. 23Atzunte Jesús ajtz meltz'aj twitz, xi tma'n te Pedro: —Tela nwitze Satanás. Ma cub tena nwitze te jun tolsabl, porque myatzun toc t-ximbetza ti'j tajbil Dios, nok o'cx toc t-ximbetza ti'j cyajbil xjal. 24Xitzun tma'n Jesús cye t-xnak'tzben: —Ka at jun xjal taj tu'n toc lpe' wi'je, xc'ayinc tib teju tex tajbil, k'inx tcrus, ex lpe'c wi'je. 25Porque alcye jun xjal o'cx toc tc'u'j ti'j tu'n tten tchwinklal twitz tx'otx', mlay tcamba aju chwinklal in tzaj tk'o'n Dios; ex alcye jun xjal tk'on tib tu'n tnaj tchwinklal twitz tx'otx' nok tu'n nlaje, oc tcamba' ju chwinklal in tzaj tk'o'n Dios. 26Porque ¿ti tajben te xjal ka ma tcamba tcyakilju at twitz tx'otx' ex atzunju tanmi cnajel? ¿Ex alcye ba'n t-xi tk'o'n xjal te chojbil tu'n tclet tanmi? 27Porque akine sc'o'maj kine tu'n Dios tu'n ntene cyuc'il xjal, chin ule tuj t-spic'umal Nmane cyuc'ix ke n-anjele; maxitzun cxel nk'o'ne chojbil te teyle junjun ic tza'nx tak'unben. 28Ax toc cxel nma'ne cyeye, at junjun ate' tzalu mlay che cyim ka na'nxtok cylonte oc ntzaje tu'n ncawine, akine sc'o'maj kine tu'n Dios tu'n ntene cyuc'il xjal.

will be added

X\