Mateo 15

1E pontzun junjun xnak'tzal ti'j ley tuc'il Jesús, cyuc'ix junjun parisey e tzaj tuj tnam Jerusalén, ex xi cykanin te: 2—¿Tiku'n in che ic' t-xnak'tzbena tibaj ju yol cyaj bant ti'j cyu'n cytijil xjal ojtxi? ¿Tiku'n minti' nne'l cytx'jo'n cyk'ab oc in che oc ten wa'l? Che chi. 3Xitzun ttzak'we'n Jesús: —Ax icx cyeye, ¿tiku'n in che ic'e tibaj tmandamyent Dios nok tu'nju in che oc lpe'ye ti'j ju yol cyaj bant ti'j cyu'n cytijil xjal ojtxi? 4Porque cyaj tk'o'n Dios jun mandamyent chi cyja': Cynimanxe cymane ex cytxuye; ax icx in tma'n: Alcye ma yasun ti'j tman ex ka ti'j ttxu', il ti'j tu'n tcub byet, chi tuj ley. 5Atzun cyeye in cyma'ne: Ba'n ka at jun xjal ma txi tma'n te tman ex ka te ttxu': Mlay bant txi nk'o'ne ch'in onbil teya, porque tcyakilju at weye jun oyaj te Dios. 6Ka ma txi tma'n xjal icju, entons mya il ti'j tu'n t-xi tk'o'n onbil te tman ex ka te ttxu', che chiye. Cyja'tzun ma tz'el cyi'ne tipun tmandamyent Dios tu'n tlaj in che oc lpe'ye ti'j ju yol cyaj bant ti'j cyu'n cytijil xjal ojtxi. 7Xmletz' keye. Ax toc tyol Isaías aju t-sanjel Dios cyaj ttz'iban cyi'je, chi cyja': 8Ke xjal lu nok tu'n cytzi' in chin nimanjtze cyu'n, atzun ju cyanmi najchak ta' wi'je. 9Nokx gan in che c'ulun nwitze, porque aju xnak'tzbil in cyk'o'n, cye xjal cymandamyent, chi Isaías. 10E tzajtzun ttxco'n Jesús ke xjal ex xi tma'n cye: —Cybintze nyole, ex tz'elx cynic'e ti'j: 11Aju in xi' tu'n xjal, minti' in tz'ilix xjal tu'n, nok o'cx in tz'ilix xjal tu'nju tyol nne'tz tuj ttzi'. 12E pontzun lak'e' t-xnak'tzben Jesús ttxlaj ex xi cyma'n te: —¿Mape tbiya, aju tyola ma txi tma'na mya ba'n ma tz'ela tuj cywi parisey? Che chi. 13Xi ttzak'we'n Jesús: —Tcyakil awal aju mya tu'n Nmane at tuj cya'j cu'x tawa'n, cjawitz baket. 14E cyten xjal lu; porque moẍ ke, ex ẍaklul moẍ ke; ka ma tz'oc ten jun moẍ ẍaklulte juntl moẍ, cycabil che xel tz'ak tuj jul, chi Jesús. 15Xi ttzak'we'n Pedro: —Chic'bantza ju techal lu keye, chi Pedro. 16Xi tma'n Jesús: —¿Maj icx cyeye minti' nne'l cynic'e ti'j? 17¿Maj minti' nne'l cynic'e ti'j jlu? Tcyakilju in xi' tu'n xjal, in cu'pun tuj tc'u'j ex nne'x tc'u'jin. 18Pero aju tyol xjal nne'tz tuj ttzi', tuj tanmi xjal in jatz; atzunju in tz'ilix xjal tu'n. 19Porque tuj cyanmi xjal in tzaj cyximbetz mya ba'n, ex tu'n tcub jun xjal cyu'n, ex tu'n cybinchante aj pajil, ex tu'n cyyaẍin, ex tu'n cyelk'an, ex tu'n cynic'an yol cyi'j cyuc'il, ex tu'n cysi'min yol. 20Tcyakil jlu in tz'ilix xjal tu'n; pero oc toc jun xjal wa'l ex ka minti' ma tz'el ttx'jo'n tk'ab, mlay tz'ilix xjal tu'n. 21Tejtzun tetz Jesús tuj lugar lu, xi' tuj tx'otx' jatum ta' tnam Tiro tuc'ix tnam Sidón. 22At jun xu'j aj Canaán ax najl tuj lugar lu, ul tuc'il Jesús in sch'in ex in tma'n: —Tat, aya Tc'wa'l David, k'ak'antz tc'u'ja wi'je. Aju wale txin nimxix in yajlanjtz tu'n ju'ẍ, chi xu'j. 23Atzunte Jesús minti' xi ttzak'we'n. E pontzun lak'e' ke t-xnak'tzben ttxlaj e cubsan twitz ex cyma': —K'manxa te xu'j tu'n taj, porque lepchix ki'j in sch'in, che chi. 24Xi ttzak'we'n Jesús: —Minti' ma chin tzaj sama'ne tu'n Dios cyuc'il txkantl xjal, nok o'cx cyuc'il aj Israel, akeju ic cyten ic tza'n ẍne'l tzpetni ke, chi Jesús. 25Ultzun te xu'j, cub ẍmeje' twitz Jesús ex tma: —Tat, chin tonintza, chi xu'j. 26Xi ttzak'we'n Jesús: —Mya ba'n tu'n tel k'it cywa c'wa'l ex tu'n t-xi k'ot cye tal tx'yan, chi Jesús. 27Xitzun tma'n xu'j: —Ax toc, Tat; pero ke tal tx'yan in xi cywa'n tbuchil wabj nne'l tz'ak ttxa'n cymes cyajaw. 28Xitzun ttzak'we'n Jesús: —Aya xu'j, nimxix tocslabla at. Cbinchetel teya aju tajbila, chi Jesús. Ax or lu bi'x banix ju tal. 29Ic'tzun Jesús tuj lugar lu, pon ttzi laguna te Galiley; jax twi witz ex axtzun cub ke'. 30E pontzun nim xjal tuc'il, k'i'n ke cox cyu'n, ex ke moẍ, ex ke men, ex ke xjal tzcaj cyten, cyuc'ix nimcu yab; ex e cub cyk'o'n t-xe tkan Jesús, ex e banix tu'n. 31Tu'ntzun jlu nim e labin xjal tej cylonte bant cyyolin ke men, ex ke xjal tzcaj cyten e bant, ex ke cox bant cybet, ex ke moẍ bant cyque'yin. Ex xi cyk'o'n xjal chjonte te Dios, aju Cydios aj Israel. 32E tzajtzun ttxco'n Jesús ke t-xnak'tzben ex xi tma'n cye: —In tz'e'y nc'u'je cyi'j xjal, porque ma bant ox k'ij ate' wuc'ile ex minti' ch'in cywa. Mi'n waje tu'n t-xi nma'ne cye tu'n cyaj ex na'nxtok t-xi' ch'in cywa, mya yajcu che cub numj tuj be, chi Jesús cye. 33Xitzun cyma'n ke t-xnak'tzben: —¿Jatum ban ttzaj nim wabj ku'ne tu'n cynoj cycyakil xjal lu, porque ato' tuj jun lugar minti' cynajbil xjal tuj? Che chi. 34Xi tkanin Jesús cye: —¿Jte' wabj at cyuc'ile? —At wuk wabj, tuc'ix junjun tal cyiẍ, che chi. 35Xi tma'n Jesús cye xjal tu'n cycub ke' twitz tx'otx'. 36Tzajtzun ttzyu'n Jesús aju wuk wabj cyuc'ix ke cyiẍ, xi tk'o'n chjonte te Dios, cubtzun tpiẍc'u'n ex xi tk'o'n cye t-xnak'tzben, atzun cye t-xnak'tzben xi cysipan cye xjal. 37Ex e baj wa'n cycyakil ex e noj. Ex jaw cychmo'n wuk chi'l ttx'akan wabj aju cyaj sobryin. 38Aju cyajlal xjal e wa'n, cyaje mil xinak, ex part ke xu'j ex ke c'wa'l. 39Xitzun tma'n Jesús cye xjal tu'n cyaj, atzunte Jesús jax tuj barc, pon tuj tx'otx' Magdala.

will be added

X\