Mateo 14

1Tuj tk'ijlalil lu el tkanil ti'j Jesús, o tbi Herodes aju gobernador. 2Xitzun tma'n Herodes cye keju in che ajben te: —Ate Juan jlu aju e byan xjal tu'n; ma jaw ank'in cyxol cyimni, cyja'tzun at tipumal tu'n tbant tcyakil jlu tu'n, chi Herodes. 3Porque o tzyet Juan tu'n Herodes, ex oc tc'alo'n tu'n caden, ex ocx tk'o'n tuj pres tu'n tlaj Herodías; ate Herodías t-xu'jil Pelip nej, aju titz'in Herodes. 4Porque xi tma'n Juan te Herodes: —Mya k'o'n tu'n ley tu'n tten Herodías te t-xu'jila. 5O tajbe Herodes tu'n tcub tbyo'n, pero tzaj t-xobil cywitz xjal; porque cycyakil xjal in cyma'n ate Juan t-sanjel Dios. 6Pero tej tcub ic'sa'n tk'ijlalil titz'jlen Herodes, oc ten tal Herodías bixal cywitz xjal, ex tzaj jun ttzalajbil Herodes ti'j. 7Cyja'tzun xi ttziyan Herodes te txin: Nok alcyex ctzajel tkanina weye jacu txi nk'o'ne teya, chi Herodes; xi tma'n tzkan Dios ti'j ka tu'n t-xi tk'o'n. 8Atzunte txin, nej xi aj kanilte te ttxu', xitzun tma'n te Herodes: —K'ontza twi' Juan weye, aju e byan xjal tu'n, k'ontza tuj jun plat, chi txin. 9Atzunte rey Herodes tzaj tbis; pero tu'n tlaj tzkan Dios otok txi tma'n ex tu'n cylaj keju ate'tok tuc'il ti'j mes, cyja'tzun xi tma'n tu'n t-xi k'o'n twi' Juan te txin. 10Xi tk'o'n orden tu'n tel tamtz'u'n twi' Juan tuj pres. 11Tzajtzun k'i'n twi' tuj jun plat, ex xi k'o'n te txin; atzunte txin pon ti'n twitz ttxu'. 12E pontzun ke t-xnak'tzben Juan, etz cyi'n t-ximlal ex cu'x cymaku'n; e je'xtzun ex xi cyk'o'n tkanil te Jesús. 13Tej tbinte Jesús jlu, ic' tuj lugar lu, xi' tuj jun barc tu'n tpon tuj jun lugar minti' cynajbil xjal tuj. Tejtzun cybinte xjal, e je'tz tuj junjun tnam ex e je'x tu'n cykan tu'n cypon jatum attok tponil Jesús. 14Tejtzun tetz Jesús tuj barc o til nim xjal otok che pon, tzaj k'ak'an tc'u'j cyi'j, ex e banix yab tu'n, akeju ate' cyxol xjal. 15Tej ch'ixtok tex k'ij, e pon lak'e' ke t-xnak'tzben Jesús ttxlaj ex xi cyma'n te: —Aju lugar lu minti' cynajbil xjal tuj, ex ma ko kax; k'manxa cye xjal tu'n cyxi' cyuj aldey tu'n tlak'et ch'in cywa, che chi. 16Xi tma'n Jesús cye: —Mya il ti'j tu'n cyxi' xjal lak'ol cywa; cyk'onxe ch'in cywa. 17Atzun cye xnak'tzben xi cyma'n: —Minti' at kuc'ile, nok o'cx jwe' pan at ex cabe cyiẍ. 18Xi tma'n Jesús cye: —Cyi'ntze tzalu. 19Xitzun tma'n cye xjal tu'n cycub ke' tibaj ch'im. Ex e tzaj ttzyu'n jwe' wabj cyuc'ix cabe cyiẍ, jaw tque'yin twitz cya'j ex xi tk'o'n chjonte te Dios ti'j, ex e cub tpiẍc'u'n ke wabj, xi tk'o'n cye t-xnak'tzben, atzun cye t-xnak'tzben xi cysipan cye xjal. 20Cycyakil xjal e wa'n ex e noj; ex jaw cychmo'n cablaj chi'l ttx'akan wabj cyaj sobryin. 21Aju cyajlal xjal e wa'n, balo jwe' mil xinak, mya cyuc'ix ke xu'j ex mya cyuc'ix ke c'wa'l e oc te tajlal. 22Tejtzun tbaj jlu, xi tma'n Jesús cye t-xnak'tzben tu'n cyocx tuj barc ex tu'n cyxi' nej twitz tu'n cypon jlajxi laguna, atzunte Jesús cyaj ten k'malte cye xjal tu'n cyaj cyja. 23Tejtzun cyaj baj xjal, jax Jesús twi witz na'l Dios tjunalx. Tejtzun koc yupj, tjunalx Jesús attok. 24Atzunte barc otok mijin tibaj a', ex in pon tilj a' ti'j, porque maket barc tu'n cyk'ik'. 25Ch'ixtok ttzaj t-xe cya'j pon Jesús cyuc'il in bettok tibaj a'. 26Tejtzun cylonte t-xnak'tzben in bettok Jesús tibaj a', bi'x naj cynabl, —Klab te jlu, che chi. Ex e jaw sch'in tu'n cyxobil. 27Pero jurat naj xi yolin Jesús cyuc'il: —Ke' cyc'u'je; akine, mi'n che xobe, chi Jesús cye. 28Tzajtzun ttzak'we'n Pedro: —Tat, ka aya, k'mantza tu'n nxi'ye tuc'ila tibaj a'. 29Xitzun tma'n Jesús: —Tzaja. Cu'tztzun Pedro tuj barc, xi bet tibaj a' tu'n tpon tuc'il Jesús. 30Pero tej tlonte Pedro nim cyk'ik', tzaj t-xobil; cyja'tok t-xi mulk'aj tuj a', jaw sch'in ex tma: —Tat, chin tcloma. 31Jurat naj xi tnukpi'n Jesús tk'ab, tzyettzun Pedro tu'n, ex xi tma'n te: —Aya xinak ch'in tocslabla, ¿tiku'n xjawje' tc'u'ja? Chi Jesús te. 32Tejtzun cyjax tuj barc, bi'x we' cyk'ik'. 33Atzun keju ate'tok tuj barc e ul lak'e' twitz Jesús, ex e c'ulun twitz in cyma'n: —Ax toc aya Tc'wa'l Dios, che chi. 34Tej cyic'x jlajxi a', e pon tuj tx'otx' Genesaret. 35Tejtzun tel cynic' xjal ti'j Jesús, akeju ax najl ke, ex tkanil cyu'n tuj tcyakil lugar nikayin; cycyakiltzun ke yab e ul k'i'n tuc'il Jesús. 36E cubsan xjal twitz Jesús ichak nok ttxa'n t-xbalun tz'oc cymaco'n yab; ex cycyakil keju oc cymaco'n, e banix.

will be added

X\