Mateo 12

1Tuj tk'ijlalil lu in bettok Jesús cyxol awal tuj jun k'ij te ojlabl; atzun ke t-xnak'tzben tzaj el cyc'u'j ex e oc ten k'ilte triw twi tkan te cywa. 2Tej cylonte ke parisey jlu, xi cyma'n te Jesús: —Lu ke t-xnak'tzbena in cybincha'n aju mya k'o'n tu'n ley tu'n tbinchanjtz tuj k'ij te ojlabl, che chi. 3Pero xi tma'n Jesús cye: —¿Bajxpe jaw cysch'i'ne tuj Tu'jil ti o tbincha David tej ttzaj el tc'u'j cyuc'ix keju ate' tuc'il? 4Ocx tuj tja Dios, xi twa'n ke pan cy'iwla'maj, aju pan lu mya k'o'n tu'n t-xi twa'n David cyuc'ix keju ate' tuc'il, nok o'cx cye pal k'o'n tu'n t-xi cywa'n. 5¿Ex bajxpe jaw cysch'i'ne tuj tley Moisés, ke pal tuj tja Dios in che ak'nan tuj k'ij te ojlabl ex minti' cyil tu'n tlaj? 6Cxeltzun nma'ne cyeye, at jun tzalu mas ma' toclen twitz tja Dios. 7Nokwit nne'l cynic'e ti'j ti in tma'n ju yol tz'iban tuj Tu'jil chi cyja': Aju wajbile cyeye atzun, tu'n tten cyc'ujlalile ex mya tu'n ttzaj cyk'o'ne jun chojbil weye, chi tuj Tu'jil. Nokwit nne'l cynic'e ti'j, miwtlo cub cyk'o'ne cysentens keju minti' cyil. 8Porque akine Tajaw ju k'ij te ojlabl, akine sc'o'maj kine tu'n Dios tu'n ntene cyuc'il xjal. 9Ic'tzun Jesús tuj lugar lu, pon tuj ja te cyc'ulbil xjal judiy. 10Ex attok jun xjal tzkijtok jun tk'ab; ex at junjun xjal xi cykanin te Jesús nok tu'n tcub tz'ak tuj jun til cyu'n: —¿K'o'npe tu'n ley tu'n tbanix jun xjal tuj k'ij te ojlabl, ex ka mi'n? Che chi. 11Xitzun tma'n Jesús cye: —¿Alcye jun cyeye ka at jun tal t-ẍne'l ma cu'x tz'ak tuj jun jul tuj k'ij te ojlabl, mlaypelo tzaj ttzyu'n tu'n tjatz ti'n? 12¿Yajtzunlo jun xjal, myapelo mas ma' t-xilen twitz jun ẍne'l? Cyja'tzun, k'o'n tu'n ley tu'n tbinchanjtz ba'n tuj k'ij te ojlabl. 13Xitzun tma'n Jesús teju xjal tzkijtok tk'ab: —Nukpinx tk'aba. Eltzun tnukpi'n xjal tk'ab, ex cyaj banix ju tk'ab ic tza'n juntl tk'ab. 14E etztzun ke parisey, ex e oc ten yolil ti'j cyxolx tu'n tcub Jesús cyu'n. 15Tej tbinte Jesús jlu, xi' tuj juntl lugar; ex nim xjal oc lpe' ti'j. E banix cycyakil yab tu'n Jesús, 16ex xi tcyuwsa'nxix cye tu'n mi'n tel tkanil cyu'n; 17tu'ntzun tjapun ju yol k'ma'maj tu'n Isaías aju t-sanjel Dios, chi cyja': 18Lu nmajene lu aju ma jaw nsc'o'ne; c'ujla'nxix wu'ne, ex in tzalaj wanmiye ti'j. Cbel nk'o'ne Nxewe tibaj, cxeltzun tk'o'n tkanil cye mastl nasyon, oc cbinchetel cyi'j tuj tumelxix. 19Mlay k'ojin, ex mlay jaw tk'ajk'ajel twi' cyuw, ex mlay binjtz tk'ajk'ajel twi' tu'n jun xjal tuj cay. 20Jun ajlaj potz'jni, mlay cub ttokin, ex aju mech in kusin, mlay cub tyuptz'a'n. Il ti'j tu'n tcawin tuj tumelxix. 21Ex ke xjal cyuj cycyakil nasyon ckebel cyc'u'j ti'j. 22Ultzun k'i'n jun xjal twitz Jesús at ju'ẍ tuj tanmi, moẍ twitz ex men; ex o banix tu'n Jesús; cyja'tzun bant tque'yin ex bant tyolin ju xjal moẍtok ex mentok. 23Ex cycyakil xjal bi'x naj cynabl, ex in cyma'n: —¿Apetzunlo Tc'wa'l David jlu? Che chi. 24Atzun cye parisey, tej cybinte ju yol lu cyma: —Ate xjal lu in che etz ke ju'ẍ tuj cyanmi xjal tu'n nok tu'n Beelzebú aju nejenel cye ju'ẍ, che chi. 25Eltzun tnic' Jesús ti'j cyximbetz, ex xi tma'n cye: —Ka at jun cawbil at pabl tib tuj ex in che k'ojin xjal cyxolx, cbel xitj cawbil; ex ka at jun tnam ex ka jun ja xjal at pabl tib cyxol ex in che k'ojin xjal cyxolx, mlay cyaj ten, cnajel. 26Ka tu'nx tib Satanás nne'tz tlajon tib, entons tpa'n tib ex in k'ojin ti'jx; ¿tza'ntzun tten cucx tu'n tcyaj ten tcawbil? 27Nok tu'n tipumal Beelzebú in che etz ke ju'ẍ tuj cyanmi xjal wu'ne, che chiye; katzun ax toc jlu, ¿yajtzun cye cyxnak'tzbene, alcye in k'onte cyipumal tu'n cyetz ju'ẍ tuj cyanmi xjal? Cyja'tzun ax ke cyuc'ile oc cyma' ka mya tuj tumel cyyole. 28Pero weye nok tu'n T-xew Dios in che etz ke ju'ẍ tuj cyanmi xjal wu'ne, cyja'tzun tz'elx cynic'e ti'j ax toc ma tzul tcawbil Dios cyxole. 29Porque ¿tza'n tten tu'n tocx jun xjal tuj tja juntl xjal at tipun, ex tu'n tetz telk'a'n aju at tuj tja ka minti' xcub tc'alo'n nej? Maxitzun c'eletz telk'a'n tuj tja xjal ka ma cub tc'alo'n. 30Alcye jun xjal mya tk'on tib wuc'ile, in k'ojl wi'je; ex alcye jun xjal minti' in onin wuc'ile tu'n tjaw chmet twitz awal, nok in baj tchitun. 31Cyja'tzun cxel nma'ne cyeye: Tcyakil cyil xjal jacu najset, tuc'ix tcyakil mya ba'n in cyma'n; pero ka ma che yolin mya ba'n ti'j Xewbaj Xjan, mlay najset cyil. 32Ka at jun xjal ma tma jun yol mya ba'n wi'je, akine sc'o'maj kine tu'n Dios tu'n ntene cyuc'il xjal, jacu najset til; pero aju xjal in yolin mya ba'n ti'j Xewbaj Xjan, mlay cub najset til, mi tuj tk'ijlalil ja'lo mi tuj tk'ijlalil tzul. 33Tz'elx cynic'e ti'j, ka ba'n jun tze', ax icx twitz ba'n, ex ka mya ba'n jun tze', ax icx twitz mya ba'n; porque ti'j twitz tze' nne'l knic' ti'j ka ba'n ex ka mya ba'n. 34Akeye tiyjil k'anti'. ¿Tza'n tten tu'n cyyoline yol ba'n, ex mya ba'n keye? Porque tcyakilju at tuj tanmi xjal, axtzunju in yolin ti'j. 35Aju xjal ba'n, in tbincha'n ba'n, porque atzun ta' ba'n tuj tanmi; atzunte xjal mya ba'n, in tbincha'n mya ba'n, porque atzun ta' mya ba'n tuj tanmi. 36Pero cxel nma'ne cyeye, tcyakil yol nokx gan ex minti' tajben aju in cyma'n xjal, che oquel tuj xjel ti'j tuj tk'ijlalil jwisi. 37Porque tu'nx tyola ctzajel k'ma'n teya tu'n tetza libre, ex tu'nx tyola ctzajel k'ma'n teya tu'n tcub t-sentensa. 38Xitzun cyma'n junjun xnak'tzal ti'j ley ex junjun parisey: —Xnak'tzal, kajbile tu'n klonteye jun señ tu'n tbant tu'na, che chi. 39Xi ttzak'we'n Jesús: —Ke xjal tuj tk'ijlalil ja'lo mya ba'n ke ex ma tz'el cypa'n cyib ti'j Dios in cykanin tu'n tbant jun señ; pero mlay txi yec'un jun señ cye, o'cx cxel yec'un ju señ ti'j Jonás aju t-sanjel Dios. 40Porque ic tza'n te Jonás o ten ox k'ij ex ox konic'an tuj tc'u'j jun cyiẍ ma'xix, ax icx weye akine sc'o'maj kine tu'n Dios tu'n ntene cyuc'il xjal, chin tele ox k'ij ex ox konic'an tuj mukbil. 41Tuj tk'ijlalil jwisi, oc cyoc xjal tuj xjel akeju ate' tuj tk'ijlalil ja'lo, che jawil we' ke xjal aj Nínive, ex che bel tz'ak ke xjal lu tuj cyil cyu'n; porque ke xjal aj Nínive ajtz ti'j cyanmi tej cybinte tpacbabl Jonás; ex at jun tzalu mas ma' toclen twitz Jonás. 42Tuj tk'ijlalil jwisi oc cyoc xjal tuj xjel akeju ate' tuj tk'ijlalil ja'lo, cjawil we' ju xu'j rey aju o cawin tuj tx'otx' t-xe cya'j tuj tnayaj k'ij; ex che bel tz'ak ke xjal lu tuj cyil tu'n; porque ate xu'j rey tzaj max ttxa'npun tx'otx' tu'n tul bilte tyol Salomón, porque nimxix tnabl Salomón; ex at jun tzalu mas ma' toclen twitz Salomón. 43Oc nne'tz ju'ẍ tuj tanmi xjal, in xi betel tuj jun lugar tzkij tx'otx', in jyon ti'j jatum tu'n tojlan ex minti' in cnet tu'n. 44Entons in tma'n: Chin ajel meltz'aje tuj njaye jatum ẍin etze, chi ju'ẍ. Ex octzun tpon, in cnet tanmi xjal tu'n ic tten ic tza'n jun ja minti' xjal tuj, tz'iso'maj tuj, ex bincha'maj wen. 45In xi'tzun ex in tzaj ti'n wuktl ju'ẍ mas mya ba'n ke twitz, in che ocxtzun tuj tanmi xjal, ex ax in che najan; te yajxitl mas pyor ta' xjal ic tza'n nej. Icxtzun cbajel cyi'j xjal mya ba'n ate' tuj tk'ijlalil ja'lo, chi Jesús. 46Matok in yolin Jesús cye xjal, pon ttxu' Jesús cyuc'ix ke titz'in, ate'tok ttxa'n pe'n ex cyajbiltok tu'n cyyolin tuc'il. 47Xi tma'n jun xjal te Jesús: —Lu ttxu'ya cyuc'ix ke titz'ina ate' ttxa'n pe'n, cyajbil tu'n cyyolin tuc'ila, chi xjal. 48Xi tma'n Jesús teju xjal aju o k'mante jlu: —¿Alcyewe ntxu', ex alcye kewe witz'in? 49Xi tyec'un tk'ab cyi'j t-xnak'tzben ex tma: —Atzun ntxu'ye jlu, ex atzun ke witz'ine jlu. 50Porque tcyakilju in tbincha'n tajbil Nmane aju at tuj cya'j, atzun witz'ine, ex atzun wanbeju, ex atzun ntxu'yeju.

will be added

X\