Mateo 11

1Tejtzun tbaj tma'n Jesús xnak'tzbil cye cablaj t-xnak'tzben, ic'tzun tuj lugar lu, xi' k'ol xnak'tzbil ex pacbal cye xjal cyuj mastl tnam cye aj Galiley. 2Tocx Juan tuj pres ex tej tbinte aju in tbincha'n Crist, e tzaj t-sama'n cabe t-xnak'tzben tuc'il 3tu'n t-xi cykanin te cyja': —¿Apeya ju Crist aju at tulel, ex ka ko ayole ti'j juntl? Che chi. 4Xi ttzak'we'n Jesús: —Cyxi'ye ex cymanxe te Juan aju ma cybiye ex ma cyile. 5Ke moẍ in bant cyque'yin, ke cox in bant cybet, ke xjal at tx'a'c cyi'j minti' k'anbil ti'j in che banix, ke chcyin cywi' in bant cybin, ke cyimni in che jatz ank'in, ex in pacbanjtz tkanil jun colbil cye meba. 6Ex at tzalajbil teju xjal minti' in jawje' tc'u'j wi'je, chi Jesús cye t-xnak'tzben Juan. 7Tej cyaj meltz'aj ke t-xnak'tzben Juan, oc ten Jesús yolil cye xjal ti'j Juan: —¿Titzun xi cyla'cje tuj lugar minti' cynajbil xjal tuj? ¿Icpe tten xjal o cyile ic tza'n jun ajlaj in yucch tu'n cyk'ik'? Mi'n. 8¿Titzun xi cyla'cje? ¿Tbanilpe t-xbalun xjal xi cyla'cje? Mi'n. Porque ba'n cyu'ne, ke xjal toc cyxbalun tbanilxix, atzun ate' tuj cyja rey. 9Pero ¿titzun xi cyla'cje? ¿Jun t-sanjel Diospe xi cyla'cje? Cxel nma'ne cyeye, ax toc jun t-sanjel Dios xi cyla'cje, ex mas ma' t-xilen twitz jun t-sanjel Dios. 10Porque at jun yol tz'iban tuj Tu'jil in yolin ti'j Juan, chi cyja': Lu cxel nsama'ne nsanjele tu'n tcub nej twitza binchalte tbeya, chi tuj Tu'jil. 11Ax toc cxel nma'ne cyeye: Cyxol cycyakil xjal minti' jun mas ma' toclen ic tza'n te Juan aju in che byan xjal tu'n; pero aju mas tal ch'in tuj cawbil in tzaj tuj cya'j, mas ma' toclen twitz Juan. 12Atxix tuj tk'ijlalil tej tten Juan aju in che byan xjal tu'n, in cyipuman cyib xjal tu'n cyocx tuj tcawbil Dios, ex cucx tbaj ja'lo, ex keju in cyipuman cyib in che ocx naj tuj. 13Porque cycyakil ke t-sanjel Dios tuc'ix tley Moisés, o'cxtzun weba cyyol tej tul Juan. 14Ka cyajbile tu'n t-xi cyocsla'ne, ate Juan Elías aju o k'manjtz ti'j ka attok tulel. 15Alcye at t-ẍcyin, binx ju yol lu. 16At jun techal cxel nma'ne tza'n tten cymod xjal ate' tuj tk'ijlalil ja'lo. Ic cyten xjal ic tza'n ke c'wa'l k'ukl ke tuj plas in che schan ex in che sch'in in cyma'n cye cyuc'il: 17Nno'c kk'ajtza'ne xux cywitze, pero minti' ma che bixane; in ko bitzane jun bitz bisbajil cywitze, pero minti' ma che oc tene ok'el, che chi c'wa'l. 18Porque ul Juan minti' o wa'n ex minti' o c'an ti'j nintz wa'n nno'c cyu'ne, ex in cyma'ne: At ju'ẍ tuj tanmi. 19Atzun weye ma chin ule, akine sc'o'maj kine tu'n Dios tu'n ntene cyuc'il xjal, in chin wa'ne ex in chin c'ane, ex in cyma'ne: Lu jun xjal cye wa'n ex cye c'an vin, mer tamiw tib cyuc'il ke peyil pwak ex cyuc'il ke aj il, che chiye. Pero c'elel knic' ti'j jun xjal ka at tnabl, tu'n tbinchben. 20Octzun ten Jesús kawil cyi'j tnam jatum otok tbincha nimcu binchben nim cyipumal, porque minti' ajtz ti'j cyanmi ex xi tma'n cye: 21—Ay bec'bil cywitze aj Corazín. Ay bec'bil cywitze aj Betsaida. Porque nokwit tuj tnam Tiro ex tuj tnam Sidón o che binchanjtz ke binchben nim cyipumal ic tza'n ma nbinchaye cyxole, bi'xwitlo ajtz ti'j cyanmi ojtxi, owtlo tz'oc cyk'o'n cyxbalun ch'i'x twitz, ex owtlo che cub ke' tuj tza'j. 22Cyja'tzun cxel nma'ne cyeye, tuj tk'ijlalil jwisi mas nim cyeye cycastiw cbel ic tza'n te tnam Tiro ex tnam Sidón. 23Ex aya tnam Capernaum, ¿maj cjapunela tuj cya'j? Mlay, max cbel ponela tuj cynajbil cyimni. Porque nokwit tuj tnam Sodoma o che binchanjtz ke binchben nim cyipumal ic tza'n ma nbinchaye cyxole, atxwitlo tnam ja'lo. 24Cyja'tzun cxel nma'ne cyeye, tuj tk'ijlalil jwisi, mas nim cyeye cycastiw cbel ic tza'n te tnam Sodoma. 25Tuj tk'ijlalil lu oc ten Jesús yolil ex tma: —Cxel nk'o'ne chjonte teya, Tat, aya Tajaw cya'j ex Tajaw tx'otx', porque ma cub tewana tcyakil jlu cywitz aj nabl ex cywitz keju nne'lxix cynic' ti'j, ex ma tzaj tyec'una cye tal c'wa'l. 26Ma tbinchaya icju Tat, porque ba'n ela tuj twitza. 27Ax icx tma Jesús: Tcyakil ma tzaj k'o'n weye tu'n Nmane; ex mi jun ojtzkilte alcye kine, o'cxte Nmane ojtzkilte, porque akine Tc'wa'l; ex mi jun ojtzkilte Nmane, o'cx akine ojtzkilte, porque akine Tc'wa'l, ex alcye jun xjal waje tu'n t-xi nyec'une Nmane te c'eleltzun tnic' xjal ti'j Nmane. 28Cytzaje wuc'ile cycyakile akeye ma che sicte tu'n ak'untl ex ma che sicte tjak' iktz, octzun che ojlale wu'ne. 29Cyikanxe nyuwiye, ex cyxnak'tzam cyibe wi'je, porque mans kine ex mans wanmiye; octzun cnetel jun ojlabl cyu'ne te cyanmiye. 30Porque aju nyuwiye mya yajcux tikanjtz, ex sasj wikatze cxel cyikane.

will be added

X\