Marcos 8

1Tej atxtok Jesús ttzi laguna, nim xjal otok pon cychmon cyib, ex minti' cywa k'i'n. E tzajtzun ttxco'n Jesús ke t-xnak'tzben ex xi tma'n cye: 2—In k'ak'an nc'u'je cyi'j xjal lu, porque ma bant ox k'ij ja'lo ate' wuc'ile, ex minti' cywa. 3Ka ma txi nma'ne cye tu'n cyaj cyja na'nxtok cywa'n, che bel numj tuj be, porque at junjun cyxol ma che tzaj najchak, chi Jesús cye. 4Tzajtzun cytzak'we'n ke t-xnak'tzben: —¿Jatum ba'n ttzaj ki'n cywa xjal lu, ato' tuj jun lugar minti' cynajbil xjal tuj? Che chi. 5Xi tkanin Jesús cye: —¿Jte' wabj at cyuc'ile? —At wuk, che chi. 6Xitzun tma'n Jesús cye xjal tu'n cycub ke' twitz tx'otx'; jaw ttzyu'n keju wuk wabj, xi tk'o'n chjonte te Dios, cub tpiẍc'u'n, xi tk'o'n cye t-xnak'tzben tu'ntzun t-xi cysipan cye xjal, ex cubtzun cyk'o'n cywitz xjal. 7Ax icx attok cab ox tal cyiẍ cyuc'il; cub tcy'iwla'n Jesús, ex xi tma'n cye t-xnak'tzben tu'n t-xi cysipan cye xjal. 8E wa'ntzun cycyakil xjal ex e noj; ex jaw cychmo'n wuk chi'l ttx'akan wabj cyaj sobryin. 9Aju cyajlal xjal e wa'n, balo cyaje mil xjal; xitzun tma'n Jesús cye tu'n cyaj cyja. 10Atzunte Jesús ocx naj tuj barc cyuc'ix ke t-xnak'tzben, pon tuj tx'otx' Dalmanuta tbi. 11E ultzun ke parisey e oc ten yolil tuc'il Jesús in che xjelin te: —Yec'untza jun señ keye tu'n tel knic'e ti'j ka tuj cya'j tzajni tipumala, che chi, nok tu'n toc tuj joybil ti'j cyu'n. 12O xjik'ban tc'u'j Jesús: —¿Tiku'n in tzaj cykanin xjal lu jun señ? Ax toc cxel nma'ne cyeye, mlay txi yec'un jun señ cye xjal lu, chi Jesús xi tma'n cye. 13E cyajtzun tcolin, ocx juntl maj tuj barc, xi' jlajxi laguna. 14Ke t-xnak'tzben Jesús ic' tna'l cyu'n, minti' tzaj cyi'n wabj, nok o'cx jun wabj k'i'n cyu'n tuj barc. 15Xitzun tcyuwsa'n Jesús cye: —Ten cycwente cyi'je ti'j t-samel pan cyu'n parisey, aju in jaw mal tc'u'j pan tu'n, ex ten cycwente cyi'je teju t-samel pan tu'n Herodes, chi Jesús cye. 16E octzun ten xnak'tzben yolil ti'j cyxolx, in cyma'n: —In tma'n jlu tu'nju minti' saj ki'n wabj, che chi. 17Tejtzun tel tnic' Jesús ti'j, xi tma'n cye: —¿Tiku'n in che yoline ti'j ka minti' wabj k'i'n cyu'ne? ¿Minti'pe in canun tuj cynable, ex minti'pe nne'l cynic'e ti'j? ¿Maj ma cyuwix cyanmiye? 18¿Myapetzun at tbak' cywitze ex minti' in cyile? ¿Myapetzun at cyẍcyine ex minti' in cybi'ne? ¿Minti'petzun na'n cyu'ne? 19Tej tcub npiẍc'u'ne jwe' wabj tu'n t-xi sipet cye jwe' mil xjal, ¿jte'tzun chi'l o noj tu'n ttx'akan wabj tej tjaw cychmo'ne? Chi Jesús. —Cablaj chi'l che chi. 20—Ex tej tcub npiẍc'u'ne wuk wabj tu'n t-xi sipet cye cyaje mil xjal, ¿jte'tzun chi'l o noj tu'n ttx'akan wabj tej tjaw cychmo'ne? Chi Jesús. —Wuk chi'l che chi. 21Xitzun tma'n Jesús cye: —¿Tza'ntzun tten na'nx tel cynic'e ti'j? 22E pontzun tuj tnam Bet-saida. Ex ul cyi'n xjal jun moẍ tuc'il Jesús, e cubsan twitz tu'n toc tmaco'n Jesús ju moẍ. 23Tzajtzun ttzyu'n Jesús tk'ab moẍ, ex ti'n ti'jxi tnam; oc ttzuban ti'j tbak' twitz, ex oc tk'o'n tk'ab ti'j tbak' twitz, ex xi tkanin te: —¿Atpe ch'in ma tila? 24Jawtzun tque'yin twitz xjal. —Ma wile ke xjal in che bet ic che que'yin ic tza'n ke tze', chi xjal. 25Ex oc tk'o'n juntl maj tk'ab Jesús ti'j tbak' twitz moẍ, ex bant tque'yin, ex bi'x cyaj banix twitz, ex clarxix o til tcyakil. 26Xitzun tma'n Jesús te tu'n taj tja. —Mi'n tz'ocxa tuj tnam ex mi'n txi tma'na cye xjal tuj tnam, chi Jesús xi tma'n te. 27Xi'tzun Jesús cyuc'ix ke t-xnak'tzben cyuj ke aldey ate' ti'jele tnam Cesarea Filipo. Xi tkanin Jesús cye t-xnak'tzben tej cyja' cyxi' tuj be ex xi tma'n cye: —¿Chi toc cyu'n xjal wi'je? ¿Alcye kine, che chi xjal? 28Xitzun cytzak'we'n: —At junjun in cyma'n ka aya Juan aju e byan xjal tu'n tuj a'; ex junjuntl in cyma'n ka aya Elías; ex junjuntl in cyma'n ka aya jun cye t-sanjel Dios e ten ojtxi, che chi. 29Xitzun tkanin Jesús cye: —¿Yajtzun cyeye, alcye kine tuj cywitze? Xi ttzak'we'n Pedro: —Aya ju Crist aju at toclen tu'n Dios. 30Pero xi tma'n Jesús cye tu'n mi'n t-xi cyma'n jlu cye xjal. 31Octzun ten Jesús k'olte xnak'tzbil cye ex tma: —Ilxix ti'j tu'n tic'x nimcu wu'ne, akine sc'o'maj kine tu'n Dios tu'n ntene cyuc'il xjal, ex il ti'j tu'n wel ic'une cyu'n cytijil xjal ex cyu'n ke nejenel cye pal ex cyu'n xnak'tzal ti'j ley, ex tu'n ncub byo'ne, ex tu'n njatz ank'ine tuj toxin k'ij, chi Jesús cye. 32Clarxix xi tma'n jlu cye. Entons xi uc'in tu'n Pedro, e je'l lak'e' ex oc ten Pedro mayolte ti'j t-ximbetz. 33Atzunte Jesús ajtz meltz'aj ex tzaj tque'yin cywitz ke t-xnak'tzben, oc ic'le'n Pedro tu'n, ex xi tma'n te: —Lak'ebila wi'je Satanás porque myatzun toc tnabla ti'j tajbil Dios, nok o'cx toc tnabla ti'j cyajbil xjal. 34E tzajtzun ttxco'n Jesús ke xjal cyuc'ix ke t-xnak'tzben, ex xi tma'n cye: —Ka at jun xjal taj tu'n toc lpe' wi'je, xc'ayinc tib teju tex tajbil, k'inx tcrus, ex lpe'c wi'je. 35Porque alcye jun xjal o'cx toc tc'u'j ti'j tu'n tten tchwinklal twitz tx'otx', mlay tcamba aju chwinklal in tzaj tk'o'n Dios; ex alcye jun xjal tk'on tib tu'n tnaj tchwinklal twitz tx'otx' nok tu'n nlaje ex tu'n tlaj tkanil colbil, oc tcamba' aju chwinklal in tzaj tk'o'n Dios. 36Porque ¿ti tajben te xjal ka ma tcamba tcyakilju at twitz tx'otx' ex ka ma naj tanmi? 37Ex ¿alcye ba'n t-xi tk'o'n xjal te chojbil tu'n tclet tanmi? 38Porque alcye ma ch'ixwi wi'je ex ti'j nyole cyxol ke xjal ate' tuj tk'ijlalil ja'lo ma tz'el cypa'n cyib ti'j Dios ex aj il ke, ax icx weye, chin jawil ch'ixwiye ti'j oc wule in chin koptz'aje tu'n t-spic'umal Nmane ex cyuc'ix ke anjel xjan wuc'ile, akine sc'o'maj kine tu'n Dios tu'n ntene cyuc'il xjal.

will be added

X\