Marcos 7

1Ul cychmon cyib parisey tuc'il Jesús, cyuc'ix junjun xnak'tzal ti'j ley e tzaj tuj tnam Jerusalén. 2Tej cylonte at junjun t-xnak'tzben Jesús in che wa'n ex minti' nne'l cytx'jo'n cyk'ab ic tza'n in tma'n cyley: —Mya ba'n jlu, che chi parisey. 3(Porque ke parisey cyuc'ix cycyakil xjal judiy, nimanxix cyu'n aju ley cyaj bant ti'j cyu'n cytijil xjal, cyja'tzun ka minti' ma baj cytx'jo'n cyk'ab ic tza'n in tma'n ley, ax mlay che wa'n. 4Ex oc cyajtz meltz'aj tuj plas, mlay che wa'n ka minti' ma baj cytx'jo'n cyk'ab. Ex nimcu txkantl in cybincha'n aju in tma'n cyley, ic tza'n tu'n cytx'jet ke vas cyu'n, ex ke xar, ex ke c'il c'uxbil ex ke watbil.) 5Xitzun cykanin parisey ex ke xnak'tzal ti'j ley te Jesús: —¿Tiku'n minti' in cybincha'n t-xnak'tzbena ic tza'nxju cyaj bant ti'j cyu'n cytijil xjal? In che wa'n ex minti' nne'l cytx'jo'n cyk'ab? Che chi. 6Xi ttzak'we'n Jesús: —Xmletz' keye, ax toc aju o tma Isaías cyi'je, aju t-sanjel Dios, ic tza'n tz'iban tuj Tu'jil, porque chi Isaías tuj Tu'jil: Ke xjal lu nok tu'n cytzi' in chin nimanjtze cyu'n, atzunju cyanmi najchak ta' wi'je. 7Nokx gan in che c'ulun nwitze, porque aju xnak'tzbil in cyk'o'n, cymandamyent xjal, chi Isaías. 8Porque in cyaj cyk'o'ne aju tmandamyent Dios, atzunju cyaj bant ti'j cyu'n xjal atzunju in bant cyu'ne, tu'n cytx'jet ke xar cyu'ne ex ke vas; ex nimcu txkantl in cybincha'ne ic tza'n ke jlu. 9Ax icx xi tma'n Jesús cye: —Ax toc aju tmandamyent Dios nno'c cyk'o'ne minti' tajben tu'n tjapun cyu'ne aju cyaj k'ma'n cyeye cyu'n cytijil xjal. 10Porque o tma Moisés: Cynimanxe cymane ex cytxu'ye; ax icx in tma'n: Alcye ma yasun ti'j tman ex ka ti'j ttxu', il ti'j tu'n tcub byet. 11Atzun cyeye in cyma'ne ka ba'n tu'n t-xi tma'n jun xjal te tman ex ka te ttxu' cyja': Mlay chin onine ti'ja, porque tcyakilju at weye Corbán. (Aju yol Corbán atzun in tma'n, ma txi nk'o'ne te Dios te jun oyaj.) 12Tu'n jlu in xi cymayo'ne tu'n mi'n tonin xjal te tman ex ka te ttxu'. 13Cyja'tzun nno'c cyk'o'ne tyol Dios te minti' tajben, tu'nju yol cyaj k'ma'n cyeye, ex wikinwik tcyaj cymane cye cyc'wa'le. Ex nimcu in cybincha'ne ic tza'n jlu. 14E tzaj ttxco'n Jesús ke xjal ex xi tma'n cye: —Cybintze nyole cycyakile, ex tz'elx cynic'e ti'j: 15Aju in xi' tu'n xjal, mlay tz'ilix tuj tanmi tu'n, atzunju in jatz tuj tanmi xjal, atzunju in tz'ilsante tuj tanmi xjal. 16[Alcye at t-ẍcyin, binx ju yol lu.] 17Tejtzun tel tpa'n tib Jesús cyi'j xjal, ocx tuj ja. Xitzun cykanin ke t-xnak'tzben ti t-xilen ju techal lu. 18Xi tma'n Jesús cye: —¿Maj icx cyeye minti' nne'l cynic'e ti'j? ¿Minti'pe nne'l cynic'e ti'j, aju in xi' tu'n xjal mlay tz'ilix tuj tanmi tu'n? 19Porque minti' nno'cx tuj tanmi, nok o'cx in cu'x tuj tc'u'j, ex nne'x tc'u'jin. Tma Jesús jlu tu'n tel cynic' ti'j ka ba'n tchyo'njtz tcyakil chibj. 20Ex tmatl Jesús: —Aju in jatz tuj tanmi xjal, atzunju in tz'ilsante tuj tanmi. 21Porque tuj cyanmi xjal in jatz cyximbetz mya ba'n, tu'n cybinchante aj pajil, tu'n cyyaẍin, tu'n tcub cybyo'n jun xjal, 22tu'n cyelk'an, tu'n tpon cyc'u'j ti'j nimcu, tu'n cybinchante mya ba'n, tu'n cysbun, tu'n mi'n cyjac'unte cyib, tu'n ttzaj tlo'ch cyc'u'j, tu'n tbant jun simj yol, tu'n cyoc puro jawni ke, ex tu'n cyoc minti' cynabl. 23Tcyakil jlu mya ba'n tuj tanmi xjal in jatz, ex in tz'ilix tuj tanmi xjal tu'n, chi Jesús cye. 24Ic'tzun Jesús tuj lugar lu, xi' tuj tx'otx' jatum ate' ke tnam Tiro tuc'ix Sidón. Ocxtzun tuj jun ja posadiyil, o tajbe tu'n mi'n cybinte xjal, pero minti' tumel tu'n tten tuj ewaj. 25Porque at jun xu'j at jun tal txin at ju'ẍ tuj tanmi; tej tbinte xu'j tkanil ti'j Jesús, pon naj tuc'il ex cub ẍmeje' t-xe tkan. 26Ate xu'j lu aj Sirofenisia, mya judiy xjal, ex cubsan twitz Jesús tu'n tetz tlajo'n Jesús ju'ẍ tuj tanmi txin aju tal. 27Atzunte Jesús xi tma'n te: —E tnoj cyc'u'j c'wa'lbaj nej, porque mya ba'n tu'n tel k'i'n cywa c'wa'lbaj ex tu'n t-xi k'ot cye tx'yan, chi Jesús te. 28Xi ttzak'we'n xu'j: —Ax toc Tat; pero ke tx'yan in che wa'n tjak' mes ti'j tbuchil cywa c'wa'lbaj, chi xu'j. 29Xi tma'n Jesús te xu'j: —Tu'nju yol lu ma tzaj tma'na ba'n tu'n taja, ma tz'etz ju'ẍ tuj tanmi tala, chi Jesús te. 30Tejtzun tpon xu'j tja, lu tal coẍl twitz watbil, otok tz'etz ju'ẍ tuj tanmi. 31Ajtztzun meltz'aj Jesús tuj tx'otx' jatum ta' tnam Tiro, ic' aj tuj tnam Sidón, ex ic' aj tuj tx'otx' Decápolis tbi, pon ttzi laguna tuj Galiley. 32Ul cyi'n xjal jun xjal twitz Jesús, chcyin twi' ex men, ex e cubsan twitz Jesús tu'n tcub tk'o'n tk'ab tibaj. 33El tlak'ban tib Jesús cyi'j xjal, xi ti'n ju xjal men, ocx tk'o'n tal tk'ab tuj t-ẍcyin, ex oc ttzuban twi tk'ab, oc tmaco'n tak' xjal. 34Jawtzun tque'yin Jesús twitz cya'j, in xjik'ban tc'u'j ex tma: —Efata. (Atzun in tma'n ju yol lu, cjaketel t-ẍcyina.) 35Te jurat naj e jaket ke t-ẍcyin xjal, ex bant naj tyolin clarxix wen. 36Xi tcyuwsa'n Jesús cye tu'n mi'n tel tkanil cyu'n; masque nimcu maj xi tma'n Jesús cye, atzun cye mas el tkanil cyu'n. 37Nimxix e labin xjal ti'j, in cyma'n: —Ba'n tcyakilju in tbincha'n: ke chcyin in bant cybin tu'n, ex ke men in bant cyyolin tu'n.

will be added

X\