Marcos 5

1E pontzun jlajxi laguna tuj cytx'otx' aj Gadara. 2Tejtzun tetz Jesús tuj barc, jurat naj ul jun xinak canul ti'j, tzaj tuj camposant, tocx jun ju'ẍ tuj tanmi. 3Axtok najl xjal tuj camposant, ex mi a'l jun xjal in xcye' ti'j tu'n tc'alet tu'n caden. 4Porque nimcu maj e baj c'alo'n ke tkan cyuc'ix ke tk'ab tu'n caden, pero e cub tzakj ke caden tu'n ex e baj tpaẍu'n, ex mi a'l jun xjal in xcye' ti'j. 5Tcyakil k'ij ex konic'an ax ta' twi witz ex tuj camposant, in sch'in ex nno'c tc'ixbisan tib tu'n abj. 6Tejtzun tlonte xjal najchak cyja'tok ttzaj Jesús, xi kelan ex cub ẍmeje' twitz Jesús. 7Jaw tk'ajk'ajel twi' cyuw, ex xi tma'n: —¿Ti toclena wi'je, Jesús, aya Tc'wa'l Dios ma' toclen? Chin cubsale twitza, mi'n chin cub tyajla'na. 8Tma xjal icju tu'nju xi tma'n Jesús te: —Aya ju'ẍ, tetza tuj tanmi xjal lu. 9Ex xi tkanin Jesús te: —¿Ti tbiya? Atzunte xjal xi ttzak'we'n: —Lejyonwe nbi, porque nim kbete. 10Ex o cubsanxix ju'ẍ twitz Jesús tu'n mi'n cyex lajo'n tuj cytx'otx' aj Gadara. 11Ate'tok txkan boch nikayin, nim cybet in che wa'ntok tc'u'j witz. 12Ex e cubsan ke ju'ẍ twitz Jesús: —Ko t-samanxa cyxol boch tu'n kocxe cyuj, che chi. 13Xitzun tk'o'n Jesús permis cye. E je'tztzun ke ju'ẍ tuj tanmi xjal, e jo'cx cyuj boch balo te cab mil cyajlal boch; extzun cyxo'n cyib cycyakil boch ttxa'n xak, ex e baj naj tuj a'. 14Atzun keju in che pastorin ke boch e je'l ok, ex xi cyk'o'n tkanil cye xjal tuj tnam ex cye xjal tuj cojbil. E tzajtzun xjal que'yilte ti otok baj. 15E ultzun tuc'il Jesús, ex o cyil k'ukltok ju xjal aju otok yajlanjtz cyu'n ju'ẍ nimcu cybet, toc t-xbalun ju xjal ex otok banix tnabl; tzajtzun cyxobil xjal. 16Ex akeju e lonte jlu, xi cytx'olba'n cye xjal tza'n tten otok banix ju xjal aju otok yajlanjtz cyu'n ju'ẍ, ex ti o baj cyi'j boch. 17E octzun ten xjal cubsal twitz Jesús tu'n tex tuj cytanmi. 18Cyja'tok tocx Jesús tuj barc, aju xjal otok yajlanjtz cyu'n ju'ẍ o cubsan twitz Jesús tu'n t-xi' tuc'il Jesús. 19Atzunte Jesús minti' tcuyi tu'n t-xi' xjal tuc'il, nok o'cx xi tma'n te: —Txi'ya tjaya cyxol ke termaniya, ex tx'olbanxa cye aju nimxix ma tbincha Kman teya ex tza'n tten ma tzaj k'ak'an tc'u'j ti'ja. 20Xi'tzun ju xjal, oc ten tx'olbalte tuj tx'otx' Decápolis, xi tma'n aju nimxix o tbincha Jesús te; ex cycyakil xjal e labin ti'j. 21Tej tic'tz Jesús juntl maj tuj barc, ul jlajtzi laguna, ul cychmon cyib nim xjal ti'j; axtzun cub ten Jesús ttzi a'. 22At jun cye keju nejenel tuj ja te c'ulbil, Jairo tbi, ul tuc'il Jesús; tej tlonte Jairo cyja' ttzaj Jesús, cub mutze' t-xe' tkan. 23Nimxix o cubsan twitz, ex tma: —Ch'ix tcyim nme'jele; tzaja wuc'ile tu'n tcub tk'o'na tk'aba tibaj tu'ntzun tbanix ex tu'n tank'in, chi Jairo. 24Xi'tzun Jesús tuc'il, ex e oc lpe' nim xjal ti'j, ex oc cybetz'an cyib xjal ti'j Jesús. 25Ex at jun xu'j cyxol xjal, otok bant cablaj abk'i yabtok tu'n ẍwo'j. 26Ela'xi maj otok txi aj cyuc'il nimcu k'anal, ex nim otok c'ixbi, ex otok baj tnajsa'n tcyakilju at te; pero minti' o bant ch'in, nok mas xi' tuj tilil. 27Tej tbinte xu'j tkanil ti'j Jesús, pon lak'e' ttzal ti'j Jesús cyxol xjal, ex oc tmaco'n xu'j t-xbalun Jesús. 28Porque chi xu'j: Ichak nok t-xbalun tz'oc nmaco'ne, chin bantele. 29Ex jurat naj o we' ẍwo'j ti'j; ex o tna' xu'j tuj t-ximlal otok banix ex otok tz'el tyabil. 30Jurattzun el tnic' Jesús ti'j ka otok banix jun xjal tu'n tipumal; ajtztzun tque'yin cywitz xjal, ex tma: —¿Alcye ma tz'oc maconte nxbalune? 31Xi cyma'n t-xnak'tzben te: —Lu in tque'yina ke xjal nno'c cybetz'an cyib ti'ja, atzun teya in tma'na: ¿Alcye ma tz'oc maconte weye, chiya? 32Xitzun tque'yin Jesús cywitz cycyakil xjal ate'tok ti'jele, tu'n tel tnic' ti'j alcye otok tz'oc maconte te. 33Atzunte xu'j tzaj lu'lun tu'n t-xobil, porque ba'ntok tu'n aju otok binchanjtz te; pontzun lak'e' xu'j twitz Jesús, cub ẍmeje' t-xe tkan, ex clarxix xi tma'n tcyakil. 34Xitzun tma'n Jesús te: —Nme'jel, tu'n tocslabla ma banta; txi'ya, txubtxaj ta'ya ja'lo, bi'x ma cyaj banixa, ma tz'el tyabila. 35Matok in yolin Jesús tej cyul cabe xjal e tzaj tuj tja nejenel tuj ja te c'ulbil ex xi cyma'n te: —Ma cyim tme'jela; ¿ti gan sict Xnak'tzal tu'na? Che chi. 36Tejtzun tbinte Jesús aju in cyma'n, xi tma'n teju nejenel tuj ja te c'ulbil: —Mi'n xoba, o'cx ke' tc'u'ja. 37Ex minti' o tcuyi Jesús tu'n cyxi lpe' xjal ti'j, nok o'cx Pedro, tuc'ix Jacobo ex Juan aju titz'in Jacobo e je'x tuc'il. 38Tejtzun tpon Jesús tja nejenel o til Jesús ke xjal in che wulj ex in che ok' ex nimxix in che wu'yin. 39Ocxtzun Jesús tuja ex xi tma'n cye xjal: —¿Tiku'n in che wulje ex in che ok'e? Aju txin mya cyimni, nok in tan, chi Jesús cye. 40Pero e oc ten xjal xmayil ti'j Jesús. Atzunte Jesús e je'tz tlajo'n cycyakil xjal ttxa'n pe'n, o'cx tman txin ocx tuc'in, tuc'ix ttxu', ex cyuc'ix keju ate' tuc'il Jesús. E ocxtzun jatum ta' txin. 41Jawtzun ti'n Jesús tk'ab txin ex xi tma'n te: —Talita cumi, chi Jesús. Atzun in tma'n ju yol lu: Txin, teya in xi nma'ne, we'ctza. 42Jurattzun jaw we' txin ex oc ten betel, porque otok japun cablaj abk'i tu'n. Atzun cye xjal nim e jaw labin tej cyque'yinte jlu. 43Pero xi tcyuwsa'nxix Jesús cye, xi tma'n tu'n mi'n t-xi cyma'n cye xjal, ex xi tma'n tu'n t-xi k'ot ch'in twa txin.

will be added

X\