Marcos 4

1Oc ten juntl maj Jesús k'olte xnak'tzbil cye xjal ttzi laguna, ex nim xjal pon cychmon cyib ti'j; cyja'tzun jax Jesús tuj jun barc at ttzi a', cubtzun ke', atzun cycyakil xjal k'ukl ke twitz tx'otx' ttzi laguna. 2Ex nimcu xnak'tzbil xi tma'n Jesús cye tuj techal; atzunju xnak'tzbil lu xi tma'n cye: 3—Cybintze nyole. At jun xjal xi' awal triw. 4Tej t-xi tchitun xjal iyaj, at ch'in cub tz'ak tuj be; e ultzun ke chyu'j ex jaw cywa'n. 5Ch'intl iyaj cub tz'ak cyxol abj jatum mya nim tpimil tx'otx'; jurat tzaj pok'l iyaj porque mya nim tpimil tx'otx'. 6Pero tej tmek't k'ij o tz'e'y ex bi'x tzkij tu'n tlaj mya nim tloc'. 7Ch'intl iyaj cub tz'ak t-xol ch'i'x c'ul; ch'iytzun ch'i'x c'ul, bi'x xc'ost triw tu'n, ex minti' oc twitz. 8Pero ch'intl iyaj cub tz'ak tuj tbanil tx'otx'; tzaj pok'l, ex o ch'iy ex oc twitz; ex ti'j junjun tkan at oc 30 twitz, ex at oc 60 twitz, ex at oc jun syent twitz, chi Jesús cye. 9Xi tma'ntl Jesús cye: —Alcye at t-ẍcyin, binx ju yol lu. 10Tejtzun cyaj baj xjal, atzun keju e cyaj ten tuc'il Jesús cyuc'ix ke cablaj t-xnak'tzben xi cykanin te Jesús alcye tnabl ju techal. 11Xitzun tma'n Jesús cye: —Te cyeye ma tzaj k'o'n tu'n tel cynic'e ti'j ju yol ti'j tcawbil Dios aju ewantok nej; atzun cye mastl xjal, tcyakil tu'n t-xi k'met cye tuj techal, 12tu'n mi'n tcyil aju in cyque'yin, ex tu'n mi'n tel cynic' ti'j aju in cybi'n, tu'ntzun mi'n cyajtz meltz'aj tuc'il Dios ex tu'n mi'n tcub najset cyil, chi Jesús cye. 13Ex xi tma'ntl Jesús cye: —¿Maj minti' nne'l cynic'e ti'j ju techal lu? ¿Tza'ntzun tten c'elel cynic'e cyi'j mastl techal? 14Aju iyaj in cu'x tawa'n xjal, atzunju tyol Dios. 15Aju be jatum cub tz'ak iyaj, atzun in yolin cyi'j xjal in cu'x awet tyol Dios tuj cyanmi: nej in xi cybi'n, pero nnu'l naj Satanás ex nne'l ti'n tyol Dios aju otok cu'x awet tuj cyanmi. 16Ke abj jatum cub tz'ak iyaj, atzun in yolin cyi'j xjal oc cybinte tyol Dios jurat naj in xi cyocsla'n in che tzalaj ti'j, 17pero minti' in xi' tloc' Tyol Dios cyuj, nok te cabe k'ij in che ten; oc ttzaj yajbil cyi'j ex oc cyel ic'un cyu'n xjal tu'n tlaj tyol Dios, jurat naj in che cub tz'ak. 18Aju tx'otx' at ch'i'x c'ul tuj jatum cub tz'ak ju iyaj, atzun in yolin cyi'j xjal in xi cybi'n tyol Dios, 19pero o'cx in che bisun ti'j tza'n tten tu'n cyank'in twitz tx'otx', in che sbunjtz tu'nju cyaj tu'n cyoc k'inun, ex nimcu in pon cyc'u'j ti'j. Tcyakil jlu toc cyc'u'j ti'j; tu'ntzunju nne'l tipun tyol Dios tuj cyanmi, ex minti' in witzan. 20Atzunju tbanil tx'otx' jatum cub tz'ak ju iyaj, atzun in yolin cyi'j xjal in xi cybi'n tyol Dios ex in xi cyocsla'n, ex nno'c twitz iyaj cyuj; ti'j junjun tkan at nno'c 30 twitz, ex at nno'c 60 twitz, ex at nno'c jun syent twitz. 21Ax icx xi tma'n Jesús cye: —¿Baka in tzaj cyi'n xjal jun candil tu'n tocx cyk'o'n tjak' almi ex ka tjak' watbil? ¿Myapetzun tibaj jun tcubil tu'n tcub k'ot tu'n tk'onte spic'un? 22Porque tcyakilju at tuj ewaj ctzajel yec'un, ex tcyakilju ewan c'elel tuj k'ancha'l. 23Alcye at t-ẍcyin, binx ju yol lu. 24Ax icx xi tma'n cye: —Cyk'o'nque cwent ti'j ju in cybi'ne, porque ax ju malbil c'ajbel tu'n Dios cyeye jatum in xi cymalo'ne te juntl, ex ctzajel tk'o'n Dios ch'intl tibaj cyeye. 25Porque alcye jun xjal at ch'in te, ctzajel k'o'n mastl te; pero alcye jun xjal minti' te, aju ch'in at te, c'elel k'i'n. 26Ax icx xi tma'n Jesús: —Aju tcawbil Dios ic tten ic tza'n jun xjal in cu'x tawa'n iyaj tuj tx'otx'; 27in xi'tzun xjal tal konic'an ex in jaw we' k'ijl, atzunju iyaj in pok'l ex in ch'iy, pero te xjal minti' bi'n tu'n tza'n tten in pok'l iyaj. 28Porque ax tx'otx' in tzaj k'onte twitz; tnejel in ch'iy tkan, te tibajxi in yec'un twi', ex te tibajxi nno'c twitz ti'j twi'. 29Octzun tk'anax twitz, in che'x t-sama'n xjal tu'n tjaw chmet twitz, porque otok pon k'ij tu'n tjaw. 30Ax icx o tma Jesús: —¿Chi toc cyu'ne ti'j tcawbil Dios? ¿Tza'n tten? Ex ¿alcye jun techal ctzajel ki'n ti'j? 31Ic tten tcawbil Dios ic tza'n twitz mostaza oc in cu'x awet tuj tx'otx', mas tal ch'inxix twitz mastl iyaj at twitz tx'otx'; 32pero oc in cu'x awet, in tzajtzun ch'iy, ex ma' nno'ca cywitz mastl itzaj, ex ma' in che oc ke tk'ab, cyja'tzun in che ocx ten ke chyu'j t-xol tk'ab tjak' t-xlecumal. 33Tej tyolin Jesús cyuc'il xjal, nimcu techal xi tma'n cye, ic tza'n ke techal lu, alcyeju tu'n tel cynic' ti'j. 34Puro tuj techal o yolin Jesús cyuc'il xjal, pero xi tchic'ba'n tcyakil cye t-xnak'tzben tej cyten cyjunalx. 35Ax k'ij tej toc kax, xi tma'n Jesús cye t-xnak'tzben: —Ko ic'x jlajxi laguna. 36E cyajtzun ten cycyakil xjal cyu'n xnak'tzben, xi'tzun k'i'n Jesús cyu'n t-xnak'tzben tujx barc jatum k'ukl; ex at mastl barc e je'x lpe' ti'j. 37Pero tzaj jun cyk'ik' nimxix, ex jaw pulin a' tu'n cyk'ik', ocx tuj barc, cyja'tzun ch'ixtok t-xi mulk'aj barc tuj a'. 38Atzunte Jesús otok tzic' tan ttxa'n tje' barc, tx'ayl tibaj jun xk'anwi'; jawtzun cyc'asun, ex xi cyma'n te: —Xnak'tzal, ¿minti'pe taja ki'je, ko najele? Che chi. 39Jawtzun we' Jesús, xi tmayo'n cyk'ik' ex xi tma'n te a': —Mi'n k'ajta. Numecuya. We'tzun cyk'ik', bi'xtzun taque' tcyakil. 40Xitzun tma'n cye t-xnak'tzben: —¿Tiku'n in che xobe? ¿Tza'n tten minti' cyocslable? Chi Jesús. 41Tzajtzun nim cyxobil, ex cyma cyxolx: —¿Alcyetzunju xjal lu? Porque tuc'ix cyk'ik' ex a' in xi cyniman tyol, che chi xnak'tzben.

will be added

X\