Marcos 3

1Ocx juntl maj Jesús tuj ja te c'ulbil ex otok pon jun xjal tzkij jun tk'ab. 2In che k'on xjal cwent ti'j Jesús ka tu'n tbant ju xjal tu'n tuj k'ij te ojlabl, tu'ntzun tcub tz'ak Jesús tuj jun til cyu'n. 3Xitzun tma'n Jesús teju xjal tzkij tk'ab: —We'ctza ex we'cuya cyxol xjal. 4Xitzun tkanin Jesús cye mastl xjal: —¿K'o'npelo tu'n ley tu'n kbinchante jun ba'n tuj k'ij te ojlabl ex ka tu'n kbinchante jun mya ba'n? ¿K'o'npelo tu'n tclet jun xjal ex ka tu'n tnaj? Chi Jesús cye. Atzun cye minti' e k'ajt. 5Xi tque'yin Jesús cywitz cycyakil ti'jele, tzaj tk'oj, ex tzaj nim tbis tu'n tlaj cyuw cyanmi. Xi tma'n Jesús te xjal tzkij tk'ab: —Nukpi'mil tk'aba. Atzunte xjal el tnukpi'n tk'ab, ex cyaj banix tk'ab. 6Tejtzun cyetz ke parisey, e yolin ti'j cyuc'il ke tpartid Herodes, bant ti'j cyu'n tza'n tten tu'n tcub Jesús cyu'n. 7Atzunte Jesús el tpa'n tib, xi' ttzi laguna cyuc'ix ke t-xnak'tzben, ex nim xjal e oc lpe' ti'j e tzaj tuj tx'otx' Galiley. 8Ax icx e tzaj tuj tx'otx' Judey, ex tuj tnam Jerusalén, ex tuj tx'otx' Idumea, ex e tzaj jlajxi nima Jordán, ex e tzaj cyuj ke lugar ti'jele tnam Tiro ex tnam Sidón, porque o cybi nimcu tbinchben Jesús in bant tu'n, cyja'tzun e pon nim xjal tuc'il. 9Xitzun tma'n Jesús cye t-xnak'tzben tu'n tbant tten jun barc tu'n tlaj nimcu xjal, tu'ntzun mi'n toc betz'an Jesús cyu'n xjal. 10Porque nimcu xjal otok che banix tu'n, cyja'tzun e pon tilj xjal ti'j Jesús, akeju at cyyabil, tu'n toc cymaco'n ti'j Jesús. 11Atzun ke ju'ẍ, tej tilwaj Jesús cyu'n e cub ẍmeje' twitz, in che sch'in wen: —Aya Tc'wa'l Dios, che chi. 12Pero cyuw xi tma'n Jesús cye ju'ẍ tu'n mi'n t-xi cyma'n alcyete Jesús. 13Tbajlenxi jlu jax Jesús twi witz, ex e tzaj ttxco'n alcye keju at tgan cyi'j; e pontzun tuc'il. 14Ex jaw t-sc'o'n Jesús cablaj t-xnak'tzben tu'n cyten tuc'il, ex tu'n cyxi t-sama'n pacbal; 15ex xi tk'o'n cyoclen tu'n cybanix ke yab cyu'n, ex tu'n cyetz ke ju'ẍ tuj cyanmi xjal cyu'n. 16Akeju e jaw t-sc'o'n atzun ke jlu: Simón, aju Pedro tcabin tbi oc tk'o'n Jesús; 17tuc'ix Jacobo aju tcy'ajal Zebedey, tuc'ix Juan aju titz'in Jacobo, ake jlu Boanerges tcabin cybi oc tk'o'n Jesús, atzun in tma'n, ic cymod ic tza'n k'ancyok; 18tuc'ix Andrés, tuc'ix Pelip, tuc'ix Bartolomé, tuc'ix Matey, tuc'ix Tomás, tuc'ix Jacobo aju tcy'ajal Alfeo, tuc'ix Tadeo, tuc'ix Simón aju toctok te tajlal cyxol jun partid xjal cananist cybi, 19ex tuc'ix Judas Iscariote, aju xi k'onte Jesús tuj cyk'ab xjal. 20Ultzun Jesús tuj ja jatum in posadiyin cyuc'ix ke t-xnak'tzben. Oc cychmon cyib juntl maj ke xjal, cyja'tzun minti' tumel tu'n twa'n Jesús cyuc'ix t-xnak'tzben. 21Tejtzun cybinte ke terman Jesús, e ul k'il te porque in cyma'n ka otok tz'oc te tzcaj. 22Ax icx cye xnak'tzal ti'j ley otok che tzaj tuj Jerusalén in cyma'n: —Ate xjal lu at Belsebú tuj tanmi, ex tu'n Belsebú aju nejenel cye ju'ẍ in tzaj k'o'n tipumal xjal lu tu'n cyetz ke ju'ẍ tuj cyanmi xjal tu'n, che chi. 23E tzajtzun ttxco'n Jesús, ex xi tma'n jun techal cye. Chi cyja': —¿Tza'n tten tu'n tetz tlajon tib Satanás tu'nx tib? 24Ka at jun cawbil at pabl tib tuj ex in che k'ojin xjal cyxolx, aju cawbil lu mya cucx ctel. 25Ax icx jun ja xjal ka in che k'ojin cyxolx, aju ja xjal lu mlay che ten junx. 26Ax icx te Satanás ka ma tz'oc ten k'ojlel ti'jx, ex ka tpa'n tib tcawbil, mlay bant cucx tu'n tten, cnajeltzun tipumal. 27Mlay tz'ocx jun xjal tuj tja juntl xjal at tipun ex mlay tz'etz telk'a'n aju at tuj tja, o'cx ka ma cub tc'alo'n ju xjal nej, entons jaculo tz'etz telk'a'n tcyakilju at tuj tja. 28Ax toc cxel nma'ne cyeye, jacu najset tcyakil cyil xjal tuc'ix tcyakilju mya ba'n in cyma'n, 29pero alcye jun xjal ma yolin mya ba'n ti'j Xewbaj Xjan, mlay cub najset til te jumajx, cbel t-sentens te jumajx tu'n tlaj til, chi Jesús cye xnak'tzal ti'j ley. 30Xi tma'n Jesús jlu cye porque in cyma'ntok ka at ju'ẍ tuj tanmi. 31Tbajlenxi jlu pon ttxu' Jesús cyuc'ix ke titz'in, ax e cyaj ten ttxa'n pe'n, ex ocx txocbaj Jesús cyu'n. 32Atzun ke xjal k'ukl ke'tok ti'jele Jesús xi cyma'n te: —Lu ttxu'ya ex ke titz'ina ate' ttxa'n pe'n, in che jyon ti'ja, che chi. 33Xitzun tma'n Jesús cye: —¿Alcyetzun ntxu'ye, ex alcyetzun ke witz'ine? 34Xitzun tque'yin cywitz keju k'ukl ke'tok ti'jele. —Atzun ntxu'ye ke jlu ex atzun ke witz'ine. 35Porque alcyeju in tbincha'n tajbil Dios, atzun witz'ine, ex atzun wanbe, ex atzun ntxu'ye, chi Jesús cye.

will be added

X\