Marcos 13

1Tej tetz Jesús tuj tja Dios, xi tma'n jun t-xnak'tzben te: —Xnak'tzal, quina ke abj tbanilxix ex ke ja tbanilxix, chi t-xnak'tzben. 2Pero xi tma'n Jesús te: —¿Mape tz'oc tque'yina ke nmak ja lu? Mlay cyaj ten abj tibaj juntl abj, tcyakil cbel tilj. 3E je'xtzun twi witz Olivos tbi, jlajtzi tja Dios; tejtzun tcub ke' Jesús, xi tkanin Pedro te, tuc'ix Jacobo, tuc'ix Juan, tuc'ix Andrés cyjunalx: 4—K'mantza keye, che chi, ¿jtoj ban tjapun jlu? ¿Ex alcye jun señ tzul ch'ixtok tjapun tcyakil jlu? 5Xi ttzak'we'n Jesús: —Ten cycwente cyi'je tu'n mi'n cycub sbu'ne cyu'n xjal. 6porque che ul nimcu xjal, ax nbiye c'oquel cyk'o'n te cybi, in cyma'n: Akine ju Crist, che chilo; ex nimcu xjal che bel sbu'n cyu'n. 7Octzun cybinteye oc toc k'oj ex ka tkanil ti'j k'oj, mi'n che jaw sec'paje, porque ilxix ti'j tu'n tjapun tcyakil jlu, pero myatzun a mancbil tk'ijlalil tu'n tjapun baj tcyakil. 8Porque che oquel ten nasyon k'ojlel cyi'j txkantl nasyon, ex ke tnam che oquel ten k'ojlel cyi'j txkantl tnam; ex nok jachak tzul cyaknajnab, tzul we'yaj, ex che jawil tilj xjal; tcyakil jlu atzun tnejel c'ixbisabl. 9Atzun cyeye ten cycwente cyi'je; porque che xel k'o'ne tuj cyk'ab aj sanjelal, ex oc che bajel asyaline cyuj ja te c'ulbil. Che xel k'i'ne cywitz ke gobernador ex cywitz ke rey tu'n nlaje tu'n cyoque te testiw wi'je cywitz. 10Pero na'nxtok tul mancbil tk'ijlalil ilxix ti'j tu'n t-xi pacbet tkanil jun colbil cye xjal cyuj cycyakil nasyon. 11Pero oc cytzyete cyu'n xjal tu'n cyxi k'i'ne cywitz aj sanjelal, mi'n baj cyc'u'je ti'j alcye tu'n t-xi cyma'ne, ex mi'n che ximane ti'j, porque alcye ctzajel tma'n Dios cyeye, atzunju cxel cyma'ne oc cytzyete; porque mya akeye che yolil, ate Xewbaj Xjan c-yolil. 12Che xel k'o'n ke xjal cyu'n cyerman tu'n cycyim; icx ke c'wa'lbaj che xel k'o'n cyu'n cyman tu'n cycyim; ex ke c'wa'lbaj che oquel ten k'ojlel cyi'j cyman ex che xel cyk'o'n tu'n cycub byo'n. 13Ex che elel ic'une cyu'n cycyakil xjal tu'n tlaj ocslal keye wi'je, pero alcyeju cucx ma tzic'x tu'n ex minti' ma cub numj, atzunju oc cletel. 14At jun yol cyaj ttz'iban Daniel aju t-sanjel Dios. C'oquex cyk'o'n xjal jun tilbilal ic'bilxix ax tuj tja Dios, chi Daniel. Alcye ma jaw sch'inte jlu, tz'elx tnic' ti'j. Cyja'tzun, oc cylonteye tocx tilbilal lu tuj lugar jatum mya k'o'n te, entons ke xjal ate' tuj tx'otx' Judey, cyxi ok twi witz. 15Ex ka at jun xjal tjax twi tja oc tpon k'ij lu, oc tcu'tz, mi'n tz'ocx k'il jun ti'xti tuj tja; 16ex ka at jun xjal tuj cojbil, mi'n tz'ajtz meltz'aj tja k'il t-xbalun. 17Bec'bil cywitz ke xu'j ch'ixtok tul itz'j cyal tuj tk'ijlalil tzul, ex bec'bil cywitz ke xu'j cucx cych'u'n cyal. 18Cyja'tzun, che na'ne Dios myawt tuj jbalil tu'n cyel oke. 19Porque tuj tk'ijlalil tzul, tzul jun c'ixbisabl nimxix, bajx tzaj jun c'ixbisabl ic tza'n jlu atxix t-xe tnejel tej tbant tcyakil tu'n Dios, ex mlay tzaj juntl maj. 20Porque nokwit minti' tu'n tajtz lak'e' ti'j tk'ijlalil c'ixbisabl tu'n Kman, miwtlo jun xjal tu'n tcyaj ank'in; pero tu'n cylaj ke xjal sc'o'maj tu'n Dios, c'ajetz lak'e' ti'j tk'ijlalil c'ixbisabl. 21Entons ka at jun xjal ma tzaj tma'n cyeye: Lu Crist at tzalu, aju at tulel ka chi, ex ka lu Crist ta' ma chixin ka chi, mi'n txi cyocsla'ne tyol. 22Porque che ul ke xjal nic'al yol, c'oquel cyk'on cyib ic tza'n Crist ke, ex c'oquel cyk'on cyib ic tza'n t-sanjel Dios; ex che bantel ke señ cyu'n cyuc'ix ke binchben nim cyipumal, tu'n cysbunjtz ke xjal cyu'n, ax icx jacu cyajbe tu'n cysbun cyi'j keju sc'o'maj tu'n Dios, nokwit at tumel. 23Cyja'tzun, ten cycwente cyi'je; lu ma txi nma'ne tcyakil cyeye na'nxtok tul canun jlu. 24Tbajlenxitzun yajbil tuj tk'ijlalil tzul, c'oquel klolj twitz k'ij, ex ju xjaw mlay c'ant t-spic'umal. 25Ke che'w che tzajel tz'ak twitz cya'j, ex keju at cyipumal tuj cya'j oc che yucchtel. 26Octzun cyila' xjal oc ntzaje tuj muj, akine sc'o'maj kine tu'n Dios tu'n ntene cyuc'il xjal, ex oc cyila' at nim wipumale ex in koptz'aj wi'je. 27Che tzajeltzun nsama'ne ke n-anjele, ex cbajel cychmo'n keju sc'o'maj wu'ne tuj tcyakil twitz tx'otx', ctzajelx ke' ttxa'npun tx'otx' ex cpol baj max t-xe cya'j. 28Cyi'mele nic' ti'j tkan higo: Oc in cha'xix tk'ab, ex oc in tzaj t-xul, nne'l cynic'e ti'j in lak'e'x ttzaj ttzi jbalil. 29Icxtzun cyeye, oc cylonteye oc tjapun tcyakil jlu, tz'elx cynic'e ti'j, nikayin ta' tk'ijlalil tu'n wule, mer ic tza'n otok chin pone ttzi ja. 30Ax toc cxel nma'ne cyeye, ke xjal ate' tuj tk'ijlalil ja'lo na'nxtok cycyim oc tjapun tcyakil jlu. 31Cnajel cya'j tuc'ix tx'otx', atzunwe nyol mlay naj. 32Pero mi a'l jun bilte alcye k'ij ex alcye or tu'n wule; mi ke anjel ate' tuj cya'j minti' bi'n cyu'n, ax icx weye Tc'wa'l Dios kine minti' bi'n wu'ne. O'cx te Dios Mambaj ba'n tu'n. 33Cyja'tzun, ten cycwente cyi'je, che xk'ukine ex che na'ne Dios; porque minti' bi'n cyu'ne jtoj ban tjapun tk'ijlalil. 34Ic tten ic tza'n jun xjal xi' tuj jun tbe najchak; na'nxtok tetz tuj tja, cyaj tk'o'n cyoclen ke tmajen ex xi tma'n te teyle junjun alcye tak'un, ex cyaj tma'n te cwentil ttzi ja tu'n t-xk'ukin. 35Cyja'tzun, che xk'ukine porque minti' bi'n cyu'ne jtoj ban tul ju tajaw ja, ka otok koc yupj oc tul, ka te tmij ak'bil, ka oc ttzaj ok' tzec', ex ka ch'ixtok kskix. 36Cyja'tzun, che xk'ukine, mya yajcu tzul cuchiwt mi'n che cnete tu'n in che tane. 37Aju in xi nma'ne cyeye, cye cycyakil in xi nma'ne: Che xk'ukine.

will be added

X\