Marcos 11

1Tejtzun ch'ixtok cycanun tuj tnam Jerusalén, nikayin cytxlaj ke tnam Betfagé tuc'ix Betania, otok che pon nikayin t-xe witz Olivos tbi, xi t-sama'n Jesús cabe t-xnak'tzben, 2ex xi tma'n cye: —Cyxi'ye tuj aldey tocx ma chixin, octzun cyocxe tuj aldey, cnetel jun tal bur cyu'ne c'alo'n, aju na'nx tjax jun xjal chejil tibaj; cypaju'mile ex cyi'ntze tzalu. 3Katzun at jun xjal ma tzaj k'mante cyeye: ¿Tiku'n in cybincha'ne jlu? ka chi; c'ajbel te Kajaw, che chicuye, ex jurat c'ajetz t-sama'n. 4E je'xtzun ke xnak'tzben, ex cnet tal bur cyu'n c'alo'n ttzi pwert ttzi cay, ex eltzun cypaju'n. 5Ex at junjun xjal ax wa'l ke'tok, xi cyma'n: —¿Ti nbaj cyeye? ¿Tiku'n nne'l cypaju'ne tal bur? Che chi. 6Xitzun cyma'n xnak'tzben cye ic tza'n otok txi k'ma'n cye tu'n Jesús; xitzun k'o'n permis cye cyu'n xjal. 7Ultzun cyi'n tal bur tuc'il Jesús, ex jax cyk'o'n cyxbalun tibaj, jaxtzun ten Jesús tibaj. 8Ex nimcu xjal cub cylic'un cyxbalun tuj be, ex txkantl xjal el cytx'emin tk'ab tze', cub cyk'o'n tuj be. 9Ex akeju xjal nejni twitz Jesús cyuc'ix keju lepch ke'c ti'j in che sch'in in cyma'n: —Kk'onx k'olbebl te. Awt Dios cy'iwlante ju tzul, aju ma tzaj sama'n tu'n Kman. 10Awt Dios cy'iwlante ju cawbil tzul, aju tcawbil kxe'chel David. Nimanxwit tbi Dios tuj cya'j. 11Ocxtzun Jesús tuj tnam Jerusalén, ex ocx tuj tja Dios; tejtzun tbaj tque'yin tcyakil, etztzun tu'n t-xi' tuj Betania cyuc'ix ke cablaj t-xnak'tzben, porque otok tz'oc kax. 12Tuj juntl k'ij tej cyetz tuj Betania, tzaj el tc'u'j Jesús. 13Ex xi tque'yin Jesús jun wi' tkan higo najchak, attok t-xak; xi'tzun lolte ka at jun twitz tu'n tcnet tu'n; pero tej tpon t-xe tkan higo, minti' jun twitz cnet, nok o'cx t-xak at, porque mya a k'ij at twitz higo. 14Xitzun tma'n Jesús te tkan higo: —Te jumajx mlayx txi lo'ntl jun twitza tu'n jun xjal, chi Jesús. O cybi ke t-xnak'tzben tej tmante Jesús jlu. 15E pontzun tuj Jerusalén ex ocx Jesús tuj tja Dios, e je'tz tlajo'n keju in che c'ayin ex keju in che lok'on tuj ttxa'n pe'n tja Dios, ex jaw tpich'k'u'n cymes ch'expul twitz pwak cyuc'ix cyk'ukbil keju in che c'ayintok paloma. 16Ex minti' o tcuyi tu'n cyic' xjal twitz tja Dios ka k'i'n jun ti'xti cyu'n. 17Ex xi tk'o'n Jesús xnak'tzbil cye, xi tma'n: —¿Myapetzun tz'iban tuj Tu'jil: We nja c'oquel tbi ja te nabl Dios cye cycyakil xjal, chi tuj Tu'jil? Atzun cyeye ma tz'oc cyk'o'ne te cyjul elek', chi Jesús cye. 18Ex o cybi ke xnak'tzal ti'j ley ti'j jlu, cyuc'ix ke nejenel cye pal, ex e oc ten jyol tumel tza'n tten tu'n tbyet Jesús cyu'n, porque in che xobtok, tu'nju in che labin cycyakil xjal ti'j t-xnak'tzbil. 19Tejtzun toc kax etz Jesús tuj tnam. 20Te juntl k'ij te prim cyja' cyxi', o cyil otok tzkij tkan higo tuc'ix tloc'. 21Tzajtzun tna'n Pedro ti otok baj ti'j tkan higo, ex xi tma'n te Jesús: —Xnak'tzal, aju tkan higo xi' tyola ti'j, que'yinxa ma tzkij, chi Pedro. 22Xi tma'n Jesús cye: —Ke'c cyc'u'je ti'j Dios. 23Porque ax toc cxel nma'ne cyeye, ka at jun xjal ma k'mante teju witz lu: Tic'a tzalu ex xo'n cux tiba tuj mar, ka chi xjal, cbantel aju cxel tma'n ka minti' xjawje' tc'u'j, nok o'cx k'ukl tc'u'j ti'j tu'n tbant aju cxel tma'n. 24Cyja'tzun cxel nma'ne cyeye, tcyakilju cxel cykanine oc cyna'ne Dios, ke' cyc'u'je ti'j ic tza'n otok cyc'ame, ex ctzajeltzun k'o'n cyeye. 25Ex oc cycub tene na'l Dios, ka at jun xjal mya ba'n cytene tuc'il, cynajsame til, tu'ntzun icx cyeye tu'n tcub najsa'n cyile tu'n Cymane aju at tuj cya'j. 26[Katzun minti' xcub cynajsa'ne til juntl, ax icx cyeye mlay cub najsa'n cyile tu'n Cymane aju at tuj cya'j.] 27E pontzun juntl maj Jesús tuj tnam Jerusalén, ex in bettok Jesús tuj tja Dios. E pontzun ke nejenel cye pal tuc'il, cyuc'ix ke xnak'tzal ti'j ley, ex cyuc'ix cytijil xjal. 28Xitzun cykanin te: —¿Ti toclena tu'n tbinchanteya jlu, ex alcye saj k'onte toclena tu'n tbinchanteya tcyakil jlu? Che chi. 29Xi ttzak'we'n Jesús: —Icx weye at jun nxjele cyeye; ka ma chin tzaj cytzak'we'ne jacutzun txi nma'ne cyeye ti woclene tu'n nbinchanteye tcyakil jlu. 30¿Tu'npe Dios tzaj k'ma'n te Juan tu'n cybyan xjal tu'n tuj a', ex ka cyu'n xjal tzaj cyma'n? Chin cytzak'wentze. 31Atzun cye e oc ten yolil ti'j cyxolx: —Ka ma txi kma'n, tu'n Dios tzaj tma'n: Tiku'ntzun minti' xi cyocsla'ne? chilo ke. 32¿Ex katzun cxel kma'n, cyu'n xjal tzaj cyma'n? che chi. Pero tzaj cyxobil cywitz xjal, porque cycyakil xjal in che yolin ti'j Juan ka ax toc t-sanjel Dios. 33O'cx tzaj cytzak'we'n: —Minti' bi'n ku'ne, che chi. Tzajtzun ttzak'we'n Jesús: —Icx weye, mlay txi nma'ne cyeye ti woclene tu'n nbinchanteye tcyakil jlu.

will be added

X\